ທ່ານ ນາງ ປິ່ງຄຳ ລາຊະສິມມາ, ເລຂາທິການສະພາແຫ່ງຊາດ ພ້ອມດ້ວຍຄະນະ ໄດ້ລົງຕິດຕາມກວດກາຊຸກຍູ້ ແລະ ເກັບກຳຂໍ້ມູນ ການເຄື່ອນໄຫວວຽກງານ ຂອງຄະນະເລຂາທິການສະພາປະຊາຊົນ ແຂວງໄຊສົມບູນ ໃນວັນທີ 23 ກັນຍາ 2023 ນີ້ ທີ່ຫ້ອງປະຊຸມສະພາປະຊາຊົນແຂວງ ໂດຍມີ ທ່ານ ແດງ ປະທຸມທອງ, ປະທານສະພາປະຊາຊົນ ແຂວງໄຊສົມບູນ, ທ່ານ ນາງ ຂັນກາບ ໄຊຍະກຸມມານ, ເລຂາທິການສະພາປະຊາຊົນແຂວງ ພ້ອມດ້ວຍຮອງເລຂາທິການສະພາປະຊາຊົນແຂວງ ຕະຫຼອດຮອດຫົວໜ້າຂະແໜງ ແລະ ພະນັກງານທີ່ກ່ຽວຂ້ອງ ພາຍໃນສະພາປະຊາຊົນແຂວງ ເຂົ້າຮ່ວມ.

ໂອກາດນີ້ ທ່ານ ບີ ເຮີ່, ຮອງເລຂາທິການສະພາປະຊາຊົນ ແຂວງໄຊສົມບູນ ໄດ້ລາຍງານຫຍໍ້ ກ່ຽວກັບສະພາບທີ່ພົ້ນເດັ່ນ, ຂໍ້ສະດວກ, ຂໍຫຍຸ້ງຍາກ ໃນການຈັດຕັ້ງປະຕິບັດໜ້າທີ່ວຽກງານ ຂອງບັນດາຂະແໜງການ ເປັນຕົ້ນແມ່ນ ວຽກງານເນື້ອໃນ, ວຽກງານຈັດຕັ້ງ-ພະນັກງານ, ວຽກງານກວດກາ, ວຽກງານຄຸ້ມຄອງຫ້ອງການ, ວຽກງານບໍລິຫານ-ການເງິນ , ວຽກງານສື່ມວນຊົນ, ວຽກງານການປະສານງານ ແລະ ວຽກງານອື່ນໆ ໃຫ້ເລຂາທິການສະພາແຫ່ງຊາດ ພ້ອມຄະນະ ໄດ້ຮັບຊາບ. ຊຶ່ງຈຸດປະສົງ ໃນການລົງເຄື່ອນໄຫວວຽກງານ ຂອງຄະນະເລຂາທິການສະພາແຫ່ງຊາດ ຄັ້ງນີ້ ກໍເພື່ອຕິດຕາມກວດກາຊຸກຍູູ້ ແລະ ເກັບກຳຂໍ້ມູນ ການເຄື່ອນໄຫວວຽກງານ ຂອງຄະນະເລຂາທິການສະພາປະຊາຊົນ ແຂວງໄຊສົມບູນ ໂດຍສະເພາະ ແມ່ນການເປັນເສນາທິການໃຫ້ແກ່ຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງ ແລະ ສະພາປະຊາຊົນຂັ້ນແຂວງ ເປັນຕົ້ນ ແມ່ນວຽກງານເນື້ອໃນ, ວຽກງານກົງຈັກການຈັດຕັ້ງ ແລະ ບຸກຄະລາກອນ, ວຽກງານງົບປະມານ-ການເງິນ, ວຽກງານບໍລິຫານ-ພິທີການ, ວຽກງານສື່ມວນຊົນ, ວຽກງານກວດກາ ແລະ ວຽກງານອື່ນໆ. ທັງນີ້ ກໍເພື່ອສ້າງເງື່ອນໄຂໃຫ້ບັນດາກົມ ຂອງຄະນະເລຂາທິການສະພາແຫ່ງຊາດ ໄດ້ແລກປ່ຽນບົດຮຽນກັບຂະແໜງການທີ່ກ່ຽວຂ້ອງ ຂອງຄະນະເລຂາທິການສະພາປະຊາຊົນ ຂັ້ນແຂວງ ເວົ້າສະເພາະ ກໍຄືແຂວງໄຊສົມບູນ ແນໃສ່ເກັບກຳສະພາບຂໍ້ສະດວກ, ຂໍ້ຫຍຸ້ງຍາກ ແລະ ບັນດາຂໍ້ສະເໜີຕ່າງໆ ໃນການປະຕິບັດໜ້າທີ່ວຽກງານຜ່ານມາ ແລະ ການກະກຽມ ໃຫ້ແກ່ການດຳເນີນກອງປະຊຸມ ສະໄໝສາມັນ ຂອງສະພາແຫ່ງຊາດ ກໍຄືສະພາປະຊາຊົນຂັ້ນແຂວງ ໃຫ້ໄດ້ຮັບຜົນດີ ແລະ ສອດຄ່ອງກັບສະພາບເງື່ອນໄຂຈຸດພິເສດຂອງສູນກາງ ແລະ ທ້ອງຖິ່ນ ໃນປັດຈຸບັນ ເພື່ອຮັບປະກັນທາງດ້ານຮູບການ, ວິທີການ, ຂັ້ນຕອນການດຳເນີນ, ການກະກຽມວຽກງານທາງດ້ານບໍລິຫານ ແລະ ພິທີການ ຮັບໃຊ້ການດຳເນີນກອງປະຊຸມ ດັ່ງກ່າວ ໃຫ້ມີຄວາມຖືກຕ້ອງ, ວ່ອງໄວ, ທັນການ ແລະ ມີຜົນສຳເລັດຕາມຄາດໝາຍ. ພ້ອມນີ້ ເລຂາທິການສະພາແຫ່ງຊາດ ຍັງໄດ້ມີຄຳເຫັນເຈາະຈີ້ມ ຕໍ່ການຈັດຕັ້ງປະຕິບັດວຽກງານ ຂອງຄະນະເລຂາທິການສະພາປະຊາຊົນ ແຂວງໄຊສົມບູນ ໃນໄລຍະຜ່ານມາ ຕື່ມອີກ. ຈາກນັ້ນ ຜູ້ເຂົ້າຮ່ວມ ໄດ້ປະກອບຄຳຄິດ-ຄຳເຫັນ ດ້ວຍຄວາມຮັບຜິດຊອບສູງ ເພື່ອແລກປ່ຽນບົດຮຽນຊຶ່ງກັນ ແລະ ກັນ ແນໃສ່ປຶກສາຫາລື ກ່ຽວກັບແຜນການຈັດຕັ້ງປະຕິບັດ ວຽກງານຂອງຄະນະເລຂາທິການສະພາປະຊາຊົນ ແຂວງໄຊສົມບູນ ໃນຕໍ່ໜ້າ ໃຫ້ໄດ້ຮັບການເຄື່ອນໄຫວ ຢ່າງມີປະສິດທິພາບ.

(ແສງຕາວັນ ລັດຕະນະວົງ)