ໃນໂອກາດທີ່ທ່ານ ຄໍາໃບ ດໍາລັດ ກໍາມະການສູນກາງພັກ ຮອງປະທານສະພາແຫ່ງຊາດ ພ້ອມດ້ວຍຄະນະ ໄດ້ເຄ່ືອນໄຫວເຮັດວຽກຢູ່ທີ່ແຂວງສາລະວັນ, ໂດຍທ່ານໄດ້ມີຄໍາເຫັນ ໂອ້ລົມເນັ້ນໃຫ້ອົງການປົກຄອງແຂວງສາລະວັນ ເອົາໃຈໃສ່ 4 ວຽກງານແກ້ໄຂບັນຫາການສຶກສາ ຄື: 1.ທິດທາງແກ້ໄຂຕໍ່ໜ້າ ມອບໃຫ້ຄະນະປະຈໍາພັກແຂວງ ຄົ້ນຄວ້າແບ່ງຄວາມຮັບຜິດຊອບຢ່າງຊັດເຈນພາຍໃນຄະນະປະຈໍາພັກແຂວງ ຊີ້ນໍາຄະນະປະຈໍາພັກເມືອງ ລົງເລິກວຽກງານສຶກສາ ຕິດພັນກັບການສ້າງຂະບວນການ ກະກຽມກອງປະຊຸມໃຫຍ່ 3 ຂັ້ນຂອງພັກ ໂດຍການປຸກລະດົມທຸກວິທີທາງໃຫ້ນ້ອງນັກຮຽນກັບເຂົ້າມາຮຽນເປັນປົກກະຕິ; 2.ດ້ານຄຸນນະພາບການຮຽນ-ການສອນ ຂອງຄູ-ອາຈານ ຊັ້ນປະຖົມ, ມັດທະຍົມ ຕ້ອງໄດ້ມີການຄົ້ນຄວ້າຍົກສູງຄຸນນະພາບໃຫ້ດີຂຶ້ນຕື່ມ; 3.ກວດຄືນລະບົບການຈັດຕັ້ງຢູ່ຂັ້ນຮາກຖານບ້ານ ຕ້ອງມີກົດລະບຽບບ້ານເພື່ອຄຸ້ມຄອງພໍ່ແມ່ປະຊາຊົນ ແລະ ຕິດຕາມລູກຫຼານທີ່ມີປະກົດການຫຍໍ້ທໍ້ພາຍໃນບ້ານ, ຄົ້ນຄວ້າປະຕິບັດນະໂຍບາຍໃຫ້ແກ່ນັກຮຽນວິຊາຊີບ, ນັກຮຽນຊົນເຜົ່າ, ອາດຕ້ອງປຸກສ້າງຫໍພັກນັກຮຽນມາຈາກບ່ອນຮ່າງໄກໃຫ້ມີບ່ອນພັກເຊົາ; 4.ສົມທົບກັບນັກທຸລະກິດ ເພື່ອຊ່ວຍເຫຼືອທຶນພັດທະນາການສຶກສາ, ປັບປຸງສະພາບແວດລ້ອມຂອງໂຮງຮຽນໃຫ້ດີສາມາດດຶງດູດໃຫ້ນັກຮຽນຢາກກັບມາເຂົ້າຮຽນໃຫ້ຈົບຊັ້ນ.

ກອງປະຊຸມຕິດຕາມກວດກາ ການຈັດຕັ້ງປະຕິບັດຍຸດທະສາດການປະຕິຮູບການສຶກສາ ແລະ ການພັດທະນາຊັບພະຍາກອນມະນຸດ ແຫ່ງຊາດ ໄລຍະຜ່ານມາ ຈັດຂຶ້ນຕອນເຊົ້າຂອງວັນທີ 12 ກັນຍາ 2024, ຢູ່ທີ່ຫ້ອງປະຊຸມ VIP ຊັ້ນ II ຂອງສະໂມສອນແຂວງແຂວງສາລະວັນ ໂດຍການເປັນປະທານຂອງທ່ານ ຄໍາໃບ ດໍາລັດ ກໍາມະການສູນກາງພັກ ຮອງປະທານສະພາແຫ່ງຊາດ, ເຂົ້າຮ່ວມຂອງທ່ານ ສີເຮັງ ຫອມສົມບັດ ຮອງເລຂາພັກແຂວງ ປະທານສະພາປະຊາຊົນແຂວງ, ທ່ານ ສົມໃຈ ອຸ່ນຈິດ ຮອງເຈົ້າແຂວງ ຜູ້ຊີ້ນໍາຂົງເຂດວຽກງານວັດທະນະທໍາ-ສັງຄົມ, ຮອງປະທານກໍາມາທິການວັດທະນະທໍາ-ສັງຄົມ, ຫົວໜ້າກົມ ຈາກສະພາແຫ່ງຊາດ, ມີບັນດາທ່ານຄະນະປະຈໍາສະພາປະຊາຊົນແຂວງ, ປະທານ-ຮອງປະທານຄະນະກໍາມະການ, ຄະນະເລຂາທິການ, ບັນດາທ່ານຕາງໜ້າຈາກພະແນກການທີ່ກ່ຽວຂ້ອງ, ອົງການຈັດຕັ້ງມະຊົນ.

ພາບ-ຂ່າວ: ດີລໍາພົນ ພົມມະຈັນ