(ສພຊ) – ຕອນເຊົ້າວັນພຸດທີ 4 ທັນວາຜ່ານມາ ທີ່ນະຄວນຫຼວງຮ່າໂນ້ຍ, ຫ້ອງວ່າການສະພາແຫ່ງຊາດຫວຽດນາມ ແລະ ມະຫາວິທະຍາໄລຮ່າໂນ້ຍ ໄດ້ຈັດພິທີເປີດຊຸດຮຽນພາສາຫວຽດນາມໄລຍະສັ້ນ ໃຫ້ແກ່ພະນັກງານສະພາແຫ່ງຊາດລາວ ຈຳນວນ 12 ສະຫາຍ, ຍິງ 6 ສະຫາຍ ເຊິ່ງເປັນໜຶ່ງໃນບັນດາການເຄື່ອນໄຫວປະຕິບັດຕາມຂໍ້ຕົກລົງການຮ່ວມມືລະຫວ່າງຫ້ອງວ່າການສະພາແຫ່ງຊາດຫວຽດນາມ ແລະ ຄະນະເລຂາທິການສະພາແຫ່ງຊາດລາວ.

ສະຫາຍ ຫງວຽນ ແໝ້ງ ຮຸ່ງ (Nguyễn Mạnh Hùng) ຮອງຫົວໜ້າຫ້ອງວ່າການສະພາແຫ່ງຊາດຫວຽດນາມ ກ່າວຄຳເຫັນໃນພິທີເປີດຊຸດຮຽນວ່າ: ໃນຊຸມປີມໍ່ໆມານີ້, ການຮ່ວມມື ຫວຽດນາມ-ລາວ ໃນທຸກຂົງເຂດ ໄດ້ຮັບການເພີ່ມທະວີຂຶ້ນສູ່ລະດັບສູງໃໝ່ຢ່າງຕໍ່ເນື່ອງ; ຫ້ອງວ່າການສະພາແຫ່ງຊາດຫວຽດນາມ ແລະ ຄະນະເລຂາທິການສະພາແຫ່ງຊາດລາວ ໄດ້ມີການເຄື່ອນໄຫວຮ່ວມມືກັນຫຼາຍຢ່າງ, ປະກອບສ່ວນຢ່າງຕັ້ງໜ້າເຂົ້າໃນການຊຸກຍູ້ການພົວພັນຕ່າງປະເທດລະຫວ່າງສະພາແຫ່ງຊາດສອງປະເທດ. ສະຫາຍເນັ້ນໜັກວ່າ ພາສາແມ່ນ “ກຸນແຈ” ໃນການຕິດຕໍ່ພົວພັນ, ແລກປ່ຽນລະຫວ່າງປະຊາຊົນ; ເຊື່ອໝັ້ນວ່າ ຜ່ານຫຼັກສູດພາສາຫວຽດນາມ, ພະນັກງານຂອງຄະນະເລຂາທິການສະພາແຫ່ງຊາດລາວ ຈະຮັກແພງພາສາຫວຽດນາມ, ເຂົ້າໃຈວັດທະນະທໍາຫວຽດນາມຫຼາຍຂຶ້ນກວ່າເກົ່າ ໂດຍສະເພາະໄດ້ປະກອບສ່ວນຢ່າງຕັ້ງໜ້າໃຫ້ແກ່ການປະຕິບັດບັນດາການເຄື່ອນໄຫວຮ່ວມມືລະຫວ່າງສອງອົງການເສນາທິການຊ່ວຍວຽກຂອງສະພາແຫ່ງຊາດ 2 ປະເທດ. ຫ້ອງວ່າການສະພາແຫ່ງຊາດຫວຽດນາມ ແລະ ບັນດາອາຈານມະຫາວິທະຍາໄລຮ່າໂນ້ຍ ພ້ອມແລ້ວທີ່ຈະສະໜັບສະໜູນ ແລະ ສ້າງສະພາບແວດລ້ອມດ້ານພາສາທີ່ດີທີ່ສຸດໃຫ້ແກ່ນັກສຶກສາ ເພື່ອບັນລຸເປົ້າໝາຍຂອງຫຼັກສູດ.

ສະຫາຍ ເລືອງ ຫງັອກ ມິງ (Lương Ngọc Minh) ຮອງອະທິການບໍດີມະຫາວິທະຍາໄລຮ່າໂນ້ຍ ໃຫ້ຮູ້ວ່າ: ຫຼັກສູດເຝິກອົບຮົມພາສາຫວຽດນາມໃຫ້ແກ່ພະນັກງານຄະນະເລຂາທິການສະພາແຫ່ງຊາດລາວ ໄດ້ຮັບການອອກແບບມາເປັນພິເສດເພື່ອຕອບສະໜອງຄວາມຮຽກຮ້ອງຕ້ອງການສະເພາະຂອງຜູ້ຮຽນ, ຊ່ວຍໃຫ້ນັກສຶກສາຫຼັງຈາກຮຽນຈົບຫຼັກສູດ ສາມາດນໍາໃຊ້ໂຄງສ້າງພາສາທີ່ຫຼາກຫຼາຍໃນພາສາຫວຽດນາມໄດ້ຢ່າງຄ່ອງແຄ້ວ ເພື່ອແລກປ່ຽນ ແລະ ແບ່ງປັນຂໍ້ມູນຂ່າວສານ; ມະຫາວິທະຍາໄລຮ່າໂນ້ຍ ໃຫ້ຄຳໝັ້ນສັນຍາວ່າຈະສ້າງເງື່ອນໄຂທີ່ດີທີ່ສຸດທາງດ້ານອາຈານ, ສິ່ງອຳນວຍຄວາມສະດວກ, ບໍລິການສະໜັບສະໜູນນັກສຶກສາ ເພື່ອບັນລຸເປົ້າໝາຍຂອງຫຼັກສູດ.

ຫຼັກສູດດັ່ງກ່າວຈະເລີ່ມແຕ່ວັນນີ້ຈົນເຖິງເດືອນມິຖຸນາ 2025.