(ສພຊ) – ວັນທີ 26-29 ຕຸລານີ້ ທີ່ເມືອງວັງວຽງ ແຂວງວຽງຈັນ, ກົມສື່ມວນຊົນ, ຄະນະເລຂາທິການສະພາແຫ່ງຊາດ ໄດ້ຈັດກອງປະຊຸມເຝິກອົບຮົມວຽກງານສື່ມວນຊົນ ໃຫ້ແກ່ພະນັກງານສື່ມວນຊົນຂອງສະພາແຫ່ງຊາດ (ສພຊ), ສະພາປະຊາຊົນຂັ້ນແຂວງ (ສພຂ) ແລະ ເພື່ອນຮ່ວມງານ ໂດຍການເປັນປະທານຂອງທ່ານ ນາງ ອຳໄພວອນ ລ້ອມບຸນແພງ ກໍາມະການສໍາຮອງສູນກາງພັກ, ເລຂາທິການສະພາແຫ່ງຊາດ ເຊິ່ງມີທ່ານ ສິງຄຳ ວົງພະຈັນ ຮອງເລຂາທິການສະພາແຫ່ງຊາດ, ຜູ້ຊີ້ນຳວຽກງານສື່ມວນຊົນ ພ້ອມດ້ວຍວິທະຍາກອນທີ່ມາຈາກສູນກາງສະຫະພັນແມ່ຍິງລາວ ແລະ ອະດີດພະນັກງານຂອງກະຊວງຖະແຫຼງຂ່າວ, ວັດທະນະທໍາ ເເລະ ທ່ອງທ່ຽວ, ນັກເຝິກອົບ ຮົມທີ່ເປັນພະນັກ ງານຜູ້ຮັບຜິດຊອບວຽກງານສື່ມວນຊົນຂອງ ສພຊ ແລະ ສພຂ, ຕາງໜ້າຈາກວິທະຍຸກະ ຈາຍສຽງແຫ່ງຊາດລາວ, ໂທລະພາບແຫ່ງຊາດລາວ, ໂທລະພາບກອງທັບປະຊາຊົນລາວ ແລະ ພາກສ່ວນທີ່ກ່ຽວຂ້ອງ ເຂົ້າຮ່ວມຫຼາຍກວ່າ 60 ທ່ານ.

ການເຝິກອົບຮົມຄັ້ງນີ້ ມີຈຸດປະສົງເພື່ອຍົກລະດັບຄວາມຮູ້ໃຫ້ແກ່ບຸກຄະລາກອນທີ່ຮັບຜິດຊອບວຽກງານສື່ມວນຊົນ ມີຄວາມເຂົ້າໃຈຢ່າງຖືກຕ້ອງກ່ຽວກັບການໂຄສະນາເຜີຍ ແຜ່ພາລະບົດບາດ, ການເຄື່ອນໄຫວວຽກງານທາງລັດຖະການທັງພາຍໃນ ແລະ ຕ່າງປະ ເທດ, ບັນດາກົດໝາຍ ແລະ ນິຕິກຳໃຕ້ກົດໝາຍ, ຜົນສຳເລັດກອງປະຊຸມຕ່າງໆ ໃຫ້ມີເນື້ອໃນອັນເລິກເຊິ່ງ, ຫຼາກຫຼາຍສີສັນຢ່າງກວ້າງຂວາງ ລວມທັງການປະຕິບັດໜ້າທີ່ວຽກ ງານທີ່ມີສ່ວນຮ່ວມດ້ານບົດບາດຍິງ-ຊາຍຂອງນັກຂ່າວ ທີ່ສອດຄ່ອງກັບແນວທາງນະໂຍ ບາຍຂອງພັກ ແລະ ກົດໝາຍຂອງລັດ; ເພື່ອປັບປຸງການສ້າງເຄືອຂ່າຍການຕອບສະໜອງຂໍ້ມູນຂ່າວສານຂອງສະພາປະຊາຊົນຂັ້ນແຂວງ (ທ້ອງຖິ່ນ) ໃຫ້ກັບໜັງສືພິມ, ລາຍການວິທະຍຸ ແລະ ໂທລະພາບ ຜູ້ແທນປະຊາຊົນ ຂອງສະພາແຫ່ງຊາດ ຢ່າງປົກກະຕິ ແລະ ຕໍ່ເນື່ອງ.

ທ່ານ ນາງ ອຳໄພວອນ ລ້ອມບຸນແພງ ໄດ້ກ່າວໄຂກອງປະຊູມວ່າ: ການເຝິກອົບຮົມຄັ້ງນີ້ ມີຄວາມໝາຍສໍາຄັນຫຼາຍ ເພື່ອເຮັດໃຫ້ວຽກງານຂອງກົມສື່ມວນຊົນ, ຄະນະເລຂາ ທິການສະພາແຫ່ງຊາດ ກໍຄືສື່ມວນຊົນຂອງສະພາປະຊາຊົນຂັ້ນແຂວງ ມີຄວາມເຂັ້ມແຂງໃນການເກັບກຳ ແລະ ອອກຂ່າວຜ່ານສື່ຕ່າງໆ ໃຫ້ມີຄວາມວ່ອງໄວ, ມີຄຸນນະພາບດີຂຶ້ນ ເຊິ່ງບົດຮຽນທີ່ນໍາມາສະເໜີ ຕິດພັນໂດຍກົງໃນການປະຕິບັດພາລະບົດບາດຂອງກົມສື່ມວນຊົນ ກໍຄື ສື່ມວນຊົນຂອງສະພາປະຊາຊົນຂັ້ນແຂວງ ເພື່ອເຮັດໃຫ້ວຽກງານໄດ້ຮັບການຈັດຕັ້ງປະຕິບັດຢ່າງມີຜົນສໍາເລັດ.

ຜູ້ເຂົ້າຮ່ວມໄດ້ຮັບຟັງການສະເໜີບົດກ່ຽວກັບບົດບາດຂອງເພດຍິງ ແລະ ຄວາມສະເໝີພາບລະຫວ່າງຍິງ-ຊາຍໃນສັງຄົມ; ການເປັນໂຄສົກ, ພິທີກອນ ຂອງລາຍການວິທະຍຸ-ໂທລະພາບ; ເຕັກນິກໃນການສຳພາດ; ການຕັດຕໍ່ ແລະ ຖ່າຍວິດີໂອ ແບບມືອາຊີບ. ຈາກນັ້ນ, ໄດ້ມີການແບ່ງກຸ່ມເພື່ອເຝິກຫັດປະຕິບັດຕົວຈິງ ພ້ອມທັງກວດແກ້ ແລະ ສົນທະນາຖາມ-ຕອບໃນຫົວຂໍ້ທີ່ມີຄວາມສົນໃຈ.

ການເຝິກອົບຮົມຄັ້ງນີ້ ໄດ້ຮັບການສະໜັບສະໜູນຊ່ວຍເຫຼືອທາງດ້ານງົບປະມານຈາກໂຄງການສ້າງຄວາມເຂັ້ມແຂງໃຫ້ແກ່ສະພາແຫ່ງຊາດ ແລະ ສະພາປະຊາຊົນຂັ້ນແຂວງ ຫຼື ສະເຕັບສ໌ (STEPs) ໂດຍຜ່ານກອງເລຂາຄຸ້ມຄອງແຫຼ່ງທຶນຊ່ວຍເຫຼືອລ້າໃຫ້ແກ່ສະພາແຫ່ງຊາດ ສົມທົບກັບງົບປະມານຂອງຄະນະເລຂາທິການສະພາແຫ່ງຊາດ.

(ນາງ ອາລິນ ສຸພິມມະປະດິດ)