
ຕອນບ່າຍຂອງວັນທີ 23 ຕຸລາ 2023 ຢູ່ຫ້ອງປະຊຸມສະພາປະຊາຊົນແຂວງ, ໜ່ວຍພັກສະພາປະຊາຊົນແຂວງ ໄດ້ເຜີຍແຜ່ເອກະສານມູນເຊື້ອວັນປະກາດເອລາດ ຄົບຮອບ 78 ປີ(12 ຕຸລາ 1945 -12 ຕຸລາ 2023) ໂດຍການເປັນປະທານຂອງສະຫາຍ ທອງຄານ ວັດສະດາກອນ ເລຂາໜ່ວຍພັກສະພາປະຊາຊົນແຂວງ, ມີສະຫາຍ ຄໍາດີ ວົງລ້ອມ ຮອງເລຂາພັກແຂວງ, ບັນດາສະຫາຍຄະນະພັກ, ສະມາຊິກພັກສົມບູນ ແລະ ສໍາຮອງ ພາຍໃນໜ່ວຍພັກສະພາປະຊາຊົນແຂວງ ເຂົ້າຮ່ວມຢ່າງພ້ອມພຽງ.

ສະຫາຍເລຂາໜ່ອຍພັກ ໄດ້ເຜີຍແຜ່ເອກະສານມູນເຊື້ອວັນປະກາດເອລາດ ຄົບຮອບ 78 ປີ(12 ຕຸລາ 1945 -12 ຕຸລາ 2023) ຈຸດປະສົງ, ແມ່ນເພື່ອເປັນການຈັດຕັ້ງປະຕິບັດຕາມແຈ້ງການຂອງຄະນະໂຄສະນາອົບຮົມແຂວງ ແລະ ເພື່ອທົບທວນຫວນຄືນມູນເຊື້ອວັນປະກາດເອກະລາດ ໃຫ້ສະມາຊິກພັກ, ພະນັກງານ ໃຫ້ຮັບຮູ້ເຂົ້າ ໃຈກ່ຽວກັບປະຫວັດສາດ, ມູນເຊື້ອຂອງບັນດາຜູ້ນຳແນວລາວຮັກຊາດ, ນັກຮົບ ແລະ ປະຊາຊົນລາວບັນດາເຜົ່າ ທີ່ອຸທິດເລືອດເນື້ອເຫື່ອແຮງເພື່ອປະເທດຊາດເພື່ອການປະຕິວັດປົດປ່ອຍຊາດ, ເພື່ອສະແດງຄວາມຮູ້ບຸນຄຸນຕໍ່ບັນດານັກຮົບທີ່ເສຍສະຫຼະຊີວິດ, ອຸທິດເລືອດເນື້ອເຫື່ອແຮງເຂົ້າໃນພາລະກິດປະຕິວັດ, ປຸກລະດົມໃຫ້ຄົນຮຸ່ນຫຼັງຮັບຮູ້, ຮ່ຳຮຽນເອົາຄຸນງາມຄວາມດີຂອງພວກເພິ່ນ ແລະ ເພື່ອປຸກລະດົມສະມາຊິກພັກ, ພະນັກງານໃຫ້ຮັກສາ ແລະ ເສີມຂະຫຍາຍມູນເຊື້ອຮັກຊາດ, ມູນເຊື້ອແຫ່ງຄວາມສາມັກຄີປອງດອງ, ມູນເຊື້ອແຫ່ງການສູ້ຮົບອາດຫານຂອງປວງຊົນລາວທັງຊາດພາຍໃຕ້ການນຳພາຂອງພັກ ແນໃສ່ສ້າງໃຫ້ມີທັດສະນະທີ່ຖືກຕ້ອງເປັນເອກະພາບພາຍໃນພັກ, ພາຍໃນສັງຄົມພ້ອມທັງຍົກສູງຄວາມສາມາດນໍາພາ ແລະ ລັກສະນະນຳຫນ້າຂອງພັກ, ເພີ່ມທະວີມະຫາສາມັກຄີທົ່ວປວງຊົນລາວ.

ຫຼັງຈາກນັ້ນ, ຕາງໜ້າຄະນະພັກໄດ້ຜ່ານຮ່າງບົດສະຫຼຸບການເຄື່ອນໄຫວນໍາພາ-ຊີ້ນໍາ ຂອງຄະນະໜ່ວຍພັກສະພາປະຊາຊົນແຂວງ ປະຈໍາເດືອນ ຕຸລາ ແລະ ວາງທິດທາງແຜນການເດືອນ ພະຈິກ 2023 ພ້ອມທັງເປີດກ້ວາງໃຫ້ຜູ້ເຂົ້າຮ່ວມປະກອບຄໍາຄິດຄໍາເຫັນຕໍ່ເນື້ອໃນຂອງຮ່າງບົດສະຫຼຸບດັ່ງກ່າວຢ່າງກົງໄປກົງມາ, ຕໍານິສົ່ງຂ່າວເຊິ່ງກັນ ແລະ ກັນ, ຕີລາຄາຄືນໃນການນໍາພາ-ຊີ້ນໍາ ຂອງຄະນະໜ່ວຍພັກສະພາປະຊາຊົນແຂວງຜ່ານມາ, ເພື່ອເຫັນໄດ້ດ້ານດີຜົນງານ, ຂໍ້ຄົງຄ້າງ ແລະ ເພື່ອຊອກຫາວິທີທາງແກ້ໄຂໃນຕໍ່ໜນ້າ ໃຫ້ດີຂຶ້ນກວ່າເກົ່າ.

ພາບ/ຂ່າວ: ສະພາປະຊາຊົນແຂວງ.