(ສພຊ) ວັນທີ 3 ກັນຍາ 2021 ທີ່ສະພາແຫ່ງຊາດໄດ້ມີກອງປະຊຸມໃຫຍ່ສະມາຊິກພັກ ຄັ້ງທີ II ຂອງໜ່ວຍພັກຮາກຖານສະຖາບັນຄົ້ນຄວ້ານິຕິກຳສະພາແຫ່ງຊາດ (ສນສ) ພາຍໃຕ້ການເປັນປະທານຂອງສະຫາຍ ປອ. ຢ່າງກູ້ ຢ່າງລືໄຊ ຮັກສາການເລຂາໜ່ວຍພັກຮາກຖານ ສນສ; ເຂົ້າຮ່ວມໂດຍສະຫາຍ ປອ. ນາງ ສູນທອນ ໄຊຍະຈັກ ຄະນະເລຂາທິການສູນກາງພັກ, ຮອງເລຂາຄະນະບໍລິຫານງານພັກ, ຮອງປະທານສະພາແຫ່ງຊາດ, ຜູ້ຊີ້ນໍາສະຖາບັນຄົ້ນຄວ້ານິຕິກໍາ; ມີຮອງເລຂາໜ່ວຍພັກ, ກຳມະການໜ່ວຍພັກ, ຜູ້ຕາງໜ້າຈາກຫ້ອງການຊ່ວຍວຽກງານບໍລິຫານພັກສະພາແຫ່ງຊາດ, ຜູ້ຕາງໜ້າຈາກອົງການຈັດຕັ້ງມະຫາຊົນ, ສະມາຊິກພັກສົມບູນ-ສຳຮອງ, ສະມາຊິກພັກອະວຸໂສບຳນານພາຍໃນໜ່ວຍພັກ ແລະ ແຂກຖືກເຊີນ.
ກອງປະຊຸມໃຫຍ່ ຄັ້ງທີ II ຂອງໜ່ວຍພັກຮາກຖານ ສນສ ໄດ້ຄົ້ນຄວ້າຢ່າງເລິກເຊິ່ງກົງໄປກົງມາ, ມີຄວາມຮັບຜິດຊອບການເມືອງສູງ ແລະ ໄດ້ຮັບຮອງເອົາຢ່າງເປັນເອກະສັນເນື້ອໃນບັນຫາສໍາຄັນ ເປັນຕົ້ນບົດລາຍງານການເມືອງຂອງໜ່ວຍພັກຮາກຖານ ໃນໄລຍະ 5 ປີຜ່ານມາ ແລະ ທິດທາງແຜນການແຕ່ລະດ້ານ ໃນໄລຍະ 5 ປີຕໍ່ໜ້າ ພ້ອມທັງວາງມາດຕະການຈັດຕັ້ງປະຕິບັດ ເຊິ່ງມີຄວາມສອດຄ່ອງກັບໜ້າທີ່ການເມືອງ ຕາມສະພາບຄວາມເປັນຈິງ ແລະ ຄວາມຮຽກຮ້ອງຕ້ອງການວຽກງານຂອງໜ່ວຍພັກຮາກຖານ; ກອງປະຊຸມໄດ້ຮັບຟັງການປະກອບຄຳເຫັນຂອງຕາງໜ້າໜ່ວຍອົງການຕັດຕັ້ງມະຫາຊົນ ແລະ ສູນຝຶກອົບຮົບແລະ ຂໍ້ມູນຂ່າວສານ ຕໍ່ຮ່າງລາຍງານການເມືອງທີ່ໄດ້ສະເໜີຕໍ່ກອງປະຊຸມໃຫຍ່ ໂດຍໄດ້ສະໜັບສະໜູນ ແລະ ເຫັນດີຕໍ່ເນື້ອໃນຂອງຮ່າງລາຍງານການເມືອງ; ພ້ອມກັນນັ້ນ, ກອງປະຊຸມໄດ້ຮັບຟັງ ແລະ ເປັນເອກະສັນຮັບຮອງເອົາບົດສໍາຫລວດຕີລາຄາການນໍາພາລວມຂອງຄະນະໜ່ວຍພັກຮາກຖານ ໃນ 5 ປີ ຜ່ານມາ ເຊິ່ງໄດ້ຍົກໃຫ້ເຫັນຜົນສຳເລັດດ້ານດີທີ່ຕັ້ງໜ້າ, ດ້ານທີ່ຍັງຄົງຄ້າງ ແລະ ທິດທາງໃນການແກ້ໄຂ ເພື່ອໃຫ້ຄະນະໜ່ວຍພັກຮາກຖານຊຸດໃໝ່ ໄດ້ໝູນໃຊ້ເປັນທິດທາງໃນການຍົກສູງບົດບາດ, ຄວາມສາມາດນຳພາ ແລະ ຄວາມເປັນແບບຢ່າງນຳໜ້າ ໃນການເຄື່ອນໄຫວປະຕິບັດໜ້າທີ່ການເມືອງຂອງໜ່ວຍພັກໃນຕໍ່ໜ້າໃຫ້ມີປະສິດທິຜົນດີກວ່າເກົ່າ.
ຈາກນັ້ນ, ຜູ້ແທນສົມບູນກອງປະຊຸມໃຫຍ່ ໄດ້ພ້ອມກັນໃຊ້ສິດປະຊາທິປະໄຕຂອງຕົນ ປ່ອນບັດເລືອກຕັ້ງເອົາຄະນະໜ່ວຍພັກຮາກຖານ ສນສຊຸດທີ II ບົນພື້ນຖານຫລັກການລວມສູນປະຊາທິປະໄຕແລະ ຖືກຕ້ອງສອດຄ່ອງຕາມມາດຖານເງື່ອນໄຂທີ່ໄດ້ກໍານົດໄວ້ ເຊິ່ງມີຜູ້ລົງສະໝັກເລືອກຕັ້ງ 7 ສະຫາຍ ຍິງ 2 ສະຫາຍ; ກອງປະຊຸມໄດ້ເລືອກຕັ້ງເອົາຄະນະພັກ ສະໄໝທີ II ຈໍານວນ 5 ສະຫາຍ ຍິງ 2 ສະຫາຍ ແລະໄດ້ເປີດກອງປະຊຸມຄັ້ງປະຖົມມະລືກຂອງຄະນະໜ່ວຍພັກຮາກຖານ ສນສ ຊຸດທີ II ໄດ້ເປັນເອກະພາບເລືອກຕັ້ງພັກຊຸດໃໝ່ ເລືອກເອົາສະຫາຍ ປອ. ຢ່າງກູ້ ຢ່າງລືໄຊ ເປັນເລຂາໜ່ວຍພັກຮາກຖານ, ສະຫາຍສາຍອູ ພູມສາລີ ເປັນຮອງເລຂາໜ່ວຍພັກຮາກຖານ, ສະຫາຍ ສິນທະລາ ຫລ້າສຸກສະໄໝ ເປັນປະທານກວດກາ, ສະຫາຍ ນາງ ບົວວັນ ທຳມະວົງເປັນຮອງປະທານກວດກາ ແລະ ສະຫາຍ ນາງ ແສງທະວີ ໄຊຍະວຶດ ເປັນກຳມະການ. ນອກນັ້ນ,ຍັງມີຜູ້ສະໝັກເລືອກຕັ້ງເປັນຜູ້ແທນສົມບູນ, ສຳຮອງ ຂອງໜ່ວຍພັກຮາກຖານ ສນສ ທີ່ຈະເຂົ້າຮ່ວມກອງປະຊຸມໃຫຍ່ຄັ້ງທີ IV ຂອງອົງຄະນະພັກສະພາແຫ່ງຊາດ ທັງໝົດ 21 ສະຫາຍ, ເລືອກເອົາ 17 ສະຫາຍໃນນີ້ ສົມບູນ 15 ສະຫາຍ ສຳຮອງ 2 ສະຫາຍ.
ໃນໂອກາດນີ້, ກອງປະຊຸມໄດ້ຮັບຟັງຄຳໂອ້ລົມຂອງສະຫາຍ ປອ. ນາງ ສູນທອນ ໄຊຍະຈັກ ເຊິ່ງສະຫາຍໄດ້ສະແດງຄວາມຍ້ອງຍໍຊົມເຊີຍຕໍ່ການຊີ້ນໍາ-ນໍາພາຂອງຄະນະໜ່ວຍພັກຮາກຖານຊຸດເກົ່າ ເຊິ່ງໄດ້ນໍາພາປະຕິບັດໜ້າທີ່ການເມືອງຂອງຕົນ ຍາດໄດ້ຜົນສໍາເລັດໃນຫລາຍດ້ານ ແລະ ໄດ້ຍົກໃຫ້ເຫັນດ້ານອ່ອນ ແລະ ສິ່ງທ້າທາຍ ທີ່ຄະນະໜ່ວຍພັກຊຸດໃໝ່ຈະຕ້ອງໄດ້ສືບຕໍ່ຍົກສູງບົດບາດຄວາມສາມາດນຳພາໃນການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ II ໃຫ້ມີຜົນສຳເລັດໃຫຍ່ຫລວງກວ່າເກົ່າ ໂດຍເລີ່ມຈາກການຫັນປ່ຽນດ້ານແນວຄິດ-ຈິນຕະນາການ ສູ່ການກະທຳຕົວຈິງ ໃຫ້ມີການຫັນປ່ຽນໃໝ່ ທີ່ແຂງແຮງ, ເລິກເຊິ່ງ ແລະ ຮອບດ້ານ ແນໃສ່ຍົກສູງບົດບາດ, ຄວາມສາມາດນຳພາ ແລະ ຄວາມເປັນແບບຢ່າງນຳໜ້າ ຂອງໜ່ວຍພັກ ເພື່ອເສີມຂະຫຍາຍກຳລັງແຮງສັງລວມເຂົ້າໃນການປັບປຸງ ກໍ່ສ້າງໜ່ວຍພັກຮາກຖານຂອງສະຖາບັນໃຫ້ປອດໃສ, ເຂັ້ມແຂງ, ໜັກແໜ້ນ; ເອົາໃຈໃສ່ສຶກສາອົບຮົມການເມືອງ ນຳພາແນວຄິດຂອງສະມາຊິກພັກ-ພະນັກງານໃຫ້ມີຄວາມໜັກແໜ້ນ ໂດຍຕ້ອງຖືເອົາການຄົ້ນຄວ້າ, ເຊື່ອມຊຶມ ແລະ ກຳແໜ້ນແນວທາງນະໂຍບາຍຂອງພັກ, ກຳໄດ້ແນວຄິດທິດສະດີທີ່ເປັນທິດຊີ້ນຳຂອງພັກ, ຫລັກມູນພື້ນຖານຂອງທິດສະດີມາກ-ເລນິນ ແລະແນວຄິດປະທານໄກສອນ ພົມວິຫານ, ປະຕິບັດກົດລະບຽບຂອງພັກ ແລະ ມະຕິຄຳສັ່ງຕ່າງໆ, ກົດໝາຍ ແລະ ນິຕິກຳໃຕ້ກົດໝາຍ ໂດຍຈັດຕັ້ງຜັນຂະຫຍາຍໃຫ້ຕິດພັນກັບການປະຕິບັດໜ້າທີ່ການເມືອງ ໃຫ້ມີປະສິດທິຜົນກ່ວາເກົ່າ; ປັບປຸງແບບແຜນການນຳພາ ຕາມຫລັກການລວມສູນປະຊາທິປະໄຕ, ມີການແບ່ງງານ ແລະ ແບ່ງຄວາມຮັບຜິດຊອບໃນໝູ່ຄະນະຢ່າງຈະແຈ້ງ; ນຳພາຊີ້ນຳ ການຈັດຕັ້ງປະຕິບັດວຽກງານວິຊາສະເພາະຂອງສະຖາບັນຄົ້ນຄວ້ານິຕິກຳໃຫ້ຫັນໄປສູ່ລວງເລິກ ໂດຍສຸມໃສ່ຄົ້ນຄວ້າວິທະຍາສາດກ່ຽວກັບການຈັດຕັ້ງ ແລະ ການເຄື່ອນໄຫວຂອງສະພາແຫ່ງຊາດ, ການຍົກສູງຂີດຄວາມສາມາດ ແລະ ການສະໜອງຂໍ້ມູນຂ່າວສານ ໃຫ້ແກ່ສະພາແຫ່ງຊາດ ແລະ ສະພາປະຊາຊົນຂັ້ນແຂວງ ໃຫ້ມີຄວາມຖືກຕ້ອງ, ຈະແຈ້ງ ແລະ ວ່ອງໄວກວ່າເກົ່າ; ປະຕິບັດພາລະບົດບາດເປັນເສນາທິການໃຫ້ຄະນະພັກສະພາແຫ່ງຊາດ ແລະ ຄະນະປະຈຳສະພາແຫ່ງຊາດ ໃນການປັບປຸງວຽກງານຂອງສະຖາບັນຄົ້ນຄວ້ານິຕິກຳ ໃຫ້ມີຄວາມຄ່ອງຕົວແລະ ເຂັ້ມແຂງກວ່າເກົ່າ, ຕັ້ງໜ້າຊຸກຍູ້ວຽກງານອົງການຈັດຕັ້ງມະຫາຊົນ, ສ້າງຂະບວນການວຽກດີຄົນເດັ່ນ ຕິດພັນກັບຂະບວນການແຂ່ງຂັນ ※ຮັດຊາດ ແລະ ພັດທະນາ ໃຫ້ເປັນຂະບວນຟົດຟື້ນ ແລະ ມີປະສິດທິຜົນດີ.
(ສົມນຶກ ແກ້ວໄຊຍະຈັກ)