ວັນທີ 2 ພະຈິກ 2022 ນີ້, ຢູ່ທີ່ຫ້ອງຮັບຮອງສະໂມສອນແຂວງສາລະວັນ ທ່ານ ບຽມບາຊູເຣນ ຈຳສຣັງ ເອກອັກຄະລັດຖະທູດວິສາມັນ ຜູ້ມີອຳນາດເຕັມແຫ່ງປະເທດມົງໂກລີ ປະຈຳລາວ ແລະ ທ່ານ ພົຕ ປອ ວົງສັກ ຈັນທະວົງ ຄະນະປະຈໍາສະພາແຫ່ງຊາດ ປະທານກຳມາທິການປ້ອງກັນຊາດ-ປ້ອງກັນຄວາມສະຫງົບ ສະພາແຫ່ງຊາດ ປະທານຄະນະມິດຕະພາບ ລັດຖະສະພາ ລາວ-ມົງໂກລີ ເຂົ້າພົບປະຢ້ຽມຢາມ ທ່ານ ປອ ໂພໄຊ ໄຊຍະສອນ ເລຂາພັກແຂວງ ເຈົ້າແຂວງສາລະວັນ ເຂົ້າຮ່ວມຕ້ອນຮັບມີທ່ານ ສີເຮັງ ຫອມສົມບັດ ຮອງເລຂາພັກແຂວງ ປະທານຄະນະສະມາຊິກສະພາແຫ່ງຊາດ ເຂດເລືອກຕັ້ງທີ 14 ປະທານສະພາປະຊາຊົນແຂວງ (ສພຂ) ສາລະວັນ ພ້ອມດ້ວຍການນຳຂອງແຂວງ ເພື່ອລາຍງານຈຸດປະສົງການມາເຄື່ອນໄຫວ ແລະ ເຮັດວຽກ ຢູ່ແຂວງສາລະວັນ ຢ່າງເປັນທາງການ ໃນລະຫວ່າງວັນທີ 2-5 ພະຈິກ 2022; ເຊິ່ງກ່ອນອື່ນທ່ານເຈົ້າແຂວງສາລະວັນ ກໍ່ໄດ້ລາຍງານສະພາບການພັດທະນາດ້ານເສດຖະກິດ-ສັງຄົມຂອງແຂວງ ໂດຍສັງເຂບ ວ່າ: ປີ 2022 ແຂວງສາລະວັນ ຍັງສືບຕໍ່ມີຄວາມສະຫງົບ, ເປັນລະບຽບຮຽບຮ້ອຍໂດຍພື້ນຖານ, ແຕ່ອັດຕາເງິນເຟີ້ເພີ່ມຂຶ້ນ ແລະ ລາຄານໍ້າມັນມີການປ່ຽນແປງເພີ່ມຂຶ້ນຢ່າງຕໍ່ເນື່ອງ, ໄດ້ສົ່ງຜົນກະທົບທາງກົງ-ທາງອ້ອມຕໍ່ການດໍາລົງຊີວິດ, ເສດຖະກິດ, ການຄ້າ ແລະ ການບໍລິການຢ່າງຫຼີກຫຼ່ຽງບໍ່ໄດ້, ແຕ່ດ້ວຍຄວາມຮັບຜິດຊອບ, ຕັດສິນໃຈສູງຂອງຄະນະນໍາຂັ້ນແຂວງ, ອົງການປົກແຂວງ, ຄວາມເປັນເຈົ້າການຂອງບັນດາພະແນກການ-ອົງການ, ເມືອງ ແລະ ການປະກອບສ່ວນທົ່ວສັງຄົມ ເຮັດໃຫ້ການຈັດຕັ້ງປະຕິບັດມີຜົນສໍາເລັດຫຼາຍຄາດໝາຍ, ການຂະຫຍາຍຕົວຂອງເສດຖະກິດ (GDP) ຢູ່ໃນລະດັບ 3,3%, ລາຍຮັບສະເລ່ຍຕໍ່ຫົວຄົນໄດ້ 1.077 ໂດລາສະຫາລັດ, ການຈັດເກັບລາຍຮັບເຂົ້າງົບປະມານປະຕິບັດໄດ້ 93,01 ຕື້ກີບ, ດ້ານການລົງທຶນມີທັງໝົດ 352 ໂຄງການ, ລວມມູນຄ່າ 67,18 ຕື້ກີບ, ໃນນັ້ນມີໂຄງການສະເໜີໃໝ່ 50 ໂຄງການ, ໂຄງການສືບຕໍ່ 185 ໂຄງການ ແລະ ໂຄງການສໍາລະສາສາງ 117 ໂຄງການ, ການນໍາເຂົ້າສິນຄ້າ ປະຕິບັດໄດ້ 10,08 ລ້ານໂດລາສະຫະລັດ, ການສົ່ງອອກ ປະຕິບັດໄດ້ 101,20 ລ້ານໂດລາສະຫາລັດ, ການຜະລິດເຂົ້ານາແຊງ ປະຕິບັດໄດ້ 11.357 ເຮັກຕາ, ພືດລະດູແລ້ງ ປະຕິບັດໄດ້ 5.457 ເຮັກຕາ, ປະຈຸບັນເກັບກູ້ໄດ້ຮ້ອຍສ່ວນຮ້ອຍ, ເກັບກູ້ຜົນຜະລິດໄດ້ 25.238 ໂຕນ ແລະ ວຽກງານອື່ນໆກໍໄດ້ຮັບການພັດທະນາດີຂຶ້ນ;

 ກິດສຳພັນ ວຽກພັກ

ຈາກນັ້ນທັງສອງຝ່າຍກໍໄດ້ຜັດປ່ຽນກັນມີຄຳເຫັນຕໍ່ການຢ້ຽມຢາມດ້ວຍໄມຕີຈິດມິດຕະພາບເຫັນດີຈະສ້າງເງື່ອນໄຂອັນດີ ແລະ ເປັນຂີດໝາຍສຳຄັນເວົ້າລວມ 2 ປະເທດ ລາວ-ມົງໂກລີ, ເວົ້າສະເພາະແຂວງສາລະວັນ ຈະສືບຕໍ່ຂະຫຍາຍມູນເຊື້ອສາຍພົວພັນທາງການທູດ ຄົບຮອບ 60 ປີ ລະຫວ່າງ ສປປ ລາວ ແລະ ມົງໂກລີ ທີ່ມີມາແຕ່ດົນນານຈະໄດ້ຮັບການຂະຫຍາຍການພົວພັນລົງສູ່ຂັ້ນທ້ອງຖິ່ນຂອງລາວ ໃນຕໍ່ຫນ້າໃຫ້ນັບມື້ນັບມີການຂະຫຍາຍຕົວຍິ່ງໆຂຶ້ນ, ໃນຕອນທ້າຍທັງສອງຝ່າຍກໍ່ໄດ້ມອບເຄື່ອງທີ່ລະນຶກເຊິ່ງກັນ ແລະ ກັນຕື່ມອີກ;

ຕອນບ່າຍຂອງວັນດຽວກັນ ທ່ານ ສີເຮັງ ຫອມສົມບັດ ຮອງເລຂາພັກແຂວງ ປະທານຄະນະສະມາຊິກສະພາແຫ່ງຊາດ ເຂດເລືອກຕັ້ງທີ 14 ປະທານສະພາປະຊາຊົນແຂວງ (ສພຂ) ສາລະວັນ ໄດ້ນຳພາທ່ານ ບຽມບາຊູເຣນ ຈຳສຣັງ ເອກອັກຄະລັດຖະທູດວິສາມັນ ຜູ້ມີອຳນາດເຕັມແຫ່ງປະເທດ ມົງໂກລີ ປະຈຳ ສປປ ລາວ ແລະ ທ່ານ ພົຕ ປອ ວົງສັກ ຈັນທະວົງ ຄະນະປະຈໍາສະພາແຫ່ງຊາດ ປະທານກຳມາທິການປ້ອງກັນຊາດ-ປ້ອງກັນຄວາມສະຫງົບ ສະພາແຫ່ງຊາດ ປະທານຄະນະມິດຕະພາບ ລັດຖະສະພາ ລາວ-ມົງໂກລີ ເດີນທາງໄປຢ້ຽມຊົມສວນປູກກາເຟ ປອດສານພິດ ຂອງປະຊາຊົນ ບ້ານຜັກກູດ ເມືອງເລົ່າງາມ ແຂວງສາລະວັນ.

ພາບ-ຂ່າວ: ດີລຳພົນ ພົມມະຈັນ