ຕອນບ່າຍ ວັນທີ 25 ກໍລະກົດ 2024, ທ່ານ ນາງ ພອນສະຫວັນ ສັກຕິຄຸນ ເລຂາທິການສະພາປະຊາຊົນແຂວງ ຖະແຫຼ່ງຂ່າວ ຕໍ່ສື່ມວນຊົນ ກ່ຽວກັບການຜົນສໍາເລັດດໍາເນີນກອງປະຊຸມສະໄໝສາມັນ ເທື່ອທີ 7 ຂອງສະພາປະຊາຊົນແຂວງ ຊຸດທີ II ເຊິ່ງມີເນື້ອໃນດັ່ງນີ້:
ບັນດາທ່ານທີ່ນັບຖື ແລະ ຮັກແພງ!
ຂ້າພະເຈົ້າຕາງໜ້າຄະນະປະຈໍາສະພາປະຊາຊົນແຂວງ ມີຄວາມຍິນດີ ແລະ ຖືເປັນກຽດ ແຈ້ງມາຍັງບັນດາທ່ານ ຮັບຊາບວ່າ:
ກອງປະຊຸມສະໄໝສາມັນ ເທື່ອທີ 7 ຂອງສະພາປະຊາຊົນແຂວງ ຊຸດທີ II ໄດ້ດໍາເນີນຢ່າງເປັນທາງການ ໃນວັນທີ 24-25 ກໍລະກົດ 2024 ເປັນເວລາ 2 ວັນ ທີ່ຫ້ອງປະຊຸມສະພາປະຊາຊົນແຂວງຜົ້ງສາລີ ໂດຍການເປັນປະທານ ແລະ ນໍາພາກອງປະຊຸມຂອງທ່ານ ທອງສີ ເສົາສຸລິພົມ ຮອງເລຂາພັກແຂວງ, ປະທານສະພາປະຊາຊົນແຂວງ; ໃຫ້ກຽດເຂົ້າຮ່ວມໂດຍທ່ານ ຄໍາຜອຍ ວັນນະສານ ກໍາມະການສູນກາງພັກ, ເລຂາຄະນະບໍລິຫານງານພັກແຂວງ, ເຈົ້າແຂວງຜົ້ງສາລີ; ມີບັນດາທ່ານຮອງເຈົ້າແຂວງ, ບັນດາທ່ານສະມາຊິກສະພາແຫ່ງຊາດ ຊຸດທີ IX ປະຈໍາເຂດເລືອກຕັ້ງ 2 ແຂວງຜົ້ງສາລີ; ສະມາຊິກສະພາປະຊາຊົນແຂວງ ຊຸດທີ II; ສະມາຊິກອົງການປົກຄອງແຂວງ, ປະທານແນວລາວສ້າງຊາດແຂວງ, ອົງການຈັດຕັ້ງມະຫາຊົນຂັ້ນແຂວງ, ອົງການຈັດຕັ້ງພັກ-ລັດຂັ້ນແຂວງ, ອາດີດການນໍາແຂວງ, ອາດິດປະທານຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງ, ໂຮງຮຽນ, ໂຮງໝໍ, ຫົວໜ່ວຍທຸລະກິດທັງພາກລັດ ແລະ ເອກະຊົນ ເຂົ້າຮ່ວມ ຈໍານວນ 115 ທ່ານ, ຍິງ 21 ທ່ານ.
ກອງປະຊຸມສະໄໝສາມັນໄດ້ດໍາເນີນດ້ວຍບັນຍາກາດ ແຫ່ງການເສີມຂະຫຍາຍ ສິດປະຊາທິປະໄຕ ຂອງບັນດາສະມາຊິກສະພາປະຊາຊົນແຂວງ ໃນການພິຈາລະນາ ແລະ ຮັບຮອງເອົາບັນຫາສໍາຄັນພື້ນຖານຂອງແຂວງ ລວມມີ 4 ມະຕິ ດັ່ງນີ້:
- ມະຕິກອງປະຊຸມສະພາປະຊາຊົນແຂວງ ວ່າດ້ວຍການຮັບຮອງເອົາ ບົດລາຍງານຂອງອົງການປົກຄອງແຂວງ ກ່ຽວກັບການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ ປະຈໍາ 6 ເດືອນຕົ້ນປີ ແລະ ທິດທາງແຜນການປະຈໍາ 6 ເດືອນທ້າຍປີ 2024;
- ມະຕິກອງປະຊຸມສະພາປະຊາຊົນແຂວງ ວ່າດ້ວຍການຮັບຮອງເອົາ ບົດລາຍງານຂອງອົງການປົກຄອງແຂວງ ກ່ຽວກັບການຈັດຕັ້ງປະຕິບັດແຜນງົບປະມານ ປະຈໍາ 6 ເດືອນຕົ້ນປີ ແລະ ທິດທາງແຜນການປະຈໍາ 6 ເດືອນທ້າຍປີ 2024;
- ມະຕິກອງປະຊຸມສະພາປະຊາຊົນແຂວງ ວ່າດ້ວຍການຮັບຮອງເອົາບົດລາຍງານ ກ່ຽວກັບການຈັດຕັ້ງປະຕິບັດບັນດາຄາດໝາຍຂອງວຽກງານພັດທະນາຊົນນະບົດ ແລະ ລຶບລ້າງຄວາມທຸກຍາກ ໄລຍະຜ່ານມາ ຕາມມະຕິ ເລກທີ 47/ສພຂ.ຜລ, ລົງວັນທີ 31 ພຶດສະພາ 2021 ແລະ ລາຍງານຄືນການຈັດຕັ້ງປະຕິບັດ ມະຕິ 81/ສພຂ, ລົງວັນທີ 28 ທັນວາ 2023;
- ມະຕິກອງປະຊຸມສະພາປະຊາຊົນແຂວງ ວ່າດ້ວຍການຮັບຮອງເອົາ ບົດລາຍງານຂອງສະພາປະຊາຊົນແຂວງ ກ່ຽວກັບການຈັດຕັ້ງປະຕິບັດແຜນການເຄື່ອນໄຫວວຽກງານ ແຕ່ກອງປະຊຸມສະໄໝສາມັນ ເທື່ອທີ 6 ຫາ ເທື່ອທີ 7 ແລະ ແຜນການເຄື່ອນໄຫວວຽກງານ ຮອດກອງປະຊຸມສະໄໝສາມັນ ເທື່ອທີ 8 ຂອງສະພາປະຊາຊົນແຂວງ ຊຸດທີ II;
ນອກຈາກການພິຈາລະນາ, ຮັບຮອງບັນຫາສໍາຄັນພື້ນຖານແລ້ວ, ກອງປະຊຸມ ຍັງໄດ້ຮັບຟັງ ການຊີ້ແຈງຈາກ 18 ພາກສ່ວນ ກັບບັນຫາທີ່ເຄັ່ງຮ້ອນຂອງສັງຄົມ ຕາມຄໍາຊັກຖາມຂອງຄະນະປະຈໍາສະພາປະຊາຊົນແຂວງ ແລະ ສະມາຊິກສະພາປະຊາຊົນແຂວງ ທີ່ໄດ້ຍົກຂຶ້ນຢູ່ໃນກອງປະຊຸມ ປະກອບມີ:
- ພະແນກແຜນການ ແລະ ການລົງທຶນແຂວງ ຊີ້ແຈງກ່ຽວກັບ: ການຈັດຕັ້ງປະຕິບັດ ບັນດາໂຄງການລົງທຶນ, ເອກະຊົນພາຍໃນ ແລະ ຕ່າງປະເທດ
- ພະແນກການເງິນແຂວງ ຊີ້ແຈງກ່ຽວກັບ: ການແບ່ງຂັ້ນຄຸ້ມຄອງ ກ່ຽວກັບການຈັດເກັບລາຍຮັບ ຕາມທິດ 3 ສ້າງ ລະຫວ່າງຂັ້ນແຂວງ, ຂັ້ນເມືອງ ແລະ ຂັ້ນບ້ານ; ວຽກງານອອກໃບຕາດິນ ທີ່ຕິດພັນກັບການສ້າງສັນຍາເຊົ່າສໍາປະທານ
- ພະແນກສ່ວຍສາອາກອນແຂວງ ຊີ້ແຈງກ່ຽວກັບການຄຸ້ມຄອງ ການຈັດເກັບອາກອນຂົ່ນສົ່ງ
- ພະແນກອຸດສາຫະກໍາ ແລະ ການຄ້າແຂວງ ຊີ້ແຈງກ່ຽວກັບ: ການຊຸກຍູສົ່ງເສີມ ບັນດາສິນຄ້າ ODOP ທີ່ເປັນຍຸດທະສາດຂອງແຂວງ
- ພະແນກໂຍທາທິການ ແລະ ຂົນສົ່ງແຂວງ ຊີ້ແຈງກ່ຽວກັບ: ຄວາມຄືບໜ້າກ່ຽວກັບການຈັດຕັ້ງປະຕິບັດໂຄງການ ທີ່ສະພາຮັບຮອງຜ່ານມາ; ແຜນການກໍ່ສ້າງ ແລະ ຄຸ້ມຄອງເສັ້ນທາງເຂດຊົນນະບົດ
- ພະແນກພະລັງງານ ແລະ ບໍ່ແຮ່ແຂວງ ຊີ້ແຈງກ່ຽວກັບ: ການຈັດຕັ້ງປະຕິບັດ ດໍາລັດ ສະບັບເລກທີ 246/ລບ, ລົງວັນທີ03/08/2023
- ພະແນກກະສິກໍາ ແລະ ປ່າໄມ້ແຂວງ ຊີ້ແຈງກ່ຽວກັບ: ວິທີການ ແລະ ມາດຕະການຄຸ້ມຄອງ 3 ປະເພດ ເພື່ອບໍ່ໃຫ້ປະຊາຊົນຖ່າງປ່າເຮັດໄຮ່ຊະຊາຍ ແລະ ການຈັດສັນເຂດທໍາການຜະລິດໃຫ້
- ພະແນກຊັບພະຍາກອນທໍາມະຊາດ ແລະ ສິ່ງແວດລ້ອມແຂວງ ຊີ້ແຈງກ່ຽວກັບ: ການຂຶ້ນບັນຊີ ກ່ຽວກັບການເຊົ່າ ແລະ ສໍາປະທານທີ່ດິນທົ່ວແຂວງ
- ໂຄງການພັດທະນາເທດສະບານແຂວງ ຊີ້ແຈງກ່ຽວກັບ: ການຊົດເຊີຍຜົນກະທົບໂຄງການກໍ່ສ້າງເທດສະບານ ແລະ ການຊົດເຊີຍຜົນກະທົບໂຄງການກໍ່ສ້າງເສັ້ນທາງ 1A
- ພະແນກສຶກສາທິການ ແລະ ກິລາແຂວງ ຊີ້ແຈງກ່ຽວກັບ: ວິທີການ ແລະ ມາດຕະການ ເພື່ອໃຫ້ບັນລຸບັນດາຄາດໝາຍການພັດທະນາແບບຍຶນຍົງ SDGs ເປັນຕົ້ນ: ອັດຕາການເຂົ້າຮຽນຂອງເດັກໃນເກນອາຍຸ 0-5 ປີ; ການສຶກສາພາກບັງຄັບ ໃນຊັ້ນປະຖົມ, ມັດທະຍົມຕອນຕົ້ນ ແລະ ການປະລະການຮຽນຂອງນັກຮຽນ
- ພະແນກສາທາລະນະສຸກແຂວງ ຊີ້ແຈງກ່ຽວກັບ: ການຄຸ້ມຄອງການນຳໃຊ້ກອງທຶນປະກັນສຸຂະພາບ ແລະ ການຍົກສູງຄຸນນະພາບໃນການປິ່ນປົວຢູ່ບັນດາສຸກສາລາໃນເຂດຊົນນະບົດ
- ພະແນກແຮງງານ ແລະ ສະຫວັດດີການ-ສັງຄົມ ຊີ້ແຈງກ່ຽວກັບ: ການແກ້ໄຂຄົນວ່າງງານພາຍໃນແຂວງຕິດພັນກັບການຝຶກວິຊາຊີບ; ການປະຕິບັດນະໂຍບາຍຕໍ່ຜູ້ທີ່ມີຜົນງານຄຸນງາມຄວາມດີຕໍ່ການປະຕິວັດຊາດປະຊາທິປະໄຕ ໃນສະໄໝສົງຄາມ
- ພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວແຂວງ ຊີ້ແຈງກ່ຽວກັບ: ການພັດທະນາແຫຼ່ງທ່ອງທ່ຽວຕິດພັນກັບນັກທ່ອງທ່ຽວ; ການຄຸ້ມຄອງຂອດການບໍລິການບັນດາໂຮງແຮມ, ເຮືອນພັກ ແລະ ຮ້ານອາຫານຕ່າງໆ
- ພະແນກຍຸຕິທໍາແຂວງ ຊີ້ແຈງກ່ຽວກັບ: ການປະຕິບັດຄໍາຕັດສິນຂອງສານທີ່ໃຊ້ໄດ້ຢ່າງເດັດຂາດ ຕໍ່ຜູ້ທີ່ມີເງື່ອນໄຂປະຕິບັດ ແຕ່ບໍ່ປະຕິບັດ ແລະ ຕໍ່ຜູ້ທີ່ບໍ່ມີເງື່ອນໄຂປະຕິບັດ
- ກອງບັນຊາການປ້ອງກັນຄວາມສະຫງົບແຂວງ ຊີ້ແຈງກ່ຽວກັບ: ການຈັດຕັ້ງປະຕິບັດ ມາດຕະການສະກັດກັ້ນ ກ່ຽວກັບການແກ້ໄຂບັນຫາຢາເສບຕິດ ເປັນຕົ້ນ: ການແກ້ໄຂຕໍ່ຜູ້ມີຂອງກາງຕໍ່າກວ່າກົດໝາຍໄດ້ກໍານົດໄວ້ ທີ່ຕິດພັນກັບມາດຕາ 12 ຂອງຂໍ້ຕົກລົງເຈົ້າແຂວງ ສະບັບເລກທີ 1054/ຈຂ, ລົງວັນທີ 9/11/2022
- ກອງບັນຊາການທະຫານແຂວງ ຊີ້ແຈງກ່ຽວກັບ: ສະພາບການຕິດຕາມກວດກາວຽກງານຊາຍແດນ ຕິດພັນກັບການປະຕິບັດນະໂຍບາຍຕໍ່ທະຫານຊາຍແດນ ແລະ ການຈັດສັນງົບປະມານໃຫ້ແກ່ກອງບັນຊາການທະຫານເມືອງ, ທະຫານຊາຍແດນ
- ອົງການໄອຍະການປະຊາຊົນແຂວງ ລາຍງານ-ຊີ້ແຈງກ່ຽວກັບ: ການຕິດຕາມກວດກາການປະຕິບັດກົດໝາຍຂອງສານ ໃນການດໍາເນີນຄະດີແພ່ງ
- ສານປະຊາຊົນແຂວງ ລາຍງານ-ຊີ້ແຈງກ່ຽວກັບ: ການຈັດຕັ້ງປະຕິບັດວຽກງານການປະເມີນຜົນການປະຕິບັດໜ້າທີ່ຂອງຜູ້ພິພາກສາ
ບັນດາທ່ານທີ່ນັບຖື ແລະ ຮັກແພງ!
ຄຽງຄູ່ກັບການພິຈາລະນາ ແລະ ຮັບຮອງເອົາບັນຫາສໍາຄັນທີ່ກ່າວມາຂ້າງເທິງນັ້ນ, ໃນໄລຍະດໍາເນີນກອງປະຊຸມສະໄໝສາມັນ ເທື່ອທີ 7 ຂອງສະພາປະຊາຊົນແຂວງ ຊຸດທີ II ມີປະຊາຊົນສົ່ງຄໍາຄິດເຫັນ, ຄໍາສະເໜີຜ່ານໂທລະສັບສາຍດ່ວນ ທັງໝົດ 5 ສາຍ ມາຍັງກອງປະຊຸມ. ຊຶ່ງເນື້ອໃນຄໍາສະເໜີດັ່ງກ່າວ ສ່ວນຫຼາຍພົວພັນເຖິງ ການຈັດຕັ້ງປະຕິບັດບັນດາໂຄງການກໍ່ສ້າງພື້ນຖານໂຄງລ່າງ, ການຊົດເຊີຍຜົນກະທົບ. ຕໍ່ກັບຄໍາຄິດຄໍາເຫັນຂອງປະຊາຊົນທີ່ສົ່ງມາທາງ ໂທລະສັບສາຍດ່ວນ ດັ່ງກ່າວ ກອງເລຂາກອງປະຊຸມໄດ້ສັງລວມ, ລາຍງານໃຫ້ຄະນະປະທານກອງປະຊຸມ ແລະ ໄດ້ມອບໃຫ້ບັນດາຄະນະກໍາມະການຂອງສະພາປະຊາຊົນແຂວງ ປະສານສົມທົບກັບພາກສ່ວນທີ່ກ່ຽວຂ້ອງ ຄົ້ນຄວ້າແກ້ໄຂໃຫ້ຖືກຕ້ອງ, ສອດຄ່ອງຕາມກົດໝາຍ ແລະ ລະບຽບການ.
ອີກເທື່ອໜຶ່ງຕາງໜ້າຄະນະປະຈໍາສະພາປະຊາຊົນແຂວງ ຂ້າພະເຈົ້າ ຂໍຂອບໃຈມາຍັງ ບັນດາທ່ານ ການນໍາພັກ-ລັດທຸກຂັ້ນ, ພະນັກງານ-ລັດຖະກອນ, ທະຫານ, ຕໍາຫຼວດ, ນັກຮຽນ, ນັກສຶກສາ-ປັນຍາຊົນ, ນັກທຸລະກິດ, ຊາວຜູ້ອອກແຮງານ ແລະ ພໍ່ແມ່ພີ່ນ້ອງປະຊາຊົນບັນດາເຜົ່າ ໃນທົ່ວແຂວງ ທີ່ໄດ້ຕິດຕາມກອງປະຊຸມສະໄໝສາມັນ ເທື່ອທີ 7 ຂອງສະພາປະຊາຊົນແຂວງ ຊຸດທີ II ໃນຄັ້ງນີ້;
ຂໍສະແດງຄວາມຂອບໃຈ ແລະ ຊົມເຊີຍຢ່າງຈິງໃຈມາຍັງສື່ມວນຊົນ ຂອງພະແນກຖະແຫຼງຂ່າວ, ວັດທະນະທໍາ ແລະ ທ່ອງທ່ຽວແຂວງ, ກອງບັນຊາການປ້ອງກັນຄວາມສະຫງົບແຂວງ ທີ່ໄດ້ຕິດຕາມຢ່າງໃກ້ຊິດ ເພື່ອເກັບກໍາຂໍ້ມູນ-ຂ່າວສານ ແລະ ເຜີຍແຜ່ຢ່າງທັນການກ່ຽວກັບການດໍາເນີນກອງປະຊຸມສະ ໄໝສາມັນ ເທື່ອທີ 7 ຂອງສະພາປະຊາຊົນແຂວງ ຊຸດທີ II ໃຫ້ແກ່ສັງຄົມຮັບຊາບຢ່າງທົ່ວເຖິງ
ຂໍຂອບໃຈ
ພາບ-ຂ່າວ: ສູນທອງ