ໃນລະຫວ່າງວັນທີ 5-8 ກຸມພາ 2024 ທ່ານ ຄໍາໃບ ດຳລັດ ກຳມະການສູນກາງພັກ ຮອງປະທານສະພາແຫ່ງຊາດ ຊຸດທີ IX ທັງເປັນສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 12 ແຂວງຄໍາມ່ວນ ພ້ອມດ້ວຍ ທ່ານ ບຸນມີ ພິມມະສອນ ຮອງເລຂາພັກແຂວງ ປະທານຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 12 ແຂວງຄໍາມ່ວນ, ມີສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 12 ແຂວງຄໍາມ່ວນ ແລະ ສະມາຊິກສະພາປະຊາຊົນຂັ້ນແຂວງປະຈໍາເຂດເລືອກຕັ້ງເມືອງ, ໄດ້ເຄື່ອນໄຫວຢ້ຽມຢາມ, ພົບປະຜູ້ມີສິດເລືອກຕັ້ງທີຕິດພັນກັບການຈັດຕັ້ງຜັນຂະຫຍາຍເຜີຍແຜ່ເນື້ອໃນຜົນສຳເລັດຂອງກອງປະຊຸມສະໄໝສາມັນເທື່ອທີ 6 ຂອງສະພາແຫ່ງຊາດ ຊຸດທີ IX ແລະ ກອງປະຊຸມສະໄໝສາມັນເທື່ອທີ 6 ຂອງສະພາປະຊາຊົນແຂວງຄໍາມ່ວນ ຊຸດທີ II, ຢູ່ 3 ເມືອງຄື: ເມືອງຍົມມະລາດ, ເມືອງນາກາຍ ແລະ ເມືອງຄູນຄໍາ, ໂດຍໄດ້ຮັບການຕ້ອນຮັບ ແລະເຂົ້າຮ່ວມເຮັດວຽກຂອງບັນດາທ່ານເຈົ້າເມືອງ ແລະ ຮອງເຈົ້າເມືອງ, ມີພະແນກການທີ່ກ່ຽວຂ້ອງຂອງແຂວງ, ພ້ອມດ້ວຍບັນດາທ່ານຄະນະປະຈໍາພັກເມືອງ, ກຳມະການພັກເມືອງ, ອະດີດການນຳຂອງເມືອງ, ກຳລັງປກຊ-ປກສ, ພະນັກງານຫຼັກແຫ່ງເມືອງ ແລະ ອຳນາດການປົກຄອງ, ຕະຫຼອດຮອດພໍ່ແມ່ປະຊາຊົນ, ເຂົ້າຮ່ວມທັງໝົດ 428 ເທື່ອຄົນ, ຍິງ 99 ເທື່ອຄົນ.
ໃນວາລະຂອງການຈັດຕັ້ງເຜີຍແຜ່ຜົນສຳເລັດ ກອງປະຊຸມສະພາໃນຄັ້ງນີ້ໄດ້ຮັບຟັງການລາຍງານໂດຍສັງເຂບຂອງບັນດາທ່ານເຈົ້າເມືອງ, ກ່ຽວກັບສະພາບທີ່ຕັ້ງ ແລະ ຈຸດພິເສດຂອງແຕ່ລະເມືອງ, ມີດ້ານການເມືອງ-ແນວຄິດ, ວຽກງານປ້ອງກັນຊາດ-ປ້ອງກັນຄວາມສະຫງົບ, ການພັດທະນາເສດຖະກິດ-ສັງຄົມທີຕິດພັນກັບສອງວາລະແຫ່ງຊາດກໍ່ຄືວາລະແຫ່ງຊາດວ່າດ້ວຍການແກ້ໄຂທາງດ້ານເສດຖະກິດ-ການເງິນ ແລະ ວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ ແລະ ທິດທາງແຜນການຈັດຕັ້ງປະຕິບັດວຽກງານໃນຕໍ່ໜ້າຂອງເມືອງ, ຊຶ່ງເຫັນໄດ້ດ້ານຈັດຕັ້ງປະຕິບັດມີທັງຂໍ້ສະດວກ ແລະ ຂໍ້ຄົງຄ້າງ, ມີວຽກງານຈຸດສຸມໃນຕໍ່ໜ້າທີ່ຈະຕ້ອງໃຫ້ສຳເລັດ. ກອງປະຊຸມໄດ້ຮັບຟັງຄຳຄິດ-ຄຳເຫັນ ແລະ ຄຳສະເໜີເປັນຕົ້ນ: ດ້ານການກໍ່ສ້າງພື້ນຖານໂຄງລ່າງ, ອາຄານແຜນຜັງເມືອງໃໝ່, ເສັ້ນທາງ-ຂົວ ແລະຊົນລະປະທານ, ທີ່ຄຽງຄູ່ກັບການປັບປຸງຊີວິດການເປັນຢູ່ ຂອງປະຊາຊົນຕໍ່ກັບສະພາບການເໜັງຕີງຂອງລາຄານໍ້າມັນເຊື້ອໄຟ, ລາຄາສິນຄ້າ, ອັດຕາແລກປ່ຽນ ແລະ ຄວາມຫຍຸ້ງຍາກອຶ່ນໆ ສົ່ງຜົນກະທົບສ້າງຄວາມເສຍຫາຍ ໃຫ້ແກ່ເສດຖະກິດ ແລະ ການດຳລົງຊີວິດຂອງປະຊາຊົນ ກໍຄືຂອງອົງການຈັດຕັ້ງພັກ-ລັດ ໃນການຮ່ວມກັນແກ້ໄຂບັນຫາທີ່ມີຄວາມຫຍຸ້ງຍາກໃຫ້ບັນລຸຜົນສຳເລັດຕາມຈຸດປະສົງລະດັບຄາດໝາຍ.
ຈາກນັ້ນ, ສະມາຊິກສະພາແຫ່ງຊາດ ປະຈໍາເຂດເລືອກທີ 12 ແຂວງຄໍາມ່ວນ, ເຜີຍແຜ່ຜົນສໍາເລັດຂອງກອງປະຊຸມສະໄໝສາມັນເທື່ອທີ 6 ຂອງ ສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງຄໍາມ່ວນ ຊຸດທີ II, ໂດຍໄດ້ຍົກໃຫ້ເຫັນກ່ຽວກັບບັນຫາສໍາຄັນຂອງຊາດ ເປັນຕົ້ນວຽກງານຂອງລັດຖະບານ, ວຽກງານຂົງເຂດສະພາແຫ່ງຊາດ, ການປັບປຸງ ແລະ ຮັບຮອງເອົາກົດໝາຍ, ຮັບຮອງເອົາບົດສະຫຼຸບຕີລາຄາການຈັດຕັ້ງປະຕິບັດ ວ່າດ້ວຍວາລະແຫ່ງຊາດ ກ່ຽວກັບການແກ້ໄຂຄວາມຫຍຸ້ງຍາກທາງດ້ານເສດຖະກິດ – ການເງິນ ແລະ ການແກ້ໄຂບັນຫາຢາເສບຕິດ ໄລຍະ 3 ປີຜ່ານມາ (2021-2023), ທິດທາງແຜນການຕິດຕາມກວດກາໃນຕໍ່ໜ້າຂອງສະພາ ແລະ ບັນດາເນື້ອໃນເອກະສານບົດລາຍງານຕ່າງໆທີ່ນຳເຂົ້າພິຈາລະນາ ແລະ ຮັບຮອງເອົາຢູ່ໃນກອງປະຊຸມ.
ທ່ານ ຄໍາໃບ ດຳລັດ ຮອງປະທານສະພາແຫ່ງຊາດ ກໍໄດ້ໂອ້ລົມຕໍ່ອຳນາດການປົກຄອງ ແລະ ພະນັກງານຫຼັກແຫຼ່ງຂອງເມືອງ, ທ່ານໄດ້ສະແດງຄວາມຍ້ອງ ຍໍຊົມເຊີຍຜົນງານອັນພົ້ນເດັ່ນຂອງເມືອງທີ່ຍາດມາໄດ້, ພ້ອມນັ້ນ, ທ່ານຍັງໄດ້ເນັ້ນໜັກໃຫ້ ເອົາໃຈໃສ່ຍົກສູງເປັນເຈົ້າການໃນການຈັດຕັ້ງປະຕິບັດກົດໝາຍ, ລັດຖະທຳມະນູນ, ມະຕິຂອງກອງປະຊຸມສະພາ 2 ຂັ້ນ ແລະ ເຊື່ອມຊຶມບັນດາມະຕິ, ຄໍາສັ່ງ, ຄໍາແນະນໍາຂອງກົມການເມືອງ ແລະ ຄະນະເລຂາທິການສູນກາງພັກວ່າດ້ວຍການກະກຽມ ແລະ ດຳເນີນກອງປະຊຸມໃຫຍ່ 3 ຂັ້ນ ເພື່ອຕັ້ງຫນ້າກະກຽມໃຫ້ດີ ແລະ ດຳເນີນໃຫ້ຖືກຕ້ອງ, ໃຫ້ເຂັ້ມງວດ, ສ້າງຄວາມເຂົ້າໃຈໃຫ້ປະຊາຊົນລາວບັນດາເຜົ່າໄດ້ຮັບຮູ້, ເຂົ້າໃຈກົດໝາຍ ແລະ ລັດຖະທຳມະນູນ ຢ່າງເລິກເຊິ່ງຍິ່ງຂຶ້ນ, ທຸກພາກສ່ວນເຮັດໜ້າທີ່ຕາມພາລະບົດບາດຂອງຕົນດ້ວຍຄວາມເອົາໃຈໃສ່, ມີຄວາມຮັບຜິດຊອບ ແລະ ມີຄວາມຖືກຕ້ອງຍຸຕິທຳ, ພ້ອມກັນສຸມໃສ່ຈັດຕັ້ງປະຕິບັດ 2 ວາລະແຫ່ງຊາດນັ້ນຄື: ການແກ້ໄຂທາງດ້ານເສດຖະກິດ-ການເງິນ ແລະ ແກ້ໄຂບັນຫາຢາເສບຕິດໃຫ້ປະກົດຜົນເປັນຈິງ ແລະ ໂດຍສະເພາະແມ່ນໃຫ້ເອົາໃຈໃສ່ການສ້ອມແປງສ້າງເສັ້ນທາງເພື່ອເປັນການສ້າງສີ່ງເອື້ອອຳນວຍໃຫ້ແກ່ນັກທ່ອງທ່ຽວ ແລະ ການສັນຈອນໄປມາຂອງປະຊາຊົນ, ຊຶ່ງເປັນການຊຸກຍູ້ທາງດ້ານການທ່ອງທ່ຽວຫຼາຍບ່ອນທີ່ສວຍສົດງົດງາມ ເພື່ອເປັນທ່າແຮງສົ່ງເສີມສ້າງເສດຖະກິດຂອງເມືອງ, ການຈັດຕັ້ງປະຕີບັດວຽກງານແຕ່ລະຂົງເຂດໃຫ້ບັນລຸຕາມເປົ້າໝາຍເປັນຕົ້ນໃນຂົງເຂດກະສິກຳ, ສົ່ງເສີມສ້າງໃຫ້ເປັນສິນຄ້າແປຮູບໃຫ້ມີມູນຄ່າສູງຂຶ້ນ ເພື່ອເຮັດໃຫ້ປະຊາຊົນມີຊິວີດການເປັນຢູ່ທີ່ດີຂຶ້ນ.
ໃນໂອກາດ, ທ່ານຮອງປະທານສະພາແຫ່ງຊາດ ພ້ອມດ້ວຍຄະນະ ເຄື່ອນໄຫວເຮັດວຽກຢູ່ ສາມເມືອງດັ່ງກ່າວນັ້ນ, ຍັງໄດ້ຢ້ຽມຢາມ ໂຄງການເຂື່ອນໄຟຟ້ານໍ້າຫີນບູນ, ໂຄງການປູກຜັກ-ລ້ຽງສັດ ແລະ ປະພົບພໍ່ແມ່ປະຊາຊົນຈໍານວນ ຕື່ມອີກດ້ວຍ.
ໂດຍ: ເອື້ອ ມະໂນສິງ