ທ່ານ ຄໍາໃບ ດໍາລັດ ໄດ້ຕາງໜ້າຄະນະຜູ້ແທນ ກໍຄືສະພາແຫ່ງຊາດລາວ ຂຶ້ນມີຄໍາເຫັນຕໍ່ພິທີເປີດງານດັ່ງກ່າວ ເຊິ່ງໄດ້ຕີລາຄາສູງຕໍ່ງານສັບປະດາຄັ້ງນີ້ ແມ່ນການຊຸກຍູ້ໃຫ້ບັນດາປະເທດອາຊຽນ ແລະ ສປຈີນ ສົ່ງເສີມການພົວພັນຮ່ວມມື, ແລກປ່ຽນດ້ານການສຶກສາ, ຍົກສູງການນຳໃຊ້ລະບົບດິຈິຕອນໃນການສຶກສາ, ຮ່ວມມືດ້ານການຄົ້ນຄວ້າວິທະ ຍາສາດ, ແລກປ່ຽນວັດທະນະທໍາອັນດີງາມ ແລະ ກິລາ, ແລກປ່ຽນລະຫວ່າງປະຊາຊົນກັບປະຊາຊົນ ແລະ ອື່ນໆ ໃຫ້ມີການຂະຫຍາຍຕົວຢ່າງຕໍ່ເນື່ອງ ຈາກຂະໜາດນ້ອຍເປັນຂະໜາດໃຫຍ່, ຫັນປ່ຽນຮູບແບບການສຶກສາສະເພາະ ເປັນເວທີແລກປ່ຽນວັດທະນະທໍາມະນຸດ, ຮູບແບບການຮ່ວມມື ກໍໄດ້ມີການພັດທະນາຂະຫຍາຍກວ້າງອອກໄປເຖິງບັນດາປະ ເທດລຽບຕາມແລວການຈັດຕັ້ງປະຕິບັດຂໍ້ລິເລີ່ມ “ໜຶ່ງແລວ ໜຶ່ງເສັ້ນທາງ”; ພ້ອມດຽວກັນນີ້, ງານສັບປະດາການແລກປ່ຽນດ້ານສຶກສາ ອາຊຽນ-ຈີນ ຍັງຈັດຕັ້ງຜັນຂະຫຍາຍຂໍ້ລິເລີ່ມໃນການສ້າງສະຫະພັນການສຶກສາອາຊີບ, ການສຶກສາດິຈິຕອນ, ສະຖາບັນທີ່ມີສີສັນ ແລະ ອື່ນໆ ລະຫວ່າງອາຊຽນ ແລະ ສປຈີນ ເພື່ອເສີມສ້າງສັນຕິພາບ, ຄວາມສະຫງົບ, ຄວາມຈະເລີນຮຸ່ງເຮືອງ, ຄວາມສວຍງາມ ແລະ ມິດຕະພາບ ໃຫ້ນັບມື້ເຕີບໃຫຍ່ຂະຫຍາຍຕົວຍິ່ງໆຂຶ້ນ.

ສປປລາວ ຍາມໃດກໍຖືສຳຄັນວຽກງານການສຶກສາ ຖືເປັນວຽກງານໃຈກາງຂອງການພັດທະນາຊັບພະຍາ ກອນມະນຸດ ໃຫ້ມີຄຸນນະພາບ, ມີລັກສະນະຊາດ, ວິທະຍາສາດ, ມະຫາຊົນ ແລະ ທັນສະໄໝ, ຕອບສະໜອງການພັດທະນາເສດຖະກິດ-ສັງຄົມໃຫ້ຍືນຍົງ, ການຫັນເປັນອຸດສາຫະກຳ ແລະ ທັນສະໄໝ, ການເຊື່ອມໂຍງ-ເຊື່ອມຈອດໃນພາກພື້ນ ແລະ ສາກົນ; ໃນນາມເປັນສະມາຊິກອາຊຽນ, ສປປລາວ ໄດ້ເຂົ້າຮ່ວມຢ່າງຕັ້ງໜ້າໃນການຊຸກຍູ້ສາຍພົວ ພັນມິດຕະພາບ ແລະ ການເປັນຄູ່ຮ່ວມຍຸດທະສາດຮອບດ້ານ ລະຫວ່າງອາຊຽນ-ຈີນ ດ້ວຍການເຄົາລົບຫຼັກການພື້ນ ຖານຂອງການພົວພັນສາກົນ, ຮ່ວມມືກັນຕ່າງຝ່າຍຕ່າງມີຜົນປະໂຫຍດ.

ການເຄື່ອນໄຫວຄັ້ງນີ້, ຄະນະໄດ້ພົບປະສະຫາຍ ຕິງ ຈົງຫຼີ ຮອງປະທານສະພາຜູ້ແທນປະຊາຊົນທົ່ວປະເທດແຫ່ງ ສປຈີນ ເຊິ່ງສະຫາຍໄດ້ສະແດງຄວາມຂອບໃຈ ແລະ ຕີລາຄາສູງຕໍ່ຄະນະຜູ້ແທນສະພາແຫ່ງຊາດລາວ ທີ່ໄດ້ເຂົ້າຮ່ວມງານສັບປະດາການແລກປ່ຽນດ້ານການສຶກສາ ອາຊຽນ-ຈີນ ຄັ້ງທີ 17 ປະຈໍາປີ 2024; ສະຫາຍ ຄໍາໃບ ດໍາລັດ ໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ແລະ ຕີລາຄາສູງຕໍ່ການເປັນເຈົ້າພາບຈັດງານສັບປະດາການແລກ ປ່ຽນດ້ານການສຶກສາ ອາຊຽນ-ຈີນ ປະຈໍາປີນີ້. ສອງຝ່າຍມີຄວາມພາກພູມໃຈເປັນຢ່າງຍິ່ງທີ່ເຫັນວ່າ ສປປລາວ ແລະ ສປຈີນ ເປັນປະເທດເພື່ອນມິດສະຫາຍ, ບ້ານໃກ້ເຮືອນຄຽງ ທີ່ມີສາຍພູ ແລະ ແມ່ນໍ້າຕິດຈອດກັນ, ມີສາຍພົວພັນທີ່ເປັນມູນເຊື້ອມາແຕ່ບູຮານນະການ ເຊິ່ງຜ່ານມາ ການນຳຂັ້ນສູງທັງສອງປະເທດ ໂດຍແມ່ນສະຫາຍ ສີ ຈິ້ນຜິງ ເລຂາທິ ການໃຫຍ່, ປະທານປະເທດແຫ່ງ ສປຈີນ ແລະ ສະຫາຍ ທອງລຸນ ສີສຸລິດ ເລຂາທິການໃຫຍ່, ປະທານປະເທດ ແຫ່ງ ສປປລາວ ໄດ້ລົງນາມໃນແຜນແມ່ບົດສະບັບໃໝ່ ວ່າດ້ວຍການສ້າງຄູ່ຮ່ວມຊາຕາກຳ ຈີນ-ລາວ, ລາວ-ຈີນ ເຊິ່ງເປັນພື້ນ ຖານອັນໜັກແໜ້ນໃຫ້ການພົວພັນຮ່ວມມືລະຫວ່າງສອງພັກ, ສອງລັດ ກໍຄືປະຊາຊົນສອງປະເທດ ໃນຍຸກສະໄໝໃໝ່; ພ້ອມດຽວກັນນັ້ນ ໃນປີ 2024 ແມ່ນປີແຫ່ງການໄປມາຫາສູ່ກັນລະຫວ່າງບັນດາປະເທດອາຊຽນ ແລະ ສປຈີນ ເຊິ່ງຈະເປັນໂອກາດອັນດີໃນການຊຸກຍູ້ການຮ່ວມມືໃນຂະແໜງການເສດຖະກິດ, ການຄ້າ-ການລົງທຶນ, ການສຶກສາ, ການພັດ ທະນາລະບົບພື້ນຖານໂຄງລ່າງ, ການທ່ອງທ່ຽວ ແລະ ຂະແໜງການອື່ນໆ ເພື່ອເປັນກຳລັງແຮງປະກອບສ່ວນສຳຄັນເຂົ້າໃນການກໍ່ສ້າງການເປັນຄູ່ຮ່ວມຍຸດທະສາດຮອບດ້ານ ອາຊຽນ-ຈີນ ເວົ້າລວມ, ເວົ້າສະເພາະແມ່ນຄູ່ຮ່ວມຊາຕາກໍາ ລະ ຫວ່າງ ລາວ-ຈີນ, ຈີນ-ລາວ ໃຫ້ນັບມື້ນັບພັດທະນາຍິ່ງໆຂຶ້ນ.

ຄະນະຍັງໄດ້ຢ້ຽມຢາມພົບປະສະຫາຍ ຊູ ລິນ ເລຂາພັກແຂວງ, ປະທານສະພາປະຊາຊົນແຂວງກຸ້ຍໂຈວ ເຊິ່ງສະຫາຍໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ການມາຢ້ຽມຢາມ ແລະ ເຮັດວຽກຂອງຄະນະຜູ້ແທນສະ ພາແຫ່ງຊາດລາວໃນຄັ້ງນີ້, ພ້ອມທັງແຈ້ງສະພາບການພັດທະນາເສດຖະກິດ-ສັງຄົມຂອງແຂວງໃຫ້ຊາບ; ແຂວງກຸ້ຍໂຈວ ພ້ອມຈະຮ່ວມກັບບັນດາແຂວງຂອງ ສປປລາວ ສືບຕໍ່ການໄປມາຫາສູ່, ລົງເລິກການຮ່ວມມືໃນຂົງເຂດເສດຖະ ກິດ-ການຄ້າ, ການລົງທຶນ, ການສຶກສາ, ການກະສິກຳ, ການທ່ອງທ່ຽວ ແລະ ຂົງເຂດອື່ນໆ ເພື່ອນໍາເອົາຄວາມຈະເລີນສີ ວິໄລມາສູ່ປະຊາຊົນສອງຊາດ ແລະ ປະກອບສ່ວນກໍ່ສ້າງການເປັນປະຊາຄົມຄູ່ຮ່ວມຊາຕາກຳ ຈີນ-ລາວ ໃຫ້ນັບມື້ນັບປາ ກົດຜົນເປັນຈິງ.

ສະຫາຍ ຄໍາໃບ ດຳລັດ ໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນດ້ວຍໄມຕີຈິດມິດຕະພາບ ແລະ ຕີລາຄາສູງຕໍ່ການເປັນເຈົ້າພາບຈັດງານສັບປະດາການແລກປ່ຽນດ້ານການສຶກສາ ອາຊຽນ-ຈີນ ຄັ້ງທີ 17 ປະຈໍາປີ 2024; ຕີລາຄາສູງຕໍ່ການພົວພັນມິດຕະພາບ ລາວ-ຈີນ ກໍຄືການພົວພັນມິດຕະພາບລະຫວ່າງແຂວງກັບແຂວງ, ເມືອງ ກັບເມືອງ ໂດຍສະເພາະແຂວງຫຼວງນໍ້າທາ, ແຂວງຈໍາປາສັກ ກັບ ແຂວງກຸ້ຍໂຈວ. ພ້ອມກັນນັ້ນ, ກໍຊຸກຍູ້ໃຫ້ບັນດາແຂວງຂອງ ສປປລາວ ກັບ ແຂວງກຸ້ຍໂຈວ ມີການພົວພັນ ແລະ ຮ່ວມມືທາງດ້ານການສຶກສາ, ການທ່ອງທ່ຽວ, ວັດທະ ນະທໍາ-ສັງຄົມ ແລະ ອື່ນໆ ໃຫ້ໄດ້ຮັບການພັດທະນາຍິ່ງໆຂຶ້ນ.

ທ່ານຮອງປະທານສະພາແຫ່ງຊາດລາວ ຍັງໄດ້ໃຫ້ສໍາພາດຕໍ່ສື່ມວນຊົນຈີນ ເປັນຕົ້ນ: ສຳນັກຂ່າວປະຊາຊົນຈີນ, ສຳນັກຂ່າວຊິນຮວາ, ສຳນັກຂ່າວຈົ່ງຊິນ ແລະ ສຳນັກຂ່າວກຸ້ຍໂຈວ ກ່ຽວກັບການເປັນປະທານໝູນວຽນອາຊຽນຂອງ ສປປລາວ; ການຂຶ້ນກ່າວປາໄສໃນພິທີເປີດງານສັບປະດາການແລກປ່ຽນດ້ານການສຶກສາ ອາຊຽນ-ຈີນ ແລະ ການພົວ ພັນຮ່ວມມືລະຫວ່າງ ສປປລາວ ແລະ ແຂວງກຸ້ຍໂຈວ ໃນອະນາຄົດ.

ນອກຈາກນັ້ນ, ຄະນະຜູ້ແທນຍັງໄດ້ເຄື່ອນໄຫວຢ້ຽມຢາມເຂດທ່ອງທ່ຽວເມືອງບູຮານຊິງຢ້ຽນ ແລະ ສູນເຝິກ ອົບຮົມການຄົມມະນາຄົມທາງລົດໄຟແຂວງກຸ້ຍໂຈວ ອີກດ້ວຍ.