(ສພຊ) ເພື່ອແລກປ່ຽນບົດຮຽນກ່ຽວກັບວຽກງານສະພາແຫ່ງຊາດ ແລະ ສະພາປະຊາຊົນຂັ້ນແຂວງ ກັບສະພາແຫ່ງຊາດ ສສ.ຫວຽດນາມ ເຊິ່ງເປັນຜູ້ທີ່ມີບົດຮຽນ ແລະ ພຶດຕິກຳຕົວຈິງໃນການຈັດຕັ້ງປະຕິບັດຜ່ານມາຫຼາຍແລ້ວ ເພື່ອນຳມາປັບປຸງໃນການເຄື່ອນໄຫວວຽກງານຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງຂອງ ສປປລາວ. ໃນວັນທີ 27 ກຸມພາ 2023 ຄະນະຜູ້ແທນສະພາແຫ່ງຊາດລາວ ນຳໂດຍສະຫາຍ ຄຳໃບ ດຳລັດ ກຳມະການສູນກາງພັກ, ຮອງປະທານສະພາແຫ່ງຊາດ ພ້ອມດ້ວຍຄະນະ ໄດ້ສືບຕໍ່ພົບປະ ແລະ ເຮັດວຽກກັບຄະນະສະມາຊິກສະພາປະຊາຊົນນະຄອນຫຼວງຮ່າໂນ້ຍ ສສ.ຫວຽດນາມ ເຊິ່ງນຳໂດຍສະຫາຍ ຫງວຽນ ງ໋ອກ ຕວນ ຮອງເລຂາຄະນະພັກນະຄອນ, ປະທານສະພາປະຊາຊົນນະຄອນຫຼວງຮ່າໂນ້ຍ ພ້ອມດ້ວຍຄະນະ ເຊິ່ງທັງສອງຝ່າຍໄດ້ແລກປ່ຽນນຳກັນ ກ່ຽວກັບວຽກງານກົງຈັກຂອງສະພາປະຊາຊົນນະຄອນຫຼວງຮ່າໂນ້ຍ, ສະພາປະຊາຊົນຂັ້ນເມືອງ; ວຽກງານການເລືອກຕັ້ງສະມາຊິກສະພາປະຊາຊົນນະຄອນຫຼວງຮ່າໂນ້ຍ; ການປະເມີນຜົນຕໍ່ການປະຕິບັດໜ້າທີ່ ບຸກຄະລາກອນດຳລົງຕຳແໜ່ງ ທີ່ສະພາປະຊາຊົນເລືອກຕັ້ງ ແລະ ຮັບຮອງເອົາການແຕ່ງຕັ້ງ; ການປະເມີນຜົນຕໍ່ຄວາມຮັບຜິດຊອບໃນການປະຕິບັດໜ້າທີ່ຂອງສະມາຊິກສະພາປະຊາຊົນ; ການປະເມີນນະໂຍບາຍຕໍ່ສະມາຊິກສະພາແຫ່ງຊາດ ແລະ ສະພາປະຊາຊົນນະຄອນຫຼວງຮ່າໂນ້ຍ.

ໂອກາດນີ້, ສະຫາຍ ຄຳໃບ ດຳລັດ ໄດ້ມີຄຳເຫັນໃນກອງປະຊຸມວ່າ: ການມາຢ້ຽມຢາມ ຂອງຄະນະໃນຄັ້ງນີ້, ແມ່ນປະຕິບັດຕາມບົດບັນທຶກການຮ່ວມມື ລະຫວ່າງ ສະພາແຫ່ງຊາດ ແຫ່ງ ສປປລາວ ແລະ ສະພາແຫ່ງຊາດ ແຫ່ງ ສສ.ຫວຽດນາມ ເຊິ່ງສອງຝ່າຍ ສືບຕໍ່ເພີ່ມທະວີສາຍພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງຝ່າຍ ແລະ ບັນດາອົງການຈັດຕັ້ງທີ່ກ່ຽວຂ້ອງ ໃນການເຄື່ອນໄຫວແບບທະວິພາຄີ ແລະ ພະຫຸພາຄີ (ທາງກວ້າງ ແລະ ທາງເລິກ), ໃນນັ້ນ ແຕ່ລະປີ ສອງຝ່າຍ ພ້ອມກັນສ້າງແຜນການຮ່ວມມື ແລະ ປະສານສົມທົບກັນ ຈັດຕັ້ງປະຕິບັດກິດຈະກໍາການເຄື່ອນໄຫວຕົວຈິງນໍາກັນ ເພື່ອຮັບປະກັນປະສິດທິພາບ ແລະ ປະສິດທິຜົນ. ສະເພາະຫົວຂໍ້ແລກປ່ຽນໃນການມາຢ້ຽມຢາມແລກປ່ຽນໃນຄັ້ງນີ້ ແມ່ນລົງເລິກກ່ຽວກັບວຽກງານກົງຈັກ, ບຸກຄະລາກອນຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ, ການເລືອກຕັ້ງສະມາຊິກສະພາແຫ່ງຊາດ, ສະມາຊິກສະພາປະຊາຊົນຂັ້ນແຂວງ, ການປະເມີນບຸກຄະລາກອນທີ່ ສະພາແຫ່ງຊາດ ແລະ ສະພາປະຊາຊົນຂັ້ນແຂວງເລືອກຕັ້ງ ແລະ ຮັບຮອງເອົາການແຕ່ງຕັ້ງ ເຊິ່ງກ່ອນໜ້ານີ້ ຄະນະແມ່ນໄດ້ເຄື່ອນໄຫວຢູ່ ແຂວງກວາງນາມ ເຊິ່ງເປັນແຂວງທີ່ມີ ສະຫາຍ ເລຂາຄະນະພັກແຂວງ ເປັນປະທານສະພາປະຊາຊົນແຂວງ, ມີສະພາປະຊາຊົນຂັ້ນເມືອງ ແລະ ຂັ້ນຕາແສງ ແລະ ໄດ້ສືບຕໍ່ເຮັດວຽກຢູ່ ນະຄອນດານັງ ເຊິ່ງແມ່ນສະຫາຍ ຮອງເລຂາຄະນະພັກນະຄອນດານັງ ເປັນປະທານສະພາປະຊາຊົນຂັ້ນແຂວງ, ແຕ່ບໍ່ມີສະພາປະຊາຊົນຂັ້ນເມືອງ; ການໄປເຄື່ອນໄຫວເຮັດວຽກຢູ່ ສສ.ຫວຽານາມ ໃນຄັ້ງນີ້ ແມ່ນໄດ້ຮັບການຕ້ອນຮັບຢ່າງອົບອຸ່ນ, ສະໜິດສະໜົມ ໃນຖານເພື່ອນມິດສະຫາຍທີ່ຮັກແພງ ແລະ ກໍໄດ້ຮັບຟັງການລາຍງານຈາກພາກສ່ວນຕ່າງໆດ້ວຍຄວາມຈິງໃຈ, ຄະນະຜູ້ແທນ ໄດ້ມີຄໍາເຫັນເຈາະຈີ້ມ, ແລກປ່ຽນບົດຮຽນເຊິ່ງກັນ ແລະ ກັນ ໂດຍລວມແມ່ນມີບັນຍາກາດທີ່ດີຫຼາຍ.

ພ້ອມນັ້ນ, ຄະນະ ຍັງໄດ້ຮັບການຕ້ອນຮັບຈາກສະຫາຍ ນາງ ຫງວຽນ ທິ ຕຽນ ກຳມະການສູນກາງພັກ, ຮອງເລຂາຜູ້ປະຈຳການຄະນະພັກນະຄອນຫຼວງຮ່າໂນ້ຍ ພ້ອມດ້ວຍຄະນະ, ຢ້ຽມຢາມສະຖານທີ່ທ່ຽວທ່ອງວັດທະນະທຳໃນນະຄອນຫຼວງຮ່າໂນ້ຍຕື່ມອີກ.