ໃນວັນທີ 23 ພຶດສະພາ 2024 ນີ້, ທ່ານ ຄໍາແພງ ວິລະພັນ ກໍາມະການຄະນະປະຈໍາ ສະພາແຫ່ງຊາດ ປະທານກໍາມາທິການຍຸຕິທໍາ ພ້ອມດ້ວຍຄະນະ ໄດ້ເຄື່ອນໄຫວເຜີຍແຜ່ກົດໝາຍວ່າດ້ວຍ ການແກ້ໄຂຄໍາຮ້ອງທຸກ (ສະບັບປັບປຸງ ປີ 2022) ຢູ່ທີ່ສະໂມສອນເມືອງສາລະວັນ ແຂວງສາລະວັນ, ເຂົ້າຮ່ວມຕ້ອນຮັບ ແລະ ຮັບຟັງຂອງທ່ານ ຂັນໄຊ ລັດຖະເຮົ້າ ຄະນະປະຈໍາພັກແຂວງ ຮອງປະທານຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 14 ຮອງປະທານສະພາປະຊາຊົນແຂວງສາລະວັນ; ມີທ່ານສະມາຊິກສະພາປະຊາຊົນແຂວງ, ມີບັນດາທ່ານຕາງໜ້າຈາກພະແນກການອ້ອມຂ້າງແຂວງ, ອົງການທຽບເທົ່າຂັ້ນແຂວງ, ສະພາທະນາຍຄວາມ, ບັນດາທ່ານນາຍບ້ານອ້ອມຂ້າງເມືອງ ເຂົ້າຮ່ວມຮັບຟັງໃນຄັ້ງນີ້;

ໃນວາລະຂອງກອງປະຊຸມ  ທ່ານ ຄໍາແພງ ວິລະພັນ ໄດ້ກ່າວຈຸດປະສົງຂອງການມາເຄື່ອນໄຫວໃນຄັ້ງນີ້ວ່າ: ການເຜີຍແຜ່ໃນຄັ້ງນີ້ ແມ່ນມີຄວາມຫມາຍສໍາຄັນ ເພາະເນື້ອໃນກົດໝາຍສະບັບນີ້ ແມ່ນຕິດພັນກັບການປະຕິບັດ ພາລະບົດບາດ, ສິດ ແລະ ໜ້າທີ່ ຂອງທຸກອົງການຈັດຕັ້ງຂອງລັດ, ພາກສ່ວນທຸລະກິດ ລວມໄປ ເຖິງປະຊາຊົນລາວບັນດາເຜົ່າ, ຍ້ອນເຫັນໄດ້ຄວາມສໍາຄັນດັ່ງກ່າວຈຶ່ງຈໍາເປັນຕ້ອງມີການເຜີຍແຜ່ ກົດໝາຍສະບັບນີ້ໃຫ້ກັບ ຄະນະນໍາຂອງ ແຂວງ, ເມືອງ, ພະນັກງານ-ລັດຖະກອນ ໂດຍສະເພາະ ແມ່ນຜູ້ທີ່ຮັບຜິດຊອບວຽກງານການແກ້ໄຂຄໍາຮ້ອງທຸກ ແລະ ພໍ່ແມ່ປະຊາຊົນບັນດາເຜົ່າໃນຂອບເຂດທົ່ວປະເທດ ໄດ້ຮັບຮູ້ ແລະ ເຂົ້າໃຈເນື້ອໃນໃຫ້ມີຄວາມເປັນເອກະພາບກັນໃນການນໍາໃຊ້ ແລະ ຈັດຕັ້ງປະຕິບັດກົດໝາຍສະບັບນີ້ໃຫ້ເຂັ້ມງວດ; ກອງປະຊຸມຄັ້ງນີ້ ພວກເຮົາຈະໃຊ້ເວລາໃນການເຜີຍແຜ່ພຽງແຕ່ເຄິ່ງວັນ, ພາຍຫຼັງສໍາເລັດການເຜີຍແຜ່ ແມ່ນຈະໄດ້ແລກປ່ຽນຄໍາເຫັນກັນ ກ່ຽວກັບເນື້ອໃນ ກົດໝາຍ ທີ່ບັນດາທ່ານຍັງ ມີຄວາມສົນໃຈ; ຈຶ່ງຂໍຮຽກຮ້ອງມາຍັງບັນດາທ່ານ ຄະນະນໍາ, ສະມາຊິກສະພາແຫ່ງຊາດ, ສະມາຊິກສະພາປະຊາຊົນແຂວງ, ຜູ້ແທນກອງປະຊຸມ ຈົ່ງພ້ອມກັນຮັບຟັງ ແລະ ເຊື່ອມຊຶມ ບັນດາເນື້ອໃນກົດໝາຍໄປພ້ອມກັນ ແນ່ໃສ່ເຮັດໃຫ້ການຈັດຕັ້ງຜັນຂະຫຍາຍ ກໍ່ຄືການຈັດຕັ້ງປະຕິບັດ ມີປະສິດທິພາບ, ມີປະສິດທິຜົນ ແລະ ເຂັ້ມງວດຕາມກົດໝາຍໄດ້ກໍານົດ;

ຈາກນັ້ນ, ທ່ານ ນາງ  ຄອນສະຫວັນ ທຳມະວົງ ຮອງຫົວໜ້າກົມຄຳຮ້ອງຂໍຄວາມເປັນທໍາ ຂອງກໍາມາທິການຍຸຕິທໍາ ສະພາແຫ່ງຊາດ ໄດ້ຂຶ້ນສະເໜີເຜີຍແຜ່ເນື້ອໃນຂອງກົດໝາຍວ່າດ້ວຍ ການແກ້ໄຂຄໍາຮ້ອງທຸກ (ສະບັບປັບປຸງ ປີ 2022) ປະກອບມີ 8 ພາກ, 6 ໝວດ, 49 ມາດຕາ ໂດຍເນື້ອໃນ ໄດ້ກໍານົດ ຫຼັກການ, ລະບຽບການ ແລະ ມາດຕະການ ກ່ຽວກັບ ການພິຈາລະນາ ແລະ ແກ້ໄຂຄໍາຮ້ອງທຸກ, ຄຸ້ມຄອງ ແລະ ຕິດຕາມກວດກາ ການຕົກລົງກ່ຽວກັບ ການພິຈາລະນາ ແລະ ແກ້ໄຂຄໍາຮ້ອງທຸກ ຂອງບຸກຄົນ, ຕິນິບຸກຄົນ ຫຼື ການຈັດຕັ້ງ ເພື່ອໃຫ້ຖືກຕ້ອງຕາມກົດໝາຍ ແນໃສ່ເພີ່ມທະວີນິຕິທໍາ, ປົກປັກຮັກສາຜົນປະໂຫຍດຂອງລັດ, ລວມໝູ່, ສິດ ແລະ ຜົນປະໂຫຍດອັນຊອບທໍາຂອງພົນລະເມືອງ ປະກອບສ່ວນເຮັດໃຫ້ສັງຄົມ ມີຄວາມສະຫງົບ, ເປັນລະບຽບຮຽບຮ້ອຍ, ຍຸຕິທໍາ ແລະ ສີວິໄລ, ນອກນັ້ນ, ເນື້ອໃນຂອງກົດໝາຍ ມີຫຼາຍມາດຕາໄດ້ຖືກປັບປຸງເນື້ອໃນ ແລະ ເພີ່ມເຂົ້າໃໝ່ບາງມາດຕາ ລ້ວນແຕ່ມີຄວາມໝາຍຄວາມສໍາຄັນ ແລະ ກົດໝາຍສະບັບນີ້ ປ່ຽນແທນກົດໝາຍ ວ່າດ້ວຍການແກ້ໄຂຄໍາຮ້ອງທຸກ ສະບັບເລກທີ 05/ສພຊ ລົງວັນທີ 9 ພະຈິກ 2016; ຫຼັງຈາກນັ້ນ, ປະທານກອງປະຊຸມກໍ່ໄດ້ຕັ້ງຄໍາຖາມ ແລະ ລົງເລິກເຈາະຈິມບາງບັນຫາທີ່ພົບເຫັນໃນການຈັດຕັ້ງປະຕິບັດຕົວຈິງ ເພື່ອໃຫ້ຜູ້ທີ່ເຂົ້າຮ່ວມໄດ້ສົນທະນາແລກປ່ຽນຮ່ວມກັນ;

ພາບ-ຂ່າວ: ດີລໍາພົນ ພົມມະຈັນ