(ສພຊ) – ເພື່ອຕິດຕາມກວດການການຈັດຕັ້ງປະຕິບັດວຽກງານ 3 ສ້າງ, ວັນອາທິດທີ 29 ກັນຍາຜ່ານມາ, ທ່ານ ສົມມາດ ພົລເສນາ ກໍາມະການສູນກາງພັກ, ຮອງປະທານສະພາແຫ່ງຊາດ ພ້ອມດ້ວຍຄະນະ ເຊິ່ງປະກອບມີທ່ານ ປອ. ສຸວັນນີ ໄຊຊະນະ ຮອງເລຂາພັກແຂວງ, ປະທານຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 11; ຮອງປະທານກໍາມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ; ຮອງປະທານກໍາມາທິການບັນດາເຜົ່າ; ສະມາຊິກສະພາປະຊາຊົນແຂວງປະຈໍາເມືອງປາກຊັນ; ຕາງໜ້າຫ້ອງວ່າການສູນກາງພັກ, ກະຊວງປ້ອງກັນປະເທດ, ກະຊວງປ້ອງກັນຄວາມສະຫງົບ ແລະ ກະຊວງພາຍໃນ ພ້ອມດ້ວຍພະນັກງານທີ່ກ່ຽວຂ້ອງຈາກສະພາແຫ່ງຊາດ ແລະ ສະພາປະຊາຊົນແຂວງບໍລິຄໍາໄຊ ໄດ້ພົບປະອໍານາດການປົກຄອງບ້ານບົວແວງຄໍາ ເມືອງປາກຊັນ ແຂວງບໍລິຄໍາໄຊ.
ຕາງໜ້າຄະນະນໍາເມືອງປາກຊັນ ໄດ້ລາຍງານກ່ຽວກັບການຈັດຕັ້ງປະຕິບັດວຽກງານ 3 ສ້າງ ເຊິ່ງມີບາງຕອນວ່າ: ການແບ່ງຂັ້ນຄຸ້ມຄອງຂອງບັນດາຂະແໜງການຕາມທິດ 3 ສ້າງເຂົ້າສູ່ລວງເລິກ ແມ່ນຮຽກຮ້ອງໃຫ້ມີການປັບປຸງແກ້ໄຂລະບຽບການ, ກົນໄກ ແລະ ນິຕິກໍາຈໍານວນໜຶ່ງ ທີ່ຍັງອັດຕັນ; ພ້ອມນີ້ ກໍມີການຄົ້ນຄວ້າຄວາມອາດສາມາດ, ທ່າແຮງຂອງຕົນ ກ່ຽວກັບສິດ ແລະ ຄວາມຮັບຜິດຊອບທີ່ສາມາດປະຕິບັດໄດ້, ເສີມຂະຫຍາຍສິດເປັນເຈົ້າຕົນເອງ ພ້ອມທັງສ້າງຄວາມເຂັ້ມແຂງໃຫ້ແກ່ເມືອງ, ບ້ານ ຜ່ານການຈັດຕັ້ງປະຕິບັດວຽກງານຕົວຈິງທີ່ແຂວງມອບໃຫ້ເມືອງ, ເມືອງມອບໃຫ້ບ້ານ ຢູ່ບັນດາຫ້ອງການອ້ອມຂ້າງເມືອງ. ອໍານາດການປົກຄອງເມືອງປາກຊັນ ໄດ້ເອົາໃຈໃສ່ຄຸ້ມຄອງໂຄງການລົງທຶນຂອງລັດທັງພາຍໃນ ແລະ ຕ່າງປະເທດ ເປັນຕົ້ນແມ່ນການປະຕິບັດໂຄງການມູນຄ່າ 5 ຕື້ລົງມາ; ການເງິນເມືອງໄດ້ເປັນເຈົ້າການໃນການສົມທົບກັບພະແນກການເງິນແຂວງ ໃນການຄົ້ນຄວ້າສັງລວມສ້າງແຜນລາຍຮັບ-ລາຍຈ່າຍຂອງເມືອງ ໂດຍອີງໃສ່ທ່າແຮງບົ່ມຊ້ອນທີ່ມີຢູ່ພາຍໃນເມືອງ ເປັນຫົວໜ່ວຍການຈັດເກັບລາຍຮັບເຂົ້າງົບປະມານຕາມແຜນລາຍຮັບຂອງປີ 2024; ເມືອງໄດ້ລົງທຶນປັບປຸງກໍ່ສ້າງຍົກລະດັບພື້ນຖານໂຄງລ່າງດ້ານເສດຖະກິດເພື່ອຮັບໃຊ້ການຜະລິດ ແລະ ການດໍາລົງຊີວິດຂອງປະຊາຊົນບັນດາເຜົ່າ, ມີເສັ້ນທາງທຽວໄດ້ຕະຫຼອດປີ ໃນ 54 ບ້ານ ເທົ່າກັບ 100%; ເມືອງໄດ້ມີແຜນສ້າງຄວາມເຂັ້ມແຂງດ້ານເສດຖະກິດ-ການເງິນ ໂດຍອີງໃສ່ທ່າແຮງບົ່ມຊ້ອນຂອງເມືອງ ແລະ ໄດ້ສົມທົບກັບບັນດາຫ້ອງການທີ່ກ່ຽວຂ້ອງຂັ້ນເມືອງ ໃນການສົ່ງເສີມການຜະລິດສິນຄ້າຕາມຄວາມຕ້ອງການຂອງຕະຫຼາດ ເຊິ່ງສະແດງອອກເຊັ່ນ: ເນື້ອທີ່ນາແຊງມີ 450 ເຮັກຕາ (ທຽບໃສ່ປີ ຜ່ານມາຫຼຸດລົງ 15 ເຮັກຕາ) ສະເລ່ຍລາຍຮັບໄດ້ 4.3 ໂຕນ/ເຮັກຕາ, ເນື້ອທີ່ປູກພືດລະດູແລ້ງ 2,230 ເຮັກຕາ (ທຽບໃສ່ປີຜ່ານມາເພີ່ມຂຶ້ນ 10 ເຮັກຕາ); ເມືອງໄດ້ຂຶ້ນທະບຽນອອກໃບຕາດິນຕາມລະບຽບກົດໝາຍ 1,500 ຕອນ (ທຽບໃສ່ປີຜ່ານມາເພີ່ມຂຶ້ນ 593 ຕອນ), ຢັ້ງຢືນສໍາມະໂນຕອນດິນອອກໃບແຈ້ງ 146 ຕອນ (ທຽບໃສ່ປີຜ່ານມາຫຼຸດລົງ 79 ຕອນ); ເມືອງໄດ້ອຳນວຍຄວາມສະດວກຕໍ່ກັບການສົ່ງເສີມການຜະລິດສິນຄ້າຂອງປະຊາຊົນເຊັ່ນ: ຕະຫຼາດຮອງຮັບ ແລະ ການຊອກຫາແຫຼ່ງທຶນນະໂຍບາຍໃຫ້ແກ່ປະຊາຊົນພາຍໃນເມືອງ.
ຕາງໜ້າຄະນະອົງການປົກຄອງບ້ານບົວແວງຄໍາ ໄດ້ລາຍງານກ່ຽວກັບສະພາບການພົ້ນເດັ່ນບາງດ້ານ ແລະ ການ ຈັດຕັ້ງປະຕິບັດວຽກງານ 3 ສ້າງ ເຊິ່ງບ້ານບົວແວງຄໍາ ມີພົນລະເມືືອງ 2,500 ກວ່າຄົນ, ມີ 540 ກວ່າຄອບຄົວ; ໃນໄລຍະຜ່ານມາ, ພື້ນຖານໂຄງລ່າງຂອງບ້ານໄດ້ຮັບການພັດທະນາ ເປັນຕົ້ນແມ່ນເສັ້ນທາງ ເຮັດໃຫ້ການສັນຈອນໄປມາມີຄວາມສະ ດວກສະບາຍ, ຄວາມທຸກຍາກຂອງປະຊາຊົນໄດ້ຮັບການແກ້ໄຂຢ່າງຈິງຈັງ ແລະ ກວ້າງຂວາງ. ປະຊາຊົນມີຄວາມຕື່ນຕົວຢ່າງຕັ້ງໜ້າໃນການພັດທະນາເສດຖະກິດຄອບຄົວຂອງຕົນ, ສ່ວນໃຫຍ່ມີອາຊີບປູກຝັງ ໂດຍສະເພາະແມ່ນປູກເຂົ້ານາປີ; ນອກນັ້ນ ຍັງເຮັດສວນມັນຕົ້ນ, ສວນຢາງພາລາ ໄປຄຽງຄູ່ກັບການລ້ຽງສັດເປັນສໍາຮອງ ແລະ ຍັງມີການບໍລິການຈໍານວນໜຶ່ງ ເຮັດໃຫ້ຊີວິດການເປັນຢູ່ນັບມື້ນັບດີຂຶ້ນຢ່າງບໍ່ຢຸດຢັ້ງ.
ໃນໂອກາດດັ່ງກ່າວ, ຄະນະຂອງທ່ານຮອງປະທານສະພາແຫ່ງຊາດ ໄດ້ມອບອຸປະກອນການຮຽນ-ການສອນ ແລະ ເຄື່ອງບໍລິໂພກຈໍານວນໜຶ່ງ ໃຫ້ແກ່ອົງການປົກຄອງບ້ານບົວແວງຄໍາ ກໍຄືຄູສອນ ແລະ ນ້ອງນັກຮຽນພາຍໃນບ້ານ.
ຈາກນັ້ນ, ທ່ານຮອງປະທານສະພາແຫ່ງຊາດ ພ້ອມດ້ວຍຄະນະ ໄດ້ຢ້ຽມຢາມ, ຊຸກຍູ້ຫົວໜ່ວຍທຸລະກິດຕົວແບບຂອງແຂວງບໍລິຄໍາໄຊຈໍານວນໜຶ່ງ ເປັນຕົ້ນໂຮງງານຜະລິດໝໍ້ແປງໄຟຟ້າເອັສເຄ (SK) ທີ່ເມືອງປາກຊັນ ໂດຍການຕ້ອນຮັບຂອງທ່ານ ໄຊຍະເພັດ ຈັນທິສອນ ຜູ້ອຳນວຍການໃຫຍ່ໂຮງງານດັ່ງກ່າວ; ທັງນີ້, ກໍເພື່ອເປັນການຊຸກຍູ້ສົ່ງເສີມ ແລະ ໃຫ້ກໍາໃຈແກ່ຫົວໜ່ວຍທຸລະກິດທີ່ເປັນຕົວແບບ ໃຫ້ເສີມຂະຫຍາຍມູນເຊື້ອ ແລະ ຕັ້ງໜ້າສືບຕໍ່ປະກອບສ່ວນສ້າງເສດຖະກິດຂອງແຂວງຂອງຊາດໃຫ້ເຂັ້ມແຂງຂຶ້ນເລື້ອຍໆ.
(ບຸນເກີດ ວົງໄຊຍາ)