ໃນຕອນບ່າຍ ວັນທີ 15 ພະຈິກ 2022 ທີ່ຫ້ອງປະຊຸມສະພາປະຊາຊົນແຂວງ ໜ່ວຍພັກສະພາປະຊົນແຂວງຜົ້ງສາລີ ໄດ້ຈັດພິທີປະກາດບົ່ງຕົວແຕ່ງຕັ້ງກໍາມະການໜ່ວຍພັກ, ປະທານ, ຮອງປະທານກວດກາ ໜ່ວຍພັກ ໂດຍການເຂົ້າຮ່ວມເປັນປະທານ ຂອງສະຫາຍ ສົມຈິດ ຫັບລະກອນ ກໍາມະການປະຈໍາພັກແຂວງ, ຮອງປະທານຄະນະປະຈຳ ສພຂ,ເຂົ້າຮ່ວມມີເລຂາ, ຮອງເລຂາໜ່ວຍພັກ, ຕາງໜ້າຈາກຄະນະຈັດຕັ້ງແຂວງ, ອົງການກວດກາພັກ-ລັດແຂວງ ແລະ ສະມາຊິກພັກ ພາຍໃນສະພາປະຊາຊົນແຂວງ ເຂົ້າຮ່ວມ.

ໃນພິທີໄດ້ຮັບຟັງຕາງໜ້າຈາກຄະນະຈັດຕັ້ງແຂວງຂຶ້ນຜ່ານມະຕິຕົກລົງວ່າດ້ວຍການບົ່ງຕົວແຕ່ງຕັ້ງກໍາມະການໜ່ວຍພັກສະພາປະຊາຊົນແຂວງ ສະບັບເລກທີ 803/ຄພຂ, ລົງວັນທີ  07 ຕຸລາ 2022 ເຊິ່ງໄດ້ຕົກລົງແຕ່ງຕັ້ງ ສະຫາຍ ສຸວັນຟູ ລາວລີ ເປັນກໍາມະການໜ່ວຍພັກສະພາປະຊາຊົນແຂວງ; ຮັບຟັງຕາງໜ້າຈາກອົງການກວດກາພັກ-ລັດແຂວງ ຜ່ານມະຕິວ່າດ້ວຍການແຕ່ງຕັ້ງປະທານ, ຮອງປະທານກວດກາ ປະຈໍາໜ່ວຍພັກສະພາປະຊາຊົນແຂວງ ສະບັບເລກທີ 862/ຄພຂ, ລົງວັນທີ 24 ຕຸລາ 2022 ເຊິ່ງໄດ້ຕົກລົງແຕ່ງຕັ້ງ ສະຫາຍ ສຸວັນຟູ ລາວລີ ເປັນປະທານ ແລະ ສະຫາຍ ຄໍາພັນ ຄຸນສົມບັດ ເປັນຮອງປະທານກວດກາໜ່ວຍພັກສະພາປະຊາຊົນແຂວງ

ໃນວາລະດັ່ງກ່າວກກໍ່ໄດ້ຈັດພິທີເລື່ອນສະມາຊິກພັກສໍາຮອງຂຶ້ນເປັນສົມບູນ ແລະ ຮັບມະຫາຊົນຜູ້ກ້າວໜ້າຂຶ້ນເປັນສະມາຊິກພັກສອງ ເຊິ່ງໃນພິທີ ໄດ້ຮັບຟັງສະຫາຍ ຄໍາດາ ໂສລະພົມ ຮອງເລຂາໜ່ວຍພັກ ຂຶ້ນຜ່ານມະຕິຕົກລົງຂອງຄະນະປະຈໍາພັກແຂວງວ່າດ້ວຍເລື່ອນສະມະຊິກພັກສໍາຮອງຂຶ້ນເປັນສົມບູນ ຈໍານວນ 2 ສະຫຍາຍ, ຍິງ 1 ສະຫາຍ ແລະ ຂຶ້ນຜ່ານມະຕິຕົກລົງຂອງຄະນະປະຈໍາພັກແຂວງວ່າດ້ວຍການຮັບມະຫາຊົນຜູ້ກ້າວໜ້າເຂົ້າເປັນສະມາຊິກພັກປະຊາຊົນປະຕິວັດລາວ ຈໍານວນ 4 ສະຫາຍ, ຍິງ 2 ສະຫາຍ ຫຼັ້ງຈາກນັ້ນ, ຂຶ້ນກ່າວຮັບສະມາຊິກພັກສົມບູນ ແລະ ມະຫາຊົນຜູ້ກ້າວໜ້າຂຶ້ນສຳຮອງ ໂດຍສະຫາຍ ນາງ ພອນສະຫວັນ ສັກຕິຄຸນ ເລຂາໜ່ວຍພັກສະພາປະຊາຊົນແຂວງ

ໃນຕອນທ້າຍ, ປະທານພິທີໄດ້ມີຄໍາເຫັນໂອ້ລົມ ຕໍ່ບັນດາເນື້ອໃນຕ່າງໆໃນພິທີຄັ້ງນີ້, ເຊິ່ງສະຫາຍໄດ້ຍ້ອງຍໍຊົມເຊີຍຕໍ່ໜ່ວຍພັກສະພາປະຊາຊົນແຂວງໃນການປັບປຸງບຸກຄະລາກອນພາຍໃນໜ່ວຍພັກ, ນອກຈາກນີ້ ສະຫາຍຍັງໄດ້ເນັ້ນຕື່ມ ຕໍ່ກັບຄະນະໜ່ວຍພັກ ໃຫ້ສືບຕໍ່ເພີ່ມທະວີການກໍາແໜ້ນ ເຊື່ອມຊຶມແນວທາງ ນະໂຍບາຍຂອງພັກ ໂດຍສະເພາະໄປຕາມ 5​ ຫຼັກການ, 3 ທິດນໍາ ຂອງກົດລະບຽບພັກ, ການປັບປຸງກໍ່ສ້າງພັກ, ປັບປຸງແບບແຜນວິທີເຮັດວຽກ, ວຽກງານປ້ອງກັນພັກ ແລະ ວຽກງານກວດກາພັກ ເພື່ອຮັບປະກັນໃນການປັບປຸງ ກໍ່ສ້າງໜ່ວຍພັກ, ສະມາຊິກພັກ ໃຫ້ປອດໃສ ເຂັ້ມແຂງ ໜັກແໜ້ນ. ຕໍ່ກັບສະມາຊິກພັກສໍາຮອງທີ່ເລື່ອນເປັນສົມບູນ ແລະ ມະຫາຊົນຜູ້ກ້າວໜ້າທີ່ເຂົ້າເປັນສະມາຊິກພັກປະຊາຊົນປະຕິວັດລາວ ນັ້ນ, ສະຫາຍ ໄດ້ເນັ້ນຕື່ມ ໃນການເພີ່ມທະວີ ເອົາໃຈໃສ່ ປະຕິບັດກົດລະບຽບພັກ ກໍ່ຄືໜ້າທີ່ຂອງສະມາຊິກພັກ ເພື່ອເຮັດໃຫ້ກາຍເປັນແບບຢ່າງທີ່ດີ

ພາບ-ຂ່າວ: ສຸນທອງ ວິໄລຈິດ