ເພື່ອຖອດຖອນບົດຮຽນ ແລະ ແລກປ່ຽນຄໍາຄິດ-ຄໍາເຫັນ ໃນການຈັດຕັ້ງປະຕິບັດວຽກງານທີ່ຜ່ານມາພາຍໃນສະພາປະຊາຊົນແຂວງ ໃນຕອນເຊົ້າ​ທີ 24 ຕຸລາ 2023  ທີ່ຫ້ອງ​ປະຊຸມສະພາປະຊາຊົນແຂວງ ໄດ້ຈັດກອງປະຊຸມ ສະຫຼຸບຕີລາຄາຜົນສຳເລັດການກະກຽມ, ການດຳເນີນກອງປະຊຸມ ແລະ ສະຫຼຸບຕີລາຄາການລົງພົບປະ, ເຜີຍແຜ່ຜົນສໍາເລັດກອງປະຊຸມສະໄໝສາມັນເທື່ອທີ 05 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີ II,  ໂດຍການເປັນປະທານກອງປະຊຸມຂອງທ່ານ ຄໍາຜັນ ຄູນສະຫວັນ ຮອງປະທານຄະນະປະຈໍາສະພາປະຊາຊົນແຂວງ ເຂົ້າຮ່ວມມີ ບັນດາທ່ານໃນຄະນະປະຈໍາສະພາປະຊາຊົນແຂວງ, ນອກນັ້ນຍັງມີບັນດາທ່ານຮອງປະທານຄະນະກໍາມະການ ທີ່ປະຈຳການພາຍໃນສະພາປະຊາຊົນແຂວງ; ຮອງເລຂາທິການ; ຫົວໜ້າ ແລະ ຮອງຫົວໜ້າຂະແໜງ ພ້ອມດ້ວຍພະນັກງານວິຊາການທັງໝົດ ພາຍໃນສະພາປະຊາຊົນແຂວງ ເຂົ້າຮ່ວມຢ່າງພ້ອມພຽງ.

ໂອກາດນີ້ທ່ານ ພູທອນ ພຸດທະຂັນຕິ ເລຂາທິການສະພາປະຊາຊົນແຂວງ ໄດ້ຂຶ້ນຜ່ານບົດສະຫຼຸບ ຜົນສໍາເລັດການກະກຽມ ແລະ ດໍາເນີນກອງປະຊຸມສະໄໝສາມັນ ເທື່ອທີ  05 ສະພາປະຊາຊົນແຂວງ ຊຸດທີ II;  ຜ່ານບົດສະຫຼຸບ ຕີລາຄາການລົງພົບປະ, ເຜີຍແຜ່ຜົນສໍາເລັດກອງປະຊຸມສະໄໝສາມັນເທື່ອທີ 05 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີ II,  ພາຍຫຼັງທີ່ໄດ້ຮັບຟັງການຜ່ານບົດສະຫຼຸບສໍາເລັດແລ້ວ ປະທານກອງປະຊຸມກໍ່ໄດ້ມີຄຳເຫັນເຈາະຈິ້ມ ພ້ອມທັງເປີດໂອກາດໃຫ້ຜູ້ເຂົ້າຮ່ວມກອງປະຊຸມທັງໝົດ ແລກປ່ຽນຄໍາຄິດ-ຄໍາເຫັນ ຕໍ່ກັບບັນດາບັນຫາທີ່ຍັງຄົງຂ້າງ ແລະ ຄອດທີ່ຄວນແກ້ໄຂຢ່າງເລັ່ງດ່ວນ

ທ້າຍສຸດປະທານກອງປະຊຸມ, ໄດ້ມີຄໍາເຫັນສະຫຼຸບ, ຕີລາຄາ ແລະ ໃຫ້ທິດຊີ້ນໍາຕໍ່ກອງປະຊຸມ ຊຶ່ງທ່ານໄດ້ສະແດງຄວາມຍ້ອງຍໍຊົມເຊີຍຕໍ່ບັນດາອະນຸກໍາມະການ, ຄະນະເລຂາທິການ ແລະ ພະນັກງານວິຊາການຂອງສະພາປະຊາຊົນແຂວງ ທີ່ໄດ້ເອົາໃຈໃສ່ໃນການເຮັດໜ້າທີ່ເປັນເສນາທິການຈັດຕັ້ງປະຕິບັດວຽກງານຕາມການມອບໝາຍໄດ້ຮັບຜົນສໍາເລັດຫຼາຍດ້ານ ແລະ ໄດ້ເນັ້ນໃຫ້ທຸກພາກສ່ວນຈົ່ງພ້ອມກັນສືບຕໍ່ຈັດຕັ້ງເສີມຂະຫຍາຍບົດຮຽນທີ່ດີ ແລະ ປັບປຸງໃນບາງຂໍ້ຄົງຄ້າງໃນໄລຍະຜ່ານມາ    ພ້ອມທັງ ມີທິດຊີ້ນໍາ ໃຫ້ແຕ່ລະຄະນະກໍາມະການກະກຽມບັນດາເນື້ອໃນເພື່ອປະກອບຄໍາຄິດເຫັນໃສ່ກອງປະຊຸມສະໄໝສາມັນເທື່ອທີ 06 ຂອງສະພາແຫ່ງຊາດ ຊຸດທີ IX, ທີ່ຈະໄດ້ໄຂຂຶ້ນໃນວັນທີ 31 ຕຸລາ 2023 ທີ່ຈະມາເຖິງນີ້.