(ສພຊ) ວັນທີ 3 ມີນາ 2022 ທ່ານ ນາງ ປິ່ງຄຳ ລາຊະສິມມາ ເລຂາທິການສະພາແຫ່ງຊາດ ທັງເປັນສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 11 ແຂວງບໍລິຄຳໄຊ; ທ່ານ ເລື່ອນວິໄລ ຈັນທະລາພັນ ຮອງປະທານຄະນະສະມາຊິກສະພາແຫ່ງຊາດປະຈຳເຂດເລືອກຕັ້ງ ທັງເປັນຮອງປະທານສະພາປະຊາຊົນແຂວງບໍລິຄຳໄຊ ພ້ອມດ້ວຍຄະນະ ໄດ້ເຄື່ອນໄຫວພົບປະປະຊາຊົນ, ເຜີຍແຜ່ຜົນສຳເລັດກອງປະຊຸມສະໄໝສາມັນເທື່ອທີ 2 ຂອງສະພາແຫ່ງຊາດ (ສພຊ) ຊຸດທີ IX ແລະ ສະພາປະຊາຊົນແຂວງ (ສພຂ) ບໍລິຄຳໄຊ ຊຸດທີ II ຢູ່ບ້ານທົ່ງນາມີ ເມືອງປາກກະດິງ ແຂວງບໍລິຄຳໄຊ.
ໂອກາດນີ້, ໄດ້ຮັບຟັງລາຍງານສະພາບລວມຂອງບ້ານທົ່ງນາມີ ຈາກທ່ານຮອງນາຍບ້ານດັ່ງກ່າວ; ຈາກນັ້ນ, ຄະນະສະມາຊິກສະພາແຫ່ງຊາດປະຈຳເຂດເລືອກຕັ້ງ ໄດ້ຜັດປ່ຽນກັນເຜີຍແຜ່ຜົນສຳເລັດກອງປະຊຸມສະໄໝສາມັນເທື່ອທີ 2 ຂອງ ສພຊ ຊຸດທີ IX ແລະ ສພຂ ບໍລິຄຳໄຊ ຊຸດທີ II ແລະ ຍັງໄດ້ໃຫ້ຮູ້ເຖິງພາລະບົດບາດ, ສິດ ແລະ ໜ້າທີ່ຂອງ ສພຊ ແລະ ສພຂ, ແນວທາງນະໂຍບາຍຂອງພັກ, ລະບຽບກົດໝາຍຂອງລັດ, ແຜນພັດທະນາເສດຖະກິດ-ສັງຄົມ, ເນື້ອໃນຂອງ 2 ວາລະແຫ່ງຊາດ ຄື: ການແກ້ໄຂບັນຫາຂໍ້ຫຍຸ້ງຍາກທາງດ້ານເສດຖະກິດ-ການເງິນ, ການສະກັດກັ້ນ ແລະ ແກ້ໄຂບັນຫາຢາເສບຕິດ ໃຫ້ປະຊາຊົນພາຍໃນບ້ານ ໄດ້ຮັບຮູ້ ແລະ ເຂົ້າໃຈ; ພ້ອມດຽວກັນນັ້ນ, ປະຊາຊົນພາຍໃນບ້ານ ກໍໄດ້ມີຄຳຄິດຄຳເຫັນ, ຄຳສະເໜີຈຳນວນໜຶ່ງ ເຊິ່ງມີ​ບາງຄໍາສະເໜີແມ່ນຄະນະມາຊິກສະພາແຫ່ງຊາດປະຈຳເຂດເລືອກຕັ້ງ ໄດ້ອະທິບາຍ ແລະ ຊີ້ແຈງໃຫ້ປະຊາຊົນຮັບຮູ້ ​ແລະ ​ເຂົ້າ​ໃຈ.
ໃນວັນດຽວກັນ, ຄະນະ ຍັງໄດ້ເຄື່ອນໄຫວຕິດຕາມກວດກາ ຢູ່ດ່ານທ່າສະອາດ ແລະ ໄດ້ຮັບຟັງການລາຍງານສະພາບການເຄື່ອນໄຫວຂອງດ່ານໃນໄລຍະຜ່ານມາ ໂດຍສະເພາະພາຍຫຼັງການແຜ່ລະບາດຂອງພະຍາດໂຄວິດ-19.

(ພາບ ແລະ ຂ່າວ: ອຸ່ນແກ້ວ ນິນລະວົງ)