(ສພຂ) – ວັນທີ 13-15 ມັງກອນ 2025 ທີ່ສະໂມສອນແຂວງຫຼວງນ້ຳທາ, ສະ ໂມສອນເມືອງລອງ, ສະໂມສອນເມືອງສິງ ແລະ ບ້ານພະຍາຫຼວງຄໍາປິງ; ທ່ານ ພົຕ. ປອ. ວົງສັກ ພັນທະວົງ ຄະນະປະຈຳສະພາແຫ່ງຊາດ (ສພຊ), ປະທານກຳມາທິການປ້ອງກັນຊາດ-ປ້ອງກັນຄວາມສະຫງົບ, ສະມາຊິກສະພາແຫ່ງຊາດ (ສສຊ) ປະຈຳເຂດເລືອກຕັ້ງທີ 3, ທ່ານ ຄຳຟອງ ອິນມານີ ປະທານສະພາປະຊາຊົນແຂວງ (ສພຂ) ພ້ອມດ້ວຍສະມາຊິກສະພາປະຊາຊົນແຂວງ (ສສຂ) ໄດ້ເຜີຍແຜ່ເນື້ອໃນຜົນສໍາເລັດຂອງກອງປະຊຸມສະໄໝສາມັນເທື່ອທີ 8 ຂອງ ສພຊ ຊຸດທີ IX ແລະ ຂອງ ສພຂ ຫຼວງນໍ້າທາ ຊຸດທີ II ເຊິ່ງມີນາຍ ແລະ ພົນທະຫານ, ນາຍ ແລະ ພົນຕຳຫຼວດຂອງແຂວງ, ການນໍາ ແລະ ພະນັກງານຫຼັກແຫຼ່ງຂອງເມືອງ, ຄະນະພັກຮາກຖານກຸ່ມບ້ານ, ອຳ ນາດການປົກຄອງບ້ານ ພ້ອມດ້ວຍປະຊາຊົນ ເຂົ້າຮ່ວມຢ່າງຫຼວງຫຼາຍ.

ທ່ານ ພົຕ. ປອ. ວົງສັກ ພັນທະວົງ ໄດ້ເຜີຍແຜ່ເນື້ອໃນຜົນສຳເລັດຂອງກອງປະຊຸມສະໄໝສາມັນເທື່ອທີ 8 ຂອງ ສພຊ ຊຸດທີ IX ເຊິ່ງໄດ້ພິຈາລະນາ, ຮັບຮອງເອົາວຽກງານສຳຄັນຂອງຊາດ ເປັນຕົ້ນ: ການຈັດຕັ້ງປະຕິບັດແຜນພັດທະນາເສດຖະ ກິດ-ສັງຄົມແຫ່ງຊາດ ແລະ ແຜນງົບປະມານແຫ່ງລັດ ປະຈຳປີ 2024, ຜົນການກວດສອບບົດສະຫຼຸບຂາດຕົວການຈັດຕັ້ງປະຕິບັດແຜນງົບປະມານແຫ່ງລັດ ປະຈຳ ປີ 2023, ວິໄສທັດຮອດປີ 2040 ແລະ ຍຸດທະສາດການຄຸ້ມຄອງ ແລະ ການພັດທະ ນາທີ່ດິນກະສິກຳ ຮອດປີ 2030, ບົດລາຍງານຂອງລັດຖະບານກ່ຽວກັບການຈັດຕັ້ງປະຕິບັດວຽກງານ 3 ສ້າງ.

ທ່ານ ຄຳຟອງ ອິນມານີ ໄດ້ເຜີຍແຜ່ເນື້ອໃນຜົນສຳເລັດຂອງກອງປະຊຸມສະ ໄໝສາມັນເທື່ອທີ 8 ຂອງ ສພຂ ຫຼວງນໍ້າທາ ຊຸດທີ II ເຊິ່ງໄດ້ພິຈາລະນາ ແລະ ຮັບ ຮອງເອົາບັນຫາສໍາຄັນຂອງແຂວງ ເປັນຕົ້ນ: ວຽກງານອົງການປົກຄອງແຂວງ ປະ ຈຳປີ 2024 ແລະ ທິດທາງແຜນການປີ 2025; ວຽກງານໄອຍະການ ແລະ ສານປະ ຊາຊົນແຂວງ, ວຽກງານສະພາປະຊາຊົນແຂວງ ປະຈຳປີ 2024 ແລະ ທິດທາງແຜນ ການປີ 2025; ຂໍ້ຕົກລົງຂອງເຈົ້າແຂວງ ວ່າດ້ວຍກອງທຶນສົ່ງເສີມ ແລະ ພັດທະນາກິ ລາກາຍຍະກໍາຂອງແຂວງ (ສະບັບປັບປຸງ) ແລະ ຂໍ້ຕົກລົງຂອງເຈົ້າແຂວງ ວ່າດ້ວຍກອງທຶນຄວບຄຸມ, ສະກັດກັ້ນ ແລະ ຕ້ານຢາເສບຕິດ (ສະບັບປັບປຸງ); ລາຍງານກ່ຽວ ກັບການຈັດຕັ້ງປະຕິບັດແຜນຟື້ນຟູ-ປັບປຸງຊີວິດການເປັນຢູ່ຂອງປະຊາຊົນທີ່ຖືກຜົນກະທົບຈາກໂຄງການກໍ່ສ້າງເຂື່ອນໄຟຟ້ານໍ້າທາ 1 ເມືອງນາແລ ໄລຍະທີ 1 (2020 -2023) ແລະ ແຜນການໄລຍະທີ 2 (2025-2028).

ທ່ານ ພົຈວ. ປອ. ວັນທອນ ສຸລິສັກ ສສຊ ປະຈຳເຂດເລືອກຕັ້ງທີ 3 ໄດ້ລາຍ ງານກ່ຽວກັບການແກ້ໄຂບັນຫາສິ່ງເສບຕິດ, ຂໍ້ຫຍຸ້ງຍາກ ແລະ ຜົນສຳເລັດອັນພົ້ນເດັ່ນຂອງການຈັດຕັ້ງປະຕິບັດວາລະແຫ່ງຊາດ ວ່າດ້ວຍແກ້ໄຂບັນຫາຢາເສບຕິດ ແລະ ການຈັດຕັ້ງປະຕິບັດແຜນການໃນປີ 2025.

ໂອກາດນີ້ ຍັງໄດ້ມອບເຄື່ອງນຸ່ງຫົ່ມມີເສື້ອກັນໜາວ; ອຸປະກອນການຮຽນມີປຶ້ມຂຽນ, ບິກ, ບັນທັດ ແລະ ລົດຖີບ ເພື່ອແຈກຢາຍໃຫ້ນັກຮຽນຜູ້ດ້ອຍໂອກາດ ແລະ ຊູກຍູ້ຜູ້ຮຽນດີຮຽນເກັ່ງ. ນອກນັ້ນ, ຍັງໄດ້ມອບຄອມພິວເຕີ ແລະ ງົບປະມານ ໃຫ້ແກ່ ສສຂ ເພື່ອນຳໃຊ້ເຂົ້າໃນວຽກງານ.

(ນາງ ວັນນີ ແຝງບົວວັນ)