ໃນຕອນບ່າຍວັນທີ 28 ກັນຍາ 2022 ຢູ່ທີ່ສະໂມສອນສະພາປະຊາຊົນແຂວງ ສອງໜ່ວຍພັກຂຶ້ນກັບຄະນະພັກຮາກຖານ ສະພາປະຊາຊົນແຂວງ (ສພຂ) ເຊກອງຄື: ໜ່ວຍພັກຄະນະເລຂາທິການ ແລະ ໜ່ວຍພັກຄະນະກໍາມະການເສດຖະກິດ ແລະ ວັດທະນະທໍາ-ສັງຄົມ ໄດ້ຈັດພິທີເລື່ອນສະມາຊິກພັກສຳຮອງຂຶ້ນເປັນສະມາຊິກພັກສົມບູນ ຈໍານວນ 03 ສະຫາຍ, ຍິງ 01 ສະຫາຍ ໂດຍການເປັນປະທານຂອງສະຫາຍ ນາງ ຄໍາເສັງ ທຸມມະວົງສາ ກໍາມະການພັກແຂວງ, ເລຂາຄະນະພັກຮາກຖານ ສພຂ, ໃຫ້ກຽດເຂົ້າຮ່ວມໂດຍທ່ານ ປອ ແພງສີ ສີລາວີ ຄະນະປະຈໍາພັກແຂວງ, ຮອງປະທານ ສພຂ , ມີບັນດາທ່ານ ເລຂາໜ່ວຍພັກ, ຄະນະໜ່ວຍພັກ ພ້ອມດ້ວຍສະມາຊິກພັກສົມບູນ-ສໍາຮອງທັງສອງໜ່ວຍພັກ ແລະ ແຂກທີ່ຖືກເຊີນເຂົ້າຮ່ວມ.
ໃນພິທີ ສະຫາຍ ນາງ ຂັວນໃຈ ສີສຸວົງ ຮອງຫົວໜ້າຂະແໜງກໍ່ສ້າງພັກ ຄະນະຈັດຕັ້ງແຂວງ ໄດ້ຜ່ານມະຕິຕົກລົງຂອງຄະນະປະຈໍາພັກແຂວງ ສະບັບເລກທີ 546; 547 ແລະ 548/ຄປພຂ.ຊກ, ລົງວັນທີ 12 ກັນຍາ 2022 ວ່າດ້ວຍການເລື່ອນສະມາຊິກພັກສຳຮອງເປັນສະມາຊິກພັກສົມບູນ ຈໍານວນ 03 ສະຫາຍ, ຍິງ 01 ສະຫາຍ ໃນນັ້ນ, ສັງກັດຢູ່ໜ່ວຍພັກເລຂາທິການ ສພຂ 02 ສະຫາຍ, ຍິງ 01 ສະຫາຍຄື: ສະຫາຍ ນາງ ທິດາພອນ ຄອນພະສິດ ອາຍຸ 30 ປີ ແລະ ສະຫາຍ ພົງພັດ ມະນີວົງ ອາຍຸ 28 ປີ ແລະ ສັງກັດຢູ່ໜ່ວຍພັກຄະນະກໍາມະການເສດຖະກິດ ແລະ ວັດທະນະທໍາ-ສັງຄົມ 01 ສະຫາຍຄື: ສະຫາຍ ສີເມືອງ ພູມດາວົງ ອາຍຸ 31 ປີ. ເຊິ່ງໄລຍະຜ່ານມາທັງ 03 ສະຫາຍແມ່ນໄດ້ເອົາໃຈໃສ່ປະຕິບັດກົດລະບຽບຂອງພັກ, ປະຕິບັດກົດໝາຍລັດຖະກອນ ຢ່າງເຂັ້ມງວດ, ມີຄວາມຫ້າວຫັນໃນການປະຕິບັດໜ້າທີ່ວຽກງານທີ່ພັກ-ລັດມອບໝາຍໃຫ້ຢ່າງມີຜົນສຳເລັດ, ເຂົ້າຮ່ວມທຸກຂະບວນການທີ່ອົງການຈັດຕັ້ງພັກ-ລັດຈັດຂຶ້ນ, ນອກນີ້ສະຫາຍ ຍັງມີຄວາມເຂົ້າໃຈແຈ້ງຕໍ່ແນວທາງນະໂຍບາຍຂອງພັກ, ລະບຽບກົດໝາຍຂອງລັດ ແລະ ກຳແໜ້ນ 5 ຫຼັກການ 3 ທິດນຳ ຂອງພັກວາງອອກໄດ້ເປັນຢ່າງດີ.
ໂອກາດດັ່ງກ່າວ ສະຫາຍ ນາງ ຄໍາເສັງ ທຸມມະວົງສາ ເລຂາຄະນະພັກຮາກຖານ ສພຂ ໄດ້ສະແດງຄວາມຍ້ອງຍໍຊົມເຊີຍຕໍ່ສະມາຊິກພັກສົມບູນໃໝ່ທີ່ມີຄວາມບຸກບືນຫ້າວຫັນຕໍ່ໜ້າທີ່ວຽກງານໃນໄລຍະຜ່ານມາທີ່ໄດ້ຮັບການມອບໝາຍຈົນມີຜົນສຳເລັດຫຼາຍດ້ານ ແລະໄດ້ກາຍເປັນສະມາຊິກພັກສົມບູນ, ເຊິ່ງນັ້ນກໍ່ແມ່ນຄວາມເອົາໃຈໃສ່ຂອງເລຂາ, ຄະນະໜ່ວຍພັກ ແລະສະມາຊິກພັກໄດ້ເອົາໃຈໃສ່ໃນການກໍ່ສ້າງຊຸກຍູ້, ຕິດຕາມພວກກ່ຽວຈົນໄດ້ຮັບຜົນສຳເລັດ ແລະກາຍເປັນສະມາຊິກພັກສົມບູນ, ທັງແມ່ນກຳລັງແຮງໜຶ່ງໃນການປະກອບສ່ວນຜັກດັນໃຫ້ພັກມີຄວາມເຂັ້ມແຂງ ບວກກັບຄວາມສາມັກຄີພາຍໃນພັກເປັນອັນໜຶ່ງອັນດຽວ ແລະມີ ແບບແຜນວິທີນຳພາເຮັດວຽກ ແລະອື່ນໆ ຖືກຕ້ອງຕາມລະບຽບຫຼັກການ, ແນວທາງຂອງພັກວາງອອກ ເພາະວ່າການນຳພາທີ່ດີແມ່ນການນຳພາທີ່ເປັນແບບຢ່າງ. ພ້ອມນັ້ນ ກໍໃຫ້ສືບຕໍ່ຢຶດໜັ້ນຕໍ່ອຸດົມການຂອງພັກ, ເດີນຕາມເສັ້ນທາງສັງຄົມນິຍົມ ແລະມີຄວາມຮັບຜິດຊອບຕໍ່ໜ້າທີ່ວຽກງານທີ່ການຈັດຕັ້ງຂອງພັກ-ລັດມອບໝາຍໃຫ້ສຳເລັດ ແລະເປັນແບບຢ່າງທີ່ດີໃຫ້ແກ່ມະຫາຊົນ.#ໂດຍ:ນາລີວັນ.