ເພື່ອຕິດຕາມການຈັດຕັ້ງປະຕິບັດກົດໝາຍວ່າດ້ວຍການປະຕິບັດຄຳຕັດສິນຂອງສານ ສະບັບປັບປຸງປີ 2021 ທັງເປັນການເພີ່ມທະວີການຕິດຕາມກວດກາ ແລະ ຊຸກຍູ້ການຈັດຕັ້ງປະຕິບັດຄຳຕັດສິນຂອງສານ ແນໃສ່ຮັບປະກັນເຮັດໃຫ້ຄຳຕັດສິນຂອງສານທີ່ໃຊ້ໄດ້ຢ່າງເດັດຂາດ ໄດ້ຮັບການປະຕິບັດຢ່າງເຂັ້ມງວດ, ຄົບຖ້ວນ, ຖືກຕ້ອງຕາມຄຳຕັດສິນ ແລະ ກົດໝາຍທີ່ກຳນົດໄວ້; ເພື່ອເປັນຂໍ້ມູນພື້ນຖານກະກຽມລາຍງານຕໍ່ກອງປະຊຸມຄະນະປະຈຳສະພາແຫ່ງຊາດ ກໍຄືກອງປະຊຸມສະໄໝສາມັນເທື່ອທີ 7 ຂອງ ສພຊ ຊຸດທີ IX ແລະ ເປັນບ່ອນອີງໃນການປຶກສາຫາລື ແລະ ສະເໜີພາກສ່ວນກ່ຽວຂ້ອງ ຄົ້ນຄວ້າມາດຕະການແກ້ໄຂ.
ໃນວັນທີ 4 ເມສາ 2024 ທ່ານ ປອ. ນາງ ສູນທອນ ໄຊຍະຈັກ ເລຂາທິການສູນກາງພັກ ຮອງປະທານສະພາແຫ່ງຊາດ ແລະ ທ່ານ ຄຳແພງ ວິລະພັນ ປະທານກຳມາທິການຍຸຕິທຳ ພ້ອມຄະນະຕິດຕາມ ໄດ້ເຄື່ອນໄຫວເຮັດວຽກຢູ່ແຂວງອັດຕະປື ເຊິ່ງໄດ້ຈັດກອງປະຊຸມຕິດຕາມກວດກາການຈັດຕັ້ງປະຕິບັດຄຳຕັດສິນຂອງສານ ທີ່ຫ້ອງປະຊຸມສະພາປະຊາຊົນແຂວງ ໂດຍການເຂົ້າຮ່ວມຂອງທ່ານ ນາງ ມີນາພອນ ໄຊສົມພູ ຮອງເລຂາພັກແຂວງ ປະທານສະພາປະຊາຊົນແຂວງ, ບັນດາທ່ານຮອງປະທານສະພາປະຊາຊົນແຂວງ, ສະມາຊິກສະພາແຫ່ງຊາດປະຈຳເຂດເລືອກຕັ້ງທີ 17, ຕາງໜ້າຈາກສານປະຊາຊົນແຂວງ, ໄອຍະການປະຊາຊົນແຂວງ, ກອງບັນຊາການທະຫານ ແຂວງ, ບັນດາພາກສ່ວນທີ່ກ່ຽວຂ້ອງເຂົ້າຮ່ວມ.
ທັງນີ້ ກໍເພື່ອປຶກສາຫາລື, ແລກປ່ຽນຄວາມເຫັນກ່ຽວກັບວຽກງານການຕິດຕາມກວດກາການຈັດຕັ້ງປະຕິບັດຄໍາ ຕັດສິນຂອງສານທີ່ໄດ້ຈັດຕັ້ງປະຕິບັດໃນໄລຍະຜ່ານມາ ເພື່ອໃຫ້ເຫັນເຖິງບັນດາຂໍ້ສະດວກ, ຂໍ້ຫຍຸ້ງຍາກ, ດ້ານດີ, ດ້ານຄົງຄ້າງ, ສາເຫດທີ່ພາໃຫ້ການຕັດສິນຄະດີຈຳນວນໜຶ່ງແກ່ຍາວ, ບໍ່ສາມາດຈັດຕັ້ງປະຕິບັດໄດ້, ສິ່ງທ້າທາຍຕ່າງໆ ແລະ ບາງບົດຮຽນທີ່ຖອດຖອນໄດ້ ແນໃສ່ສ້າງຄວາມເປັນເອກະພາບສູງໃນການຈັດຕັ້ງປະຕິບັດ, ເຮັດໃຫ້ທົ່ວສັງຄົມມີສະຕິເຄົາລົບ, ປະຕິບັດລັດຖະທຳມະນູນ ແລະ ກົດໝາຍໃຫ້ສູງຂຶ້ນ, ມີປະສິດທິພາບ ແລະ ປະສິດທິຜົນ.
ກອງປະຊຸມໄດ້ຮັບຟັງການລາຍງານຂອງພະແນກຍຸຕິທໍາແຂວງ ກ່ຽວກັບການຈັດຕັ້ງຜັນຂະຫຍາຍກົດໝາຍວ່າ ດ້ວຍການຈັດຕັ້ງປະຕິບັດຄໍາຕັດສິນຂອງສານ ສະບັບປັບປຸງປີ 2021 ແລະ ສະພາບການຈັດຕັ້ງປະຕິບັດວຽກງານປະຕິ ບັດຄໍາຕັດສິນຂອງສານແຕ່ລະຂັ້ນ; ການລາຍງານຂອງກອງບັນຊາການ ປກສ ແຂວງ ກ່ຽວກັບສະພາບການຈັດຕັ້ງປະຕິບັດ ດໍາລັດວ່າດ້ວຍຊັບສິນທີ່ຖືກຢຶດ, ອາຍັດ ແລະ ຮິບເປັນຂອງລັດ ສະບັບເລກທີ 280/ນຍ, ລົງວັນທີ 09/8/2022 ເຊິ່ງໄດ້ ຍົກໃຫ້ເຫັນຂໍ້ສະດວກ, ຂໍ້ຫຍຸ້ງຍາກ, ດ້ານດີ, ດ້ານຄົງຄ້າງ, ສາເຫດທີ່ໃຫ້ມີການແກ່ຍາວ, ບໍ່ສາມາດຈັດຕັ້ງປະຕິບັດໄດ້, ສິ່ງທ້າທາຍຕ່າງໆ, ບາງບົດຮຽນທີ່ຖອດຖອນໄດ້ ແລະ ທິດທາງແກ້ໄຂວຽກງານດັ່ງກ່າວໃນຕໍ່ໜ້າ ເພື່ອເຮັດໃຫ້ການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມດ້ວຍກົດໝາຍມີຄວາມເຂັ້ມງວດ, ສັກສິດກວ່າເກົ່າ. ພ້ອມກັນນີ້, ຍັງໄດ້ຮັບຟັງການປະກອບຄວາມເຫັນຂອງທ່ານຮອງເຈົ້າແຂວງ ຜູ້ຊີ້ນໍາວຽກງານຍຸຕິທໍາ ແລະ ຂອງຂະແໜງການທີ່ກ່ຽວຂ້ອງ ທີ່ເປັນປະ ໂຫຍດຫຼາຍໃຫ້ແກ່ກອງປະຊຸມຄັ້ງນີ້.
ທ່ານ ປອ. ນາງ ສູນທອນ ໄຊຍະຈັກ ຍັງໄດ້ເນັ້ນໜັກຕື່ມກ່ຽວກັບການປະຕິບັດກົດໝາຍວ່າດ້ວຍການຈັດຕັ້ງປະຕິບັດຄໍາຕັດສິນຂອງສານ; ດໍາລັດວ່າດ້ວຍຊັບສິນທີ່ຖືກຢຶດ, ອາຍັດ ແລະ ຮິບເປັນຂອງລັດ; ສະພາບການຈັດຕັ້ງປະ ຕິບັດວຽກງານປະຕິບັດຄໍາຕັດສິນຂອງສານແຕ່ລະຂັ້ນ ເຫັນວ່າຍັງມີຂໍ້ຫຍຸ້ງຍາກ, ດ້ານຄົງຄ້າງ ແລະ ສິ່ງທ້າທາຍຕ່າງໆ ຈຶ່ງສະເໜີໃຫ້ຄະນະພັກ, ຄະນະນຳແຕ່ລະຂັ້ນ ເປັນເຈົ້າການນຳພາ-ຊີ້ນຳການຈັດຕັ້ງຜັນຂະຫຍາຍໃຫ້ເຂົ້າສູ່ລວງເລິກ ແລະ ເປັນຮູບປະທຳເທື່ອລະກ້າວ, ການແບ່ງຂັ້ນຄຸ້ມຄອງຕ້ອງໃຫ້ລະອຽດຈະແຈ້ງເພື່ອເປັນເອກະພາບກັນໃນການຈັດ ຕັ້ງປະຕິບັດບັນດານິຕິກຳຕ່າງໆໃຫ້ເຂັ້ມງວດ ແລະ ສັກສິດ. ໃຫ້ຄະນະນຳສະພາປະຊາຊົນແຂວງ ເອົາໃຈໃສ່ຕິດຕາມກວດກາການຈັດຕັ້ງປະຕິບັດບັນດານິຕິກຳໃຕ້ກົດໝາຍຂອງແຂວງ ໃຫ້ແທດເໝາະກັບຕົວຈິງຕື່ມ ໂດຍສະເພາະນິຕິກຳທີ່ຕິດພັນກັບການຈັດຕັ້ງປະຕິບັດຄໍາຕັດສິນຂອງສານຂັ້ນຕ່າງໆ ເຊິ່ງເຫັນວ່າຍັງມີຫຼາຍດ້ານ, ຫຼາຍບັນຫາ ໄດ້ມີນິຕິກໍາຄົບຖ້ວນແລ້ວ ແຕ່ການຈັດຕັ້ງປະຕິບັດຕົວຈິງບໍ່ເຂັ້ມງວດ, ບໍ່ເດັດຂາດ, ບໍ່ໂປ່ງໃສ, ບາງກໍລະນີກໍບໍ່ສາມາດປະຕິບັດໄດ້. ເອົາ ໃຈໃສ່ວຽກງານການສ້າງ, ປັບປຸງນິຕິກຳ ຫຼື ການທາບທາມນິຕິກໍາ ລວມທັງການໂຄສະນາເຜີຍແຜ່ ໃຫ້ມີຄວາມວ່ອງໄວ, ຕໍ່ເນື່ອງ, ທັນກໍານົດເວລາ, ກວ້າງຂວາງ ແລະ ເຂົ້າເຖິງທຸກເປົ້າໝາຍ ທັງພາກລັດ, ເອກະຊົນ ແລະ ປະຊາຊົນລາວບັນ ດາເຜົ່າ ດ້ວຍຫຼາຍຮູບການ; ພ້ອມກັນນັ້ນ, ກໍໃຫ້ຈັດສັນດ້ານງົບປະມານ, ພາຫະນະ, ອຸປະກອນຮັບໃຊ້ໄວ້ແຕ່ຫົວທີ ເພື່ອສະໜອງໃຫ້ແກ່ການຈັດຕັ້ງປະຕິບັດວຽກງານດັ່ງກ່າວ ໃຫ້ມີປະສິດທິພາບ ແລະ ມີປະສິດທິຜົນ.
(ພາບ-ຂ່າວ: ວິນັດ ສີສຸລາດ).