ໃນຕອນເຊົ້າຂອງວັນທີ 15 ສິງຫາ 2022 ນີ້ ແຂວງຈໍາປາສັກ ຈັດພິທີປາຖະກະຖາ ວັນສ້າງຕັ້ງລັດຖະທໍາມະນູນ ຄົບຮອບ 31 ປີ (15 ສິງຫາ 1991-15 ສິງຫາ 2022) ຂື້ນ ຢູ່ທີ່ສະໂມສອນຂອງແຂວງ ໂດຍການໃຫ້ກຽດເປັນປະທານ ແລະ ບັນລະຍາຍເອກະສານຂອງ ທ່ານ ສາຍທອງ ໄຊຍະວົງ ຮອງເລຂາພັກແຂວງ ປະທານສະພາປະຊາຊົນແຂວງຈໍາປາສັກ ມີບັນດາທ່ານ ຄະນະປະຈໍາພັກແຂວງ, ກໍາມະການພັກແຂວງ, ສະມາຊິກສະພາແຫ່ງຊາດ, ສະມາຊິກສະພາປະຊາຊົນແຂວງ, ການນໍາ ແລະ ພະນັກງານຫຼັກແຫຼງຈາກພະແນກການ-ກົມກອງ ແລະ ສະຖາບັນການສຶກສາ ທົ່ວແຂວງຈໍາປາສັກ ເຂົ້າຮ່ວມ 300 ກວ່າຄົນ.
ໃນພິທີ, ທ່ານ ສາຍທອງ ໄຊບະວົງ ໄດ້ບັນລະຍາຍເອກະສານປະຖະກະຖາ ເຊິ່ງທ່ານໄດ້ເລົ່າຄືນປະຫວັດຄວາມເປັນມາຂອງການກໍາເນີດລັດຖະທໍາມະນູນ ແຫ່ງ ສປປ ລາວ, ຍົກໃຫ້ເຫັນຄວາມໝາຍຄວາມສໍາຄັນ, ສະພາບການຈັດຕັ້ງປະຕິບັດລັດຖະທໍາມະນູນ, ກົດໝາຍ ແລະ ນິຕິກໍາໃຕ້ກົດໝາຍ ເຊິ່ງເຫັນໄດ້ໝາກຜົນຜົນງານດ້ານດີ ແລະດ້ານອ່ອນຂໍ້ຄົງຄ້າງ ທີ່ທຸກພາກສ່ວນຈະຕ້ອງໄດ້ເພີ່ມທະວີການຈັດຕັ້ງປະຕິບັດລັດຖະທຳມະນູນ ແລະ ກົດໝາຍຕ່າງໆໃຫ້ເຂັ້ມງວດ ແລະ ມີປະສິດທິຜົນ. ໃນໂອກາດດັ່ງກ່າວ, ທ່ານ ສາຍທອງ ໄຊຍະວົງ ປະທານສະພາປະຊາຊົນແຂວງ ໄດ້ຮຽກຮອງ 8 ບັນຫາໃຫຍ່ ເພື່ອໃຫ້ທຸກພັກສ່ວນ, ທຸກຂົງເຂດວຽກງານທັງພາກລັດ-ເອກະຊົນ ແລະ ທົ່ວສັງຄົມ ຈົ່ງພ້ອມກັນເພີ່ມທະວີການຈັດຕັ້ງປະຕິບັດລັດຖະທຳມະນູນ ແລະ ກົດໝາຍຕ່າງໆໃຫ້ເຂັ້ມງວດ ແລະ ມີປະສິດທິຜົນ ຄື:
- ເພີ່ມທະວີການໂຄສະນາສຶກສາອົບຮົມດ້ວຍຫຼາຍຮູບ, ຫຼາຍວິທີ ໂດຍຜ່ານຫຼາຍພາຫະນະເພື່ອເຮັດໃຫ້ພົນລະເມືອງລາວ ໄດ້ຮັບຮູ້ເຂົ້າໃຈທີ່ຖືກຕ້ອງ ຕໍ່ຄວາມໝາຍຄວາມສໍາຄັນ ແລະ ເນື້ອໃນຂອງລັດຖະທໍາມະນູນ ແລະ ກົດໝາຍຕ່າງໆ ເພື່ອສ້າງເງື່ອນໄຂໃຫ້ເຂົາເຈົ້າສາມາດເຂົ້າເຖິງການນໍາໃຊ້ລັດຖະທໍາມະນູນ ແລະ ກົດໝາຍ ແລະ ສ້າງສະຕິຕື່ນຕົວໃນການປະຕິບັດລັດຖະທໍາມະນູນ ແລະ ກົດ ໝາຍ ເປັນຕົ້ນ ແມ່ນໃຫ້ມີຄວາມຕື່ນຕົວສະໝັກໃຈປະຕິບັດສິດ ແລະ ພັນທະຂອງຕົນໃຫ້ຖືກຕ້ອງ ແລະ ຄົບຖ້ວນ ຕາມທີ່ໄດ້ກໍານົດໄວ້ໃນລັດຖະທໍາມະນູນ; ປະຕິບັດສິດໃນການຕິດຕາມ ກວດກາການເຄື່ອນໄຫວປະຕິບັດລັດຖະທໍາມະນູນ ແລະ ກົດໝາຍ ຂອງບັນດາອົງການອໍານາດລັດຂັ້ນຕ່າງໆ.
- ບັນດາອົງການທີ່ມີສິດອໍານາດ ໃຫ້ເອົາໃຈໃສ່ຍົກສູງຄວາມຮັບຜິດຊອບ ແລະ ຄວາມເປັນເຈົ້າ
ການໃນການສືບຕໍ່ຄົ້ນຄວ້າຫັນເນື້ອໃນລັດຖະທໍາມະນູນ ເປັນກົດໝາຍ ແລະ ນິຕິກໍາໃຕ້ກົດໝາຍໃນຂົງ
ເຂດຄວາມຮັບຜິດຊອບຂອງຕົນ ເປັນຕົ້ນ ສຸມໃສ່ຈັດຕັ້ງປະຕິບັດແຜນການສ້າງ ແລະ ປັບປຸງກົດໝາຍ 5 ປີ (2021-2026)ໃຫ້ມີຄຸນນະພາບສູງຂື້ນ, ຮັດກຸມ ແລະ ທັນເວລາ. ສໍາລັບສະພາປະຊາຊົນແຂວງໃຫ້ເອົາໃຈໃສ່ຄົ້ນຄວ້າສ້າງ ແລະ ປັບປຸງນິຕິກໍາຕ່າງໆ ທີ່ມີຄວາມຈໍາເປັນເພື່ອປະກາດໃຊ້ ແນໃສ່ເຮັດໃຫ້ເຄື່ອງມືຄຸ້ມຄອງລັດ, ຄຸ້ມຄອງເສດຖະກິດ – ສັງຄົມດ້ວຍກົດໝາຍ ຢູ່ທ້ອງຖິ່ນຂອງຕົນ ມີຄວາມຖືກຕ້ອງ, ເປັນລະບົບ ແລະ ຄົບຖ້ວນເປັນກ້າວໆ, ຮັບປະກັນການປົກປ້ອງສິດ ແລະ ຜົນປະໂຫຍດອັນຊອບທໍາຂອງປະຊາຊົນບັນດາເຜົ່າ.
- ເພີມທະວີການບໍລິຫານລັດດ້ວຍລັດຖະທໍາມະນູນ ແລະ ກົດໝາຍ ໃຫ້ມີປະສິດທິພາບ, ປະສິດທິຜົນສູງກວ່າເກົ່າ ເປັນຕົ້ນໃຫ້ສືບຕໍ່ຈັດຕັ້ງປະຕິບັດມະຕິຂອງຄະນະບໍລິຫານງານສູນກາງພັກສະ ໄໝທີ X ສະບັບເລກທີ 037/ຄບສພ, ລົງວັນທີ 20 ມິຖຸນາ 2018 ວ່າດ້ວຍການຍົກສູງປະສິດທິພາບໃນການຄຸ້ມຄອງລັດ, ຄຸ້ມຄອງສັງຄົມດ້ວຍກົດໝາຍ ຕາມຂົງເຂດຄວາມຮັບຜິດຊອບຂອງພະແນກການ-ກົມກອງອ້ອມຂ້າງແຂວງ, ອົງການປົກຄອງແຕ່ລະຂັ້ນ. ພ້ອມກັນນີ້, ກໍໃຫ້ເອົາໃຈໃສ່ກວດກາ ແລະ ແກ້ໄຂຢ່າງເຂັ້ມງວດຕໍ່ບັນດາປະກົດການຫຍໍ້ທໍ້ໃນການລົງທຶນທີ່ພົວພັນເຖິງການປະຕິບັດກົດໝາຍໃນຂົງເຂດ ແລະ ຂະແໜງການຕ່າງໆ ເຊັ່ນ: ຂົງເຂດລາຍຮັບ-ລາຍຈ່າຍງົບປະມານ, ເງິນຕາ, ທີ່ດິນ, ປ່າໄມ້, ບໍ່ແຮ່, ໄຟຟ້າ ແລະ ອື່ນໆ; ເອົາໃຈໃສ່ກວດກາ ແລະ ຈັດຕັ້ງປະຕິບັດກົນໄກການລົງທຶນຜ່ານປະຕູດຽວ, ການແບ່ງງານ ແລະ ແບ່ງຄວາມຮັບຜິດຊອບ ລະຫວ່າງຂະແໜງການສູນກາງ ແລະ ທ້ອງຖິ່ນ ຕາມທິດສາມສ້າງໃຫ້ເປັນຮູບປະທໍາ.
- ເພີ່ມທະວີວຽກງານກວດກາການຈັດຕັ້ງປະຕິບັດລັດຖະທໍາມະນູນ ແລະ ກົດໝາຍ, ປັບປຸງຄຸນນະພາບໃນການເຄື່ອນໄຫວປະຕິບັດລັດຖະທໍາມະນູນ ແລະ ກົດໝາຍຂອງສານປະຊາຊົນ ອົງການໄອຍະການປະຊາຊົນ ກໍຄືເຈົ້າໜ້າທີ່ສືບສວນ-ສອບສວນທຸກພາກສ່ວນ,ສືບຕໍ່ຈັດຕັ້ງປະຕິບັດມະຕິກົມການເມືອງ ສູນກາງພັກ ສະບັບເລກທີ 112/ກມສພ, ລົງວັນທີ 02 ມິຖຸນາ 2020 ວ່າດ້ວຍການຍົກສູງຄຸນນະພາບໃນການດໍາເນີນຄະດີຂະບວນຍຸຕິທໍາ ໃຫ້ມີປະສິດພາບ, ປະສິດທິຜົນສູງຂື້ນ; ເດັດດ່ຽວແກ້ໄຂຄະດີຄວາມຕ່າງໆ ໃຫ້ຖືກຕ້ອງຕາມກົດໝາຍ ແລະ ຄວາມເປັນຈິງ ພ້ອມທັງຈັດຕັ້ງປະຕິບັດຄໍາຕັດສິນໃຊ້ໄດ້ເດັດຂາດຂອງສານໃຫ້ສິ້ນສຸດ ແລະ ມີຄວາມສະຫງົບຕາມມາດຕາ 98 ຂອງລັດຖະທໍາມະນູນແຫ່ງ ສປປ ລາວ; ເອົາໃຈໃສ່ບໍາລຸງສ້າງຄຸນທາດການເມືອງ, ຄຸນສົມບັດສິນທໍາປະຕິວັດ ກໍຄືຈັນຍາບັນ ແລະ ຈັນຍາທໍາຮັບໃຊ້ປະຊາຊົນຂອງຜູ້ພິພາກສາສານປະຊາຊົນ, ພະນັກງານໄອຍະການ, ເຈົ້າໜ້າທີ່ສືບສວນ-ສອບສວນທຸກພາກສ່ວນ, ພະນັກງານປະຕິບັດຄໍາຕັດສິນຂອງສານ, ແກ້ໄຂຢ່າງເຂັ້ມງວດ ແລະ ເດັດຂາດຕໍ່ຜູ້ທີ່ບໍ່ສັດຊື່, ສວຍໃຊ້ໜ້າທີ່ຮັບສິນບົນ ແລະ ມີການກະທໍາລະເມີດກົດໝາຍໃຫ້ທັນການ.
- ສືບຕໍ່ຍູ້ແຮງຂະບວນການແຂ່ງຂັນຮັກຊາດ ແລະ ພັດທະນາ, ສ້າງບ້ານແບບຢ່າງໃນການພັດທະນາຮອບດ້ານ ແລະ ລຶບລ້າງຄວາມທຸກຍາກ, ສ້າງຄອບຄົວ ແລະ ບ້ານແບບຢ່າງໃນການຍົກສູງສະຕິເຄົາລົບແລະ ປະຕິບັດລັດຖະທໍາມະນູນ ແລະ ກົດໝາຍ, ບ້ານວັດທະນະທໍາ, ບ້ານປອດຢາເສບຕິດ, ບ້ານສາມັກຄີປອງດອງ ແລະ ບ້ານແບບຢ່າງໃນດ້ານອື່ນໆ ໃຫ້ເປັນຂະບວນການທີ່ແຂງແຮງ, ຕໍ່ເນື່ອງ ຕິດພັນກັບການປັບປຸງ ແລະ ຍົກສູງຄຸນນະພາບຂອງລະບົບການເມືອງຢູ່ຂັ້ນຮາກຖານ, ຮັບປະກັນການປະຕິບັດລັດຖະທໍາມະນູນ ແລະ ກົດໝາຍ, ປົກປ້ອງສິດ ແລະ ຜົນປະໂຫຍດອັນຊອບທໍາຂອງກໍາມະກອນ, ຊາວກະສິກອນ ແລະ ປະຊາຊົນບັນດາເຜົ່າຢູ່ຂັ້ນຮາກຖານ.
- ຍົກສູງບົດບາດເປັນແບບຢ່າງນໍາໜ້າຂອງພະນັກງານ, ສະມາຊິກພັກ ເປັນຕົ້ນ ແມ່ນພະນັກງານ
ນໍາພາ ແລະ ຄຸ້ມຄອງ ໃນການເຄົາລົບ ແລະ ປະຕິບັດລັດຖະທໍາມະນູນ ແລະ ກົດໝາຍຕາມທິດຊີ້ນໍາທີ່ວ່າ: “ ພັກຍາມໃດກໍຕ້ອງເຄົາລົບລັດຖະທໍາມະນູນ ແລະ ກົດໝາຍຂອງລັດ”, ເດັດດ່ຽວສະກັດກັ້ນ ແລະ ແກ້ໄຂ ປະກົດການຫຍໍ້ທໍ້ຕ່າງໆໃນຖັນແຖວພະນັກງານ, ສະມາຊິກພັກເຊັ່ນ: ພະຍາດອາດຍາສິດ, ສວຍໃຊ້ອໍານາດແນວຄິດອິດສະຫຼະເສລີ, ສໍ້ລາດບັງຫຼວງ ແລະ ການປະພຶດອື່ນທີ່ເປັນການລ່ວງລະເມີດກົດ ໝາຍ ແລະ ສິດເປັນເຈົ້າຂອງປະຊາຊົນ.
- ໃຫ້ສະພາປະຊາຊົນຂັ້ນແຂວງ, ອົງການປົກປ້ອງກົດໝາຍ ແລະ ອົງການປົກຄອງທ້ອງຖິ່ນ ທຸກຂັ້ນ ສະຫຼຸບຕີລາຄາການຈັດຕັ້ງປະຕິບັດລັດຖະທໍາມະນູນ ແລະ ກົດໝາຍ ໃນໄລຍະ 31 ປີ ທີ່ຜ່ານມາ ແລະ ກໍານົດທິດທາງຈັດຕັ້ງປະຕິບັດໃນຕໍ່ໜ້າຕາມຂອບເຂດຄວາມຮັບຜິດຊອບຂອງຕົນ, ຕາມຈິດໃຈເນື້ອໃນຄໍາແນະນໍາຂອງຄະນະປະຈໍາສະພາແຫ່ງຊາດສະບັບເລກທີ 08/ຄປຈ, ລົງວັນທີ 14 ກໍລະກົດ 2021 ວ່າດ້ວຍການສະເຫຼີມສະຫຼອງວັນລັດຖະທໍາມະນູນແຫ່ງຊາດຄົບຮອບ 30 ປີ (15 ສິງຫາ 1991-15 ສິງຫາ 2021).
- ສືບຕໍ່ປຸກລະດົມໃນທົ່ວອົງຄະນະພັກ, ອົງການປົກຄອງ, ທົ່ວກໍາລັງປະກອບອາວຸດ ແລະ ປວງຊົນບັນດາເຜົ່າໃນທົ່ວແຂວງ ເພີ່ມທະວີນ້ຳໃຈຮັກຊາດ, ນ້ຳໃຈເຈົ້າຂອງປະເທດຊາດ, ຄວາມສາມັກຄີເປັນປຶກແຜ່ນລະຫວ່າງເຜົ່າຕ່າງໆພາຍໃນຊາດ, ນ້ຳໃຈເປັນເຈົ້າຕົນເອງເພິ່ງຕົນເອງ ສ້າງຄວາມເຂັ້ມແຂງດ້ວຍຕົນເອງ, ບຸກບື່ນຜ່ານຜ່າຄວາມຫຍຸ້ງຍາກ, ຕັ້ງໜ້າປະກອບສ່ວນເຂົ້າໃນການປະຕິບັດມະຕິກອງປະຊຸມໃຫຍ່ ຄັ້ງທີ XI ຂອງພັກ, ແຜນພັດທະນາເສດຖະກິດ-ສັງຄົມ 5 ປີ ແຫ່ງຊາດ ຄັ້ງທີ IX ກໍຄືມະຕິຂອງອົງຄະນະພັກແຂວງ ຄັ້ງທີ 8 ແລະ ແຜນພັດທະນາເສດຖະກິດ-ສັງຄົມຂອງແຂວງ. ໃນນີ້, ໃຫ້ສຸມທຸກກໍາລັງແຮງ ແລະ ສະຕິປັນຍາຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫ້ຍຸງຍາກທາງດ້ານເສດຖະກິດ-ການເງິນ ແລະ ວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດໃຫ້ປະກົດເປັນຈິງ. ພ້ອມກັນປະຕິບັດລັດຖະທໍາມະນູນ ແລະ ກົດໝາຍໃຫ້ເຂັ້ມງວດ, ສັກສິດ, ສືບຕໍ່ປະກອບສ່ວນຢ່າງສົມກຽດເຂົ້າໃນການປະຕິບັດພາລະກິດປົກປັກຮັກສາ ແລະ ສ້າງສາປະເທດໄປຕາມຈຸດໝາຍທີ່ພັກ ແລະ ລັດເຮົາໄດ້ວາງໄວ້.
ໃນຕອນທ້າຍ, ທ່ານປະທານສະພາປະຊາຊົນແຂວງຈໍາປາສັກ ໃນນາມຕາງໜ້າຄະນະພັກ-ອົງການປົກຄອງແຂວງຈໍາປາສັກ ໄດ້ສະແດງຄວາມຂອບໃຈ ແລະ ອວຍພອນໄຊອັນປະເສີດຕໍ່ບັນດາທ່ານໃນຄະນະປະຈຳພັກແຂວງ, ກຳມະການພັກແຂວງ, ສະມາຊິກສະພາແຫ່ງຊາດ, ສະມາຊິກສະພາປະຊາຊົນແຂວງ ຕະຫລອດຮອດບັນດາທ່ານບັນດາສະຫາຍ ແລະ ພໍ່ແມ່ປະຊາຊົນລາວທົ່ວສັງຄົມ ຈົ່ງມີສຸຂະພາບເຂັ້ມແຂງ-ແຂງແຮງ ແລະ ຜົນສຳເລັດໃນໜ້າທີ່ການງານທຸກປະການ.