(ສພຊ) – ເພື່ອເປັນເອກະພາບກະກຽມໃຫ້ແກ່ກອງປະຊຸມຄົບຄະນະກຳມະການລະດັບຊາດປັບປຸງລັດຖະທຳມະນູນ ສະບັບປີ 2015 (ຄລຊ) ໃນທ້າຍເດືອນສິງຫານີ້; ຕອນບ່າຍວັນທີ 12 ສິງຫາ 2024 ທີ່ສະພາແຫ່ງຊາດ (ສພຊ) ໄດ້ມີກອງປະຊຸມແລກປ່ຽນຄວາມເຫັນກ່ຽວກັບໂຄງສ້າງລັດຖະທຳມະນູນສະບັບປັບປຸງໃໝ່ ໂດຍການເປັນປະ ທານຂອງທ່ານ ສຈ. ປອ. ຈະເລີນ ເຍຍປາວເຮີ ຮອງປະທານສະພາແຫ່ງຊາດ, ຮອງປະທານ ຜູ້ປະຈຳການຄະນະກຳມະ ການລະດັບຊາດປັບປຸງລັດຖະທຳມະນູນ; ມີບັນດາທ່ານກຳມະການ ຄລຊ, ຄະນະອະນຸກຳມະການຕ່າງໆ ແລະ ກອງເລ ຂາ ພ້ອມດ້ວຍຊ່ຽວຊານ, ພະນັກງານອາວຸໂສບຳນານຂອງ ສພຊ ເຂົ້າຮ່ວມຢ່າງພ້ອມພຽງ.

ທ່ານ ສຈ. ປອ. ຈະເລີນ ເຍຍປາວເຮີ ໄດ້ລາຍງານໃຫ້ຮູ້ວ່າ: ເລີ່ມແຕ່ວັນທີ 20 ມິຖຸນາ ຫາ 30 ກໍລະກົດ 2024 ຄະນະກຳມະການລະດັບຊາດປັບປຸງລັດຖະທຳມະນູນ ໄດ້ດຳເນີນກອງປະຊຸມປະເມີນຜົນການຈັດຕັ້ງປະຕິບັດລັດຖະທຳມະນູນ ສະບັບປີ 2015 ໃນຂອບເຂດທົ່ວປະເທດ ເຊິ່ງມີພະນັກງານນຳພາ-ຄຸ້ມຄອງຂັ້ນກະຊວງ-ອົງການຂັ້ນສູນກາງ, ແຂວງ-ນະຄອນຫຼວງ ແລະ ຂັ້ນເມືອງ ເຂົ້າຮ່ວມຈຳນວນ 11,567 ທ່ານ ຍິງ 2,011 ທ່ານ ເຊິ່ງເປັນຄັ້ງທຳອິດໃນການປະເມີນຜົນການຈັດຕັ້ງປະຕິບັດລັດຖະທຳມະນູນທີ່ມີພະນັກງານນຳພາ-ຄຸ້ມຄອງເຂົ້າຮ່ວມຢ່າງຫຼວງຫຼາຍ; ນອກຈາກການປະກອບຄຳເຫັນຕີລາຄາການຈັດຕັ້ງປະຕິບັດລັດຖະທຳມະນູນ ສະບັບປີ 2015 ຢູ່ແຕ່ລະຂົງເຂດ ແຕ່ລະທ້ອງຖິ່ນແລ້ວ, ຜູ້ເຂົ້າຮ່ວມຍັງໄດ້ສະເໜີຄຳເຫັນຫຼາກຫຼາຍຕໍ່ການປັບປຸງເນື້ອໃນຂອງລັດຖະທຳມະນູນ ສະບັບປີ 2015 ໃນນີ້, ມີຄຳເຫັນສະເໜີໃຫ້ປັບປຸງສັບຊ້ອນຄືນໂຄງສ້າງຂອງລັດຖະທຳມະນູນ ໃຫ້ເປັນລະບົບໂລຊິກ ແລະ ວິທະຍາ ສາດກວ່າເກົ່າ.

ໃນກອງປະຊຸມ, ໄດ້ຮັບຟັງບົດສະເໜີໂຄງຮ່າງ, ໂຄງສ້າງຂອງລັດຖະທໍາມະນູນສະບັບປັບປຸງ ໂດຍທ່ານ ປອ. ກອງແກ້ວ ໄຊສົງຄາມ ຫົວໜ້າສະຖາບັນວິທະຍາສາດເສດຖະກິດ ແລະ ສັງຄົມແຫ່ງຊາດ, ຄະນະກໍາມະການລະດັບຊາດປັບປຸງລັດຖະທໍາມະນູນ ທັງເປັນຮອງຫົວໜ້າອະນຸກໍາມະການເນື້ອໃນ; ພ້ອມນັ້ນ, ຍັງໄດ້ຮັບຟັງການສະເໜີບົດ ຮຽນການປັບປຸງລັດຖະທໍາມະນູນຂອງຕ່າງປະເທດ ເປັນຕົ້ນ ສປຈີນ, ສ.ລັດເຊຍ, ສປປເກົາຫຼີ, ລາຊະອານາຈັກໄທ… ຫຼັງຈາກນັ້ນ, ຜູ້ເຂົ້້າຮ່ວມກໍໄດ້ຄົ້ນຄວ້າ ແລະ ປະກອບຄຳເຫັນທີ່ເປັນປະໂຫຍດຕໍ່ໂຄງສ້າງລັດຖະທຳມະນູນສະບັບປັບປຸງ ໃໝ່.
(ນາງ ອາລິນ ສຸພິມມະປະດິດ)