(ສພຊ) ໃນຕອນບ່າຍຂອງວັນທີ 25 ກໍລະກົດ 2023 ທີ່ສະພາແຫ່ງຊາດ ແຫ່ງ ສປປລາວ, ສະຫາຍ ນາງ ປິ່ງຄຳ ລາຊະສິມມາ ເລຂາທິການສະພາແຫ່ງຊາດ ໄດ້ຕ້ອນຮັບການເຂົ້າຢ້ຽມຂໍ່ານັບຂອງສະຫາຍ ເລ ກວ່າງ ມິ່ງ ຫົວໜ້າອຳນວຍການໂທລະພາບ ສະພາແຫ່ງຊາດ ແຫ່ງ ສສ.ຫວຽດນາມ ພ້ອມດ້ວຍຄະນະ ເນື່ອງໃນໂອກາດທີ່ເດີນທາງມາຢ້ຽມຢາມພົບປະເຮັດວຽກຮ່ວມກັບກົມສື່ມວນຊົນ ຄະນະເລຂາທິການສະພາແຫ່ງຊາດລາວ ໃນລະຫວ່າງວັນທີ 24-26 ກໍລະກົດ 2023.

ໂອກາດດັ່ງກ່າວ ສະຫາຍ ນາງ ປິ່ງຄຳ ລາຊະສິມມາ ໄດ້ກ່າວສະແດງຄວາມຍີນດີຕ້ອນຮັບ ສະຫາຍ ເລ ກວ່າງ ມິ່ງ ພ້ອມດ້ວຍຄະນະ ໃນໂອກາດທີ່ມາຢ້ຽມຢາມ ແລະ ເຮັດວຽກ ຢູ່ ສປປລາວ, ຕີລາຄາສູງຕໍ່ການຢ້ຽມຢາມໃນຄັ້ງນີ້ ເພາະເປັນການປະກອບສ່ວນສຳຄັນເຂົ້າໃນການເພີ່ມພູນຄູນສ້າງສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດລາວ-ຫວຽດນາມ ເວົ້າລວມ, ເວົ້າສະເພາະ ລະຫວ່າງ ສອງສະພາແຫ່ງຊາດ ກໍຄື ຄະນະເລຂາທິການສະພາແຫ່ງຊາດລາວ ແລະ ຫ້ອງວ່າການສະພາແຫ່ງຊາດຫວຽດນາມ ພິເສດ ກໍແມ່ນວຽກງານສື່ມວນຊົນ ໃຫ້ມີການພັດທະນາຍິ່ງໆຂຶ້ນ; ສະແດງຄວາມຊົມເຊີຍ ຕໍ່ຜົນການພົບປະເຮັດວຽກ ລະຫວ່າງ ສະຫາຍ ເລ ກວ່າງ ມິ່ງ ແລະ ຄະນະ ກັບ ສະຫາຍ ສິງຄຳ ວົງພະຈັນ ພ້ອມດ້ວຍຄະນະກົມສື່ມວນຊົນ ຄະນະເລຂາທິການສະພາແຫ່ງຊາດ ທີ່ໄດ້ຮັບຜົນສໍາເລັດເປັນຢ່າງດີ ແລະ ໄດ້ແຈ້ງໃຫ້ຮູ້ ກ່ຽວກັບຜົນສໍາເລັດການດໍາເນີນກອງປະຊຸມສະໄໝສາມັນ ເທື່ອທີ 5 ຂອງສະພາແຫ່ງຊາດ ຊຸດທີ IX ແລະ ສະເໜີ ຝ່າຍຫວຽດນາມໃຫ້ການຊ່ວຍເຫຼືອວຽກງານສື່ມວນຊົນຂອງສະພາແຫ່ງຊາດລາວ ໂດຍສະເພາະການແລກປ່ຽນ ແລະ ຖອດຖອນບົດຮຽນກ່ຽວກັບວຽກງານໂທລະພາບ ແລະ ສື່ອອນລາຍ.

ສະຫາຍ ເລ ກວ່າງ ມິ່ງ ກໍໄດ້ກ່າວສະແດງຄວາມຂອບໃຈຕໍ່ສະຫາຍ ນາງ ປິ່ງຄໍາ ລາຊະສິມມາ ທີ່ໄດ້ເສຍສະຫລະເວລາອັນມີຄຸນຄ່າໃຫ້ການຕ້ອນຮັບຢ່າງອົບອຸ່ນ ພ້ອມທັງແຈ້ງໃຫ້ຮູ້ກ່ຽວກັບການພົບປະເຮັດວຽກກັບສະຫາຍ ສິງຄຳ ວົງພະຈັນ ພ້ອມຄະນະກົມສື່ມວນຊົນ ຄະນະເລຂາທິການສະພາແຫ່ງຊາດ, ການພົບປະເຮັດວຽກຮ່ວມກັບ ຄະນະອໍານວຍການໂທລະພາບແຫ່ງຊາດລາວ ແລະ ການເຂົ້າພົບປະຢ້ຽມຢາມສະຫາຍ ໂພສີ ແກ້ວມະນີວົງ ຮອງລັດຖະມົນຕີກະຊວງ ຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ໂດຍສັງເຂບ ແລະ ເຫັນດີຕໍ່ຂໍ້ສະເໜີຕ່າງໆ ທີ່ສະຫາຍເລຂາທິການສະພາແຫ່ງຊາດ ແຫ່ງ ສປປລາວ ໄດ້ສະເໜີມານັ້ນ ແລະ ພ້ອມທີ່ຈະນໍາໄປພິຈາລະນາ ແລະ ສືບຕໍ່ປະຕິບັດໃຫ້ເກີດດອກອອກຜົນຍິ່ງໆຂຶ້ນ.

ໃນຕອນເຊົ້າຂອງວັນທີ 26 ກໍລະກົດ 2023 ຄະນະ ໄດ້ສືບຕໍ່ເຮັດວຽກຮ່ວມກັບ ສູນເຝິກອົບຮົມ ແລະ ຂໍ້ມູນຂ່າວສານ ນໍາໂດຍສະຫາຍ ຄໍາແທ່ນ ວິລະກຸນ ຫົວໜ້າສູນເຝິກອົບຮົມ ແລະ ຂໍ້ມູນຂ່າວສານ ຂອງສະຖາບັນຄົ້ນຄວ້ານິຕິກໍາສະພາແຫ່ງຊາດ ກ່ຽວກັບວຽກງານຂໍ້ມູນຂ່າວສານ ທີ່ຫ້ອງການສະພາແຫ່ງຊາດລາວ.

(ພາບ ແລະ ຂ່າວ: ສອນສັກ ວັນວິໄຊ)