ໃນລະຫວ່າງວັນທີ 3-7 ກັນຍາ 2024 ທ່ານ ສົມມາລີ ຄໍາເກັ່ງ, ກໍາມະການພັກແຂວງ, ສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 6, ຄະນະປະຈຳສະພາປະຊົນແຂວງ, ເລຂາພັກເມືອງ ເຈົ້າເມືອງພູຄູນ, ໄດ້ລົງເຄື່ອນໄຫວ ເຜີຍແຜ່ຜົນສຳເລັດກອງປະຊຸມສະໄຫມສາມັນ ເທື່ອທີ 7 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຢູ່ເມືອງວຽງຄໍາ ແຂວງຫຼວງພະບາງມີ 5 ຈຸດ, ລວມມີ 5 ບ້ານຄື: ບ້ານ ສາມສຸມ, ບ້ານ ດອນແກ້ວ, ບ້ານ ສາມຕົ້ນ, ບ້ານ ໃຫຍ່ວຽງຄໍາ ແລະ ບ້ານ ກິ່ວໄລ, ເຂົ້າຮ່ວມຮັບຟັງການເຜີຍແຜ່ຢູ່ແຕ່ລະຈຸດ ມີການນໍາຂອງເມືອງ, ເລຂາພັກບ້ານ, ນາຍບ້ານ, ອຳນາດການປົກຄອງບ້ານ, ເຖົ້າແກ່ແນວໂຮມ ບ້ານ ຕະຫຼອດຮອດພໍ່ແມ່ປະຊາຊົນບັນດາເຜົ່າ ທັງຫມົດ 347 ຄົນ, ຍິງ 196 ຄົນ.
ການລົງເຜີຍແຜ່ຄັ້ງນີ້ກ່ອນອື່ນແມ່ນໄດ້ຮັບຟັງການງານໂດຍຫຍໍ້ກ່ຽວກັບ ສະພາບການພັດທະນາເສດຖະກິດ-ສັງຄົມ ຈາກອໍານາດການປົກຄອງແຕ່ລະບ້ານ, ຈາກນັ້ນ ທ່ານ ກໍ່ໄດ້ ນໍາເອົາເນື້ອໃນຈິດໃຈຜົນສໍາເລັດຂອງກອງປະຊຸມ ສະໄໝສາມັນເທື່ອທີ 7 ຂອງສະພາແຫ່ງຊາດ ແລະ ສະພາປະຊາຊົນແຂວງ ມາເຜີຍແຜ່ ເປັນຕົ້ນ: ວຽກງານຂົງເຂດລັດຖະບານ, ວຽກງານອົງການກວດສອບແຫ່ງລັດ, ວຽກງານສະພາແຫ່ງຊາດ, ວຽກງານສ້າງ ແລະ ປັບປຸງກົດໝາຍ ຈໍານວນ 13 ສະບັບ ແລະ ວຽກບຸກຄະລາກອນ ທີ່ກອງປະຊຸມສະພາແຫ່ງຊາດໄດ້ຮັບຮອງເອົາຢູ່ໃນກອງປະຊຸມ ມາເຜີຍແຜ່ໃຫ້ ພໍ່ແມ່ປະຊາຊົນໄດ້ຮັບຮູ້ ແລະ ເຂົ້າໃຈແຈ້ງ ເພື່ອໃຫ້ປະຊາຊົນນໍາໄປຈັດຕັງປະຕິບັດ ເຂົ້າໃນພັດທະນາຊີວິດການເປັນຢູ່ໃຫ້ດີຂື້ນເປັນກ້າວໆ.
ໂດຍລວມແລ້ວ, ສ່ວນຫຼາຍປະຊາຊົນແມ່ນມີອາຊີບການບໍລິການຄ້າຂາຍ, ປູກຝັງ ແລະ ລ້ຽງສັດເປັນອາຊີບຕົ້ນຕໍ, ຄຽງຄູ່ກັນນັ້ນ ຍັງໄດ້ຮັບຟັງຄໍາຄິດ, ຄໍາສະເໜີຂອງພໍ່ແມ່ປະຊາຊົນ. ໃນໂອກາດດັ່ງກ່າວ ທ່ານ ສົມມາລີ ຄໍາເກັ່ງ, ໄດ້ຮຽກຮ້ອງໃຫ້ອໍານາດການປົກຄອງບ້ານ ແລະ ພໍ່ແມ່ປະຊາຊົນບັນດາເຜົ່າ ໃຫ້ມີຄວາມສາມັກຄີຊ່ວຍເຫຼືອເຊິ່ງກັນ ແລະ ກັນ, ເຊື່ອໝັ້ນຕໍ່ການນໍາພາຂອງພັກ-ລັດ, ເປັນເຈົ້າການໃນການສຶກສາອົບຮົມລູກຫຼານໃຫ້ເປັນພົນລະເມືອງດີ, ພ້ອມກັນປະຕິບັດຕາມແຜນພັດທະນາຂອງບ້ານວາງອອກໃຫ້ໄດ້ຮັບຜົນດີ, ເອົາໃຈໃສ່ເສີມຂະຫາຍການຜະລິດສິນຄ້າກະສິກໍາ, ປູກຝັງ ລ້ຽງສັດແລະອື່ນໆທີ່ເປັນທານແຮງຂອງບ້ານໃຫ້ຫຼາຍກາຍເປັນສິນຄ້າ ເພື່ອທົດແທນການນໍາເຂົ້າ,ສົ່ງເສີມການສົ່ງອອກໃຫ້ໄດ້ຫຼາຍ ແລະ ມີຕະຫຼາດຮອງຮັບ, ເພື່ອໃຫ້ແຕ່ລະຄອບຄົວມີລາຍຮັບສູງຂື້ນ ແລະ ຊີວິດການເປັນຢູ່ທີ່ດີຂື້ນໄປເລື້ອຍໆ, ການລົງເຜີຍແຜ່ຄັ້ງນີ້ ທ່ານ ຍັງໄດ້ນໍາເອົາວັດຖຸປັດໃຈເປັນເງິນສົດຈໍານວນ 8 ລ້ານກີບ ໄປ ມອບໃຫ້ເມືອງວຽງຄໍາ ເພື່ອນໍາໄປຊ່ວຍເຫຼືອພໍ່ແມ່ປະຊາຊົນທີ່ຖືກຜົນກະທົບຈາກໄພນໍ້າຖ້ວມ ອີກດ້ວຍ.
ຂ່າວ: ຫຸມພັນ ອໍາພອນ