(ສ​ພ​ຊ) ກອງປະຊຸມສະໄໝສາມັນ ເທື່ອທີ 10 ຂອງສະພາແຫ່ງຊາດ (ສພຊ) ຊຸດທີ VIII ໄດ້​ໄຂ​ຂຶ້ນ ຢ່າງເປັນທາງການ ໃນຕອນເຊົ້າວັນອັງ​ຄານ ທີ 27 ຕຸ​ລາ 2020 ທີ່ຫ້ອງປະຊຸມສະພາແຫ່ງຊາດ (ຫລັກ 6) ນະຄອນຫລວງວຽງຈັນ ໂດຍການເປັນປະທານຂອງທ່ານ ນາງ ປານີ ຢາທໍ່ຕູ້ ກໍາມະການກົມການເມືອງສູນກາງພັກ, ປະທານສະພາແຫ່ງຊາດ; ເຂົ້າຮ່ວມມີທ່ານ ບຸນຍັງ ວໍລະຈິດ ເລຂາທິການໃຫຍ່ຄະນະບໍລິຫານງານສູນກາງພັກ, ປະທານປະເທດ; ທ່ານ ທອງລຸນ ສີສຸລິດ ນາຍົກລັດຖະມົນຕີ, ມີີ​ການ​ນຳ​ພັກ-ລັດ,​ ສະມາຊິກສະພາແຫ່ງຊາດ (ສ​ສ​ຊ), ຕາງໜ້າຈາກອົງການຈັດຕັ້ງພັກ-ລັດ, ອົງການຈັດຕັ້ງແນວລາວສ້າງຊາດ, ອົງການຈັດຕັ້ງມະຫາຊົນ ພ້ອມ​ດ້ວຍຜູ້ຕາງໜ້າຈາກພາກສ່ວນຕ່າງໆ ​ແລະ ແຂກຖືກເຊີນ.

ໃນ​ພິ​ທີ, ທ່ານ ນາງ ປານີ ຢາທໍ່ຕູ້ ໄດ້ກ່າວສູນທອນພົດ ​ໄຂກອງປະຊຸມຢ່າງເປັນທາງການ; ຈາກນັ້ນ, ທ່ານ ທອງລຸນ ສີສຸລິດ ໄດ້​ຂຶ້ນ​ຜ່ານ​ບົ​ດ​ລາຍ​ງານ​ການ​ຈັດ​ຕັ້ງ​ປະ​ຕິ​ບັດແຜນ​ພັດ​ທະ​ນາ​ເສດ​ຖະ​ກິດ​-ສັງ​ຄົມ, ແຜນ​ງົບ​ປະ​ມານ ແລະ ແຜນ​ເງິນ​ຕາ ປະ​ຈໍາ​ປີ 2020 ແລະ ທິດ​ທາງ​ແຜນ​ການ​ປະ​ຈ​ໍາ​ປີ 2021; ທ່ານ ສົມ​ດີ ດວງ​ດີ ຮອງ​ນາ​ຍົກ​ລັດ​ຖະ​ມົນ​ຕີ, ລັດ​ຖະ​ມົນ​ຕີ​ກະ​ຊວງ​ການ​ເງິນ ໄດ້​ຜ່ານ​ບົດ​ລາຍ​ງານ​ການ​ຈັ​ດ​ຕັ້ງ​ປະ​ຕິ​ບັດ​ແຜນ​ງົບ​ປະ​ມານ​ແຫ່ງ​ລັດ ປ​ະ​ຈໍາ​ປີ 2020 ແລະ ແຜນ​ການ ປະ​ຈ​ໍາ​ປີ 2021; ທ່ານ ສອນ​ໄຊ ສີ​ພັນ​ດອນ ຮອງ​ນາ​ຍົກ​ລັດ​ຖະ​ມົນ​ຕີ, ລັດ​ຖະ​ມົນ​ຕີ​ກະ​ຊວງ​ແຜນ​ການ ແລະ ການ​ລົງ​ທຶນ ໄດ້​ຂຶ້ນ​ທາບ​ທາ​ມ​ຮ່າງ​ບົດ​ລາຍ​ງານ​ການ​ຈັ​ດ​ຕັ້ງ​ປະ​ຕິ​ບັດ​ແຜ​ນ​ພັດ​ທະ​ນາ​ເສດ​ຖະ​ກິ​ດ-ສັງ​ຄົມ 5 ປີ ຄັ້ງ​ທີ VIII, ແຜນ​ງົບ​ປະ​ມານ​ແຫ່ງ​ລັດ 5 ປີ (2016-2020) ແລະ ຜ່ານຮ່າງ​ແຜນ​ພັດ​ທະ​ນາ​ເສ​ດ​ຖະ​ກິ​ດ-ສັງ​ຄົມ 5 ປີ ຄັ້ງ​ທີ IX (2021-2025) ແລະ ແຜນ​ງົບ​ປະ​ມານ​ແຫ່ງ​ລັດ 5 ປີ (2021-2025); ນ​ອກ​ນັ້ນ, ຍັງ​ໄດ້​ຮັບ​ຟັງ​ກ່ຽວ​ກັບ​ບົດ​ລາຍ​ງານ​ຜົນ​ການກວດ​ສ​ອບບົດ​ສະ​ຫລຸບ​ຂ​າດ​ຕົວ​ການ​ຈັ​ດ​ຕັ້ງ​ປະ​ຕິ​ບັດ​ແຜນ​ງົບ​ປະ​ມານ​ແຫ່ງ​ລັດ ປ​ະ​ຈໍາ​ປີ 2019, ​ບົດ​ລາຍ​ງານການກວດ​ກາ​ຜົນ​ການກວດ​ສ​ອບບົດ​ສະ​ຫລຸບ​ຂ​າດ​ຕົວ​ການ​ຈັ​ດ​ຕັ້ງ​ປະ​ຕິ​ບັດ​ແຜນ​ງົບ​ປະ​ມານ​ແຫ່ງ​ລັດອີກ​ດ້ວຍ.

ຫລັງ​ຈາກນັ້ນ, ຕາງໜ້າຄະນະປະຈຳສະພາແຫ່ງຊາດ ທ່ານ ບຸນ​ປ​ອນ ບຸ​ດ​ຕະ​ນະ​ວົງ ຮອງປະທານ ສ​ພ​ຊ ​ໄດ້ມີຄໍາເຫັນຕໍ່ບົດລາຍ​ງານ​ຂອງລັດຖະບານ, ອົງ​ການກວດ​ສອບ​ແຫ່ງ​ລັດ ກ່ຽວ​ກັ​ບຜົນ​ການກວດ​ສອບ ແລະ ອົງ​ການກວດ​ກາ​ລັດ​ຖະ​ບານ ກ່ຽວ​ກັບ​ການກວດ​ກາ​ຕາມ​ຜົນ​ການກວດ​ສອບ; ພ້ອມນັ້ນ, ປະ​ທານກອງ​ປະ​ຊຸມ​ໄດ້​ມີ​ຄໍາ​ຖາມ​ເຈາະ​ຈີ້​ມ ໃຫ້ທິດຊີ້ນຳໃນການຄົ້ນຄວ້າປະກອບຄຳເຫັນ ແລະ ​ບັນ​ດາທ່ານ​ ສ​ສ​ຊ ​ກໍ​ໄດ້​ປະ​ກອບ​ຄຳ​ຄິດ​ຄຳ​ເຫັນ ແລະ ຕັ້ງ​ຄຳ​ຖາມ​ເຈາ​ະ​ຈີ​້ມ​ລັດ​ຖະ​ບານຢ່າງ​ກົງ​ໄປ​ກົງ​ມາ ​ແນ​ໃສ່​ປົກ​ປ​້ອງ​ສິດ ແລະ ຜົນ​ປະ​ໂຫຍດ​ຂອງ​ປະ​ຊ​າ​ຊົນ​ບັນ​ດາ​ເຜົ່າຢ່າງ​ແທ້​ຈິງ.

ກອງປະຊຸມສະໄໝສາມັນເທື່ອທີ 10 ຂອງ ສ​ພ​ຊ ຊຸດທີ VIII ຈະດໍາເນີນໄປຈົນຮອດວັນທີ 17 ພະຈິກ 2020, ຍັງ​ຈະ​ໄດ້​ສຸມ​ໃສ່​ຄົ້ນ​ຄ​ວ້າ, ຕົກ​ລົງ​ບັນ​ຫາ​ສ​ໍາຄັນ​ຂອງ​ຊາດ ແລະ ພິຈາລະນາຮັບຮອງເອົາຮ່າງກົດໝາຍ ຈໍານວນ​ໜຶ່ງ.  ໃນ​ໄລ​ຍະ​ກອງ​ປະ​ຊຸມ ​ຍັງໄດ້ຈັດຕັ້ງໜ່ວຍງານຮັບຜິດຊອບໂທລະສັບສາຍດ່ວນ ເປີດຮັບເອົາຄຳຄິດຄຳເຫັນ ແລະ ຄຳສະເໜີໂດຍກົງຈາກທົ່ວສັງຄົມໃນ​ໂມງ​ລັດ​ຖະ​ການ ດ້ວຍໂທລະສັບໝາຍເລກ 156 ໂດຍບໍ່ໄດ້ເສຍຄ່າ, ໂທລະສານໝາຍເລກ 021 413528 ຫລື ສົ່ງເປັນຈົດໝາຍທາງໄປສະນີ ຕູ້ ປນ. 662 ແລະ ສົ່ງ​ອີ​ເມວ [email protected] ເຊິ່ງ​ບັນ​ດາ​ທ່ານ​ສາ​ມາດ​ສົ່ງ​ມາ​ໄດ້​ຈົນເຖິງວັນທີ 16 ພະ​ຈິກ 2020.

ແຫຼ່ງຂ່າວທີ່ມາ: ສະພາແຫ່ງຊາດ