ໜ່ວຍພັກຄະນະເລຂາທິການ ສະພາປະຊາຊົນແຂວງສາລະວັນ ທີ່ຂື້ນກັບຄະນະພັກຮາກຖານ ສະພາປະຊາຊົນແຂວງສາະວັນ ໄດ້ຈັດກອງປະຊຸມປະເມີນການຈັດຕັ້ງປະຕິບັດແຜນກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ຄັ້ງທີ I ປະຈໍາປີ 2023 ແລະ ທິດທາງແຜນການ ຄັ້ງທີ II ປະຈໍາປີ 2024 ຂອງຕົນຂື້ນ, ໂດຍການເປັນປະທານກອງປະຊຸມຂອງສະຫາຍ ສົມພອນ ແສງສຸລິຈັນ ເລຂາໜ່ວຍພັກຄະນະເລຂາທິການສະພາປະຊາຊົນແຂວງ; ໃຫ້ກຽດເຂົ້າຮ່ວມໂອ້ລົມຂອງສະຫາຍ ນາງ ສູນໄຖ ໄຊຍະແສງ ກຳມະການພັກແຂວງ ເລຂາຄະນະພັກຮາກຖານ ສະພາປະຊາຊົນແຂວງ, ເຂົ້າຮ່ວມມີສະຫາຍຕາງໜ້າຈາກໜ່ວຍພັກຄະນະກຳມະການຍຸຕິທຳ ແລະ ປ້ອງກັນຊາດ-ປ້ອງກັນຄວາມສະຫງົບ, ໜ່ວຍພັກຄະນະກຳມະການເສດຖະກິດ,ແຜນການ ແລະ ການເງິນ, ໜ່ວຍພັກຄະນະກຳມະການວັດທະນະທຳ-ສັງຄົມ ແລະ ບັນດາເຜົ່າ, ມີບັນດາສະຫາຍສະມາຊິກພັກສົມບູນ-ສໍາຮອງ ເຂົ້າຮ່ວມ;

ວາລະຂອງກອງປະຊຸມ ຜູ້ທີ່ເຂົ້າຮ່ວມໄດ້ຮັບຟັງການເຜີຍແຜ່ຄໍາແນະນໍາ ຂອງຄະນະກວດກາພັກແຂວງ, ສະບັບເລກທີ 163/ຄກພຂ.ສວ, ລົງວັນທີ 26 ກັນຍາ 2023 ແລະ ແຈ້ງການແນະນໍາ ຂອງຄະນະຈັດຕັ້ງແຂວງ ສະບັບເລກທີ 60/ຄຈຂ.ສວ, ລົງວັນທີ 13 ຕຸລາ 2023; ຈາກນັ້ນ, ສະຫາຍ ຄົງສະໃໝ ວົງພັນ ຄະນະໜ່ວຍພັກເລຂາທິການ ສະພາປະຊາຊົນແຂວງ ໄດ້ຜ່ານບົດສະຫຼຸບແຜນກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ຄັ້ງທີ I ປະຈໍາປີ 2023 ແລະ ທິດທາງແຜນການ ຄັ້ງທີ II ປະຈໍາປີ 2024; ຜ່ານການຈັດຕັ້ງປະຕິບັດຄໍາສັ່ງ, ຄໍາແນະນໍາ, ບົດແນະນໍາ ແລະ ການຈັດຕັ້ງປະຕິບັດແຜນການກໍ່ສ້າງໜ່ວຍພັກປອດໃສ,  ເຂັ້ມແຂງ,  ໜັກແໜ້ນ ໃນໄລຍະ 1 ປີຜ່ານມາ  ສາມາດສະຫຼຸບຕີຄາລາຄາຜົນສໍາເລັດ, ດ້ານດີ, ດ້ານອ່ອນ ແລະ ບົດຮຽນທີ່ຖອດຖອນໄດ້ ເປັນຕົ້ນ: ດ້ານການເມືອງຄະນະໜ່ວຍພັກ ໄດ້ຊີ້ນໍາ ແລະ ຍົກສູງຄວາມສາມາດນໍາພາສະມາຊິກພັກຮູ້ຫັນເອົາແນວທາງຂອງພັກ, ກົດໝາຍຂອງລັດ ໄປຈັດຕັ້ງຜັນຂະຫຍາຍເປັນແຜນງານໂຄງການອັນລະອຽດແທດເໝາະກັບໜ້າທີ່ການເມືອງ ແລະ ເງື່ອນໄຂຕົວຈິງຂອງໜ່ວຍພັກ, ຕໍານິສົ່ງຂ່າວກໍ່ສ້າງຊ່ວຍເຫຼືອເຊິ່ງກັນ ແລະ ກັນ ຮັບປະກັນໄດ້ຄວາມເປັນເອກະພາບສາມັກຄີພາຍໃນພັກ, ຄະນະໜ່ວຍພັກໄດ້ຍຶດໝັ້ນ ແລະ ປະຕິບັດຢ່າງເຂັ້ມງວດຕາມ 5 ຫຼັກການ, 3 ທິດນຳໃນການກໍ່ສ້າງ ແລະ ປັບປຸງການຈັດຕັ້ງພັກໃຫ້ໜັກແໜ້ນ, ເຂັ້ມແຂງ, ຮັບປະກັນໄດ້ທາງດ້ານປະລິມານ ແລະ ຄຸນນະພາບ, ຖືສຳຄັນ ແລະປະຕິບັດລະບອບດຳເນີນຊີວິດການເມືອງ, ປະຈຳເດືອນ, ປີ, ຢ່າງເປັນປົກກະຕິ, ເອົາໃຈໃສ່ຫຼັກການລວມສູນປະຊາທິປະໄຕເຮັດວຽກເປັນໝູ່ຄະນະບຸກຄົນຮັບຜິດຊອບ, ປະຕິບັດນະໂຍບາຍ ມະຕິ, ຄຳສັ່ງ, ຂໍ້ກຳນົດ, ກົດລະບຽບ ແລະ ນິຕິກຳຕ່າງໆຢ່າງເຂັ້ມງວດ; ພ້ອມທັງໄດ້ຕີລາຄາການຈັດປະເພດສະມາຊິກພັກ ຕາມ 5 ເນື້ອໃນຄື: ດ້ານການເມືອງ, ດ້ານແນວຄິດ, ການຈັດຕັ້ງ, ແບບແຜນການນຳພາ ແລະ ດ້ານຄວາມຮັບຜິດຊອບໃນໜ້າທີ່ການເມືອງ, ເຊິ່ງຜ່ານການປະເມີນການຈັດຕັ້ງປະຕິບັດໃນແຕ່ລະດ້ານສາມາດຈັດປະເພດສະມາຊິກພັກແຂງ ຈຳນວນ 16 ສະຫາຍ, ຍິງ 08 ສະຫາຍ.

ທ້າຍພິທີ ກໍໄດ້ຮັບຟັງການໂອ້ລົມຊີ້ທິດເຍືອງທາງໃຫ້ໜ່ວຍພັກ ແລະ ສະມາຊິກພັກ ຈາກສະຫາຍ ນາງ ສູນໄຖ ໄຊຍະແສງ ກຳມະການພັກແຂວງ, ເລຂາຄະນະພັກຮາກຖານສະພາປະຊາຊົນແຂວງຕື່ມອີກ.

ພາບ-ຂ່າວ: ດີລຳພົນ ພົມມະຈັນ