ໃນການຢ້ຽມຂໍ່ານັບຄັ້ງນີ້, ສອງຝ່າຍໄດ້ສະແດງຄວາມຍິນດີຕໍ່ສາຍພົວພັນມິດຕະພາບທີ່ມີມາແຕ່ດົນນານ ແລະ ການຮ່ວມມືທີ່ມີໝາກຜົນລະຫວ່າງສາທາລະນະລັດ ປະຊາທິປະໄຕ ປະຊາຊົນລາວ ກັບ ສາທາລະນະລັດ ສະຫະພັນເຢຍລະມັນ; ໄລຍະຜ່ານມາ ເຢຍລະມັນ ໄດ້ໃຫ້ການຊ່ວຍເຫຼືອລາວທາງດ້ານການສຶກສາ, ການພັດທະນາໂຄງລ່າງພື້ນຖານ, ການສົ່ງເສີມການຜະລິດຂະໜາດກາງ-ຂະໜາດນ້ອຍ ເຊິ່ງໄດ້ປະກອບສ່ວນໃນການພັດທະນາເສດຖະກິດ-ສັງຄົມ ສປປລາວ ໃຫ້ດີຂຶ້ນ.

ທ່ານປະທານກໍາມາທິການການຕ່າງປະເທດ ໄດ້ສະແດງຄວາມຂອບໃຈຕໍ່ທ່ານຮອງລັດຖະມົນຕີກະຊວງການຕ່າງປະເທດເຢຍລະມັນ ທີ່ໄດ້ຍາດເວລາມາຢ້ຽມຢາມສະພາແຫ່ງຊາດລາວ ເຊິ່ງເປັນການແລກປ່ຽນຄໍາຄິດຄຳເຫັນໃນວຽກງານການພົວພັນຮ່ວມມືທາງດ້ານການເມືອງ ເຊິ່ງເຫັນວ່າມີຫຼາຍຄະ ນະຜູ້ແທນຂອງ ສສ.ເຢຍລະມັນ ໄດ້ມາຢ້ຽມຢາມ ສປປລາວ ເປັນການແລກປ່ຽນທັດສະນະຮ່ວມກັນຢ່າງສ້າງສັນ; ເພື່ອຊຸກຍູ້ໃຫ້ການຮ່ວມມືໄດ້ມີຜົນປະໂຫຍດໃນດ້ານອື່ນຕື່ມອີກ, ທ່ານປະທານກໍາມາທິການການຕ່າງປະເທດ ສະເໜີໃຫ້ສອງຝ່າຍຊຸກຍູ້ວຽກງານການຄ້າ, ການລົງທຶນ ແລະ ການທ່ອງທ່ຽວ ລະ ຫວ່າງລາວ-ເຢຍລະມັນ ໃຫ້ມີການຂະຫຍາຍຕົວກວ້າງຂຶ້ນຕື່ມ ແລະ ມີຜົນປະໂຫຍດຮ່ວມກັນຂອງສອງປະເທດ. ພ້ອມກັນນີ້, ຍັງໄດ້ແຈ້ງກ່ຽວກັບການຫັນ ສປປລາວ ຈາກປະເທດທີ່ບໍ່ມີທາງອອກສູ່ທະເລ ມາເປັນປະເທດເຊື່ອມຈອດ, ເຊື່ອມໂຍງ ລະຫວ່າງອາຊຽນ ແລະ ພາກພື້ນໃນໂລກ ໂດຍຜ່ານເສັ້ນທາງລົດໄຟລາວ-ຈີນ ເຊິ່ງເປັນການປະກອບສ່ວນໃຫ້ແກ່ການເຊື່ອມໂຍງລະຫວ່າງອາຊຽນ ແລະ ເອີ ຣົບ ເວົ້າລວມ, ເວົ້າສະເພາະ ລະຫວ່າງລາວ ແລະ ເຢຍລະມັນ.

ທ່ານຮອງລັດຖະມົນຕີກະຊວງການຕ່າງປະເທດເຢຍລະມັນ ກໍໄດ້ແລກປ່ຽນຄໍາເຫັນຢ່າງກົງໄປກົງມາ ແລະ ເຫັນດີຄວນໃຫ້ເສີມຂະຫຍາຍການພົວພັນຮ່ວມມືໃນຂົງເຂດອື່ນໆ, ມີການແລກປ່ຽນສິນຄ້າ ແລະ ແລກປ່ຽນຄະນະຜູ້ແທນສະພາການຄ້າຮ່ວມກັນ ເພື່ອຊອກຊ່ອງທາງການຮ່ວມມືທາງການຄ້າ ແລະ ການລົງທຶນ.

(ຂ່າວ: ກົມພົວພັນລັດຖະສະພາຫຼາຍຝ່າຍ, ກຳມາທິການການຕ່າງປະເທດ; ພາບ: ອານຸສອນ ພູມມີທອນ)