ໃນວັນທີ 8 ພຶດສະພາ 2022 ທ່ານ ສົມມາດ ພົລເສນາ ກໍາມະການສູນກາງພັກ ຮອງປະທານສະພາແຫ່ງຊາດພ້ອມດ້ວຍຄະນະໄດ້ສົມທົບກັບສະພາປະຊາຊົນແຂວງຊຽງຂວາງ ເຊິ່ງນຳໂດຍ ທ່ານ ບຸນໂຮມ ເທດທານີ ຮອງເລຂາພັກແຂວງ ປະທານສະພາປະຊາຊົນແຂວງ ພ້ອມດ້ວຍພະນັກງານສະພາປະຊາຊົນແຂວງ ໄດ້ລົງຕິດຕາມກວດກາບັນດາໂຄງການຂຸດຄົ້ນແຮ່ເຫຼັກຢູ່ແຂວງຊຽງຂວາງ ເພື່ອເປັນການຊຸກຍູ້-ຕິດຕາມກວດກາການຈັດຕັ້ງປະຕິບັດການຂຸດຄົ້ນແຮ່ເຫຼັກທົດລອງຂອງ ບໍລິສັດສຳພັນໄຊມາຍນິ້ງ ຢູ່ບ້ານສຳພັນໄຊ ເມືອງຄຳ ແລະ ບໍລິສັດພົງຊັບທະວີ ບ້ານນາຕໍເມືອງຄູນແຂວງຊຽງຂວາງ. ໃນການລົງຊຸກຍູ້-ຕິດຕາມກວດກາຄັ້ງນີ້ໄດ້ມີຕ່າງໜ້າຂອງໂຄງການຂຶ້ນລາຍງານສະພາບການຈັດຕັ້ງປະຕິບັດໃນການຂຸດຄົ້ນແຮ່ເຫຼັກທົດລອງໃນໄລຍະຜ່ານມາ ເຊິ່ງໄດ້ປະຕິບັດຕາມສັນຍາການລົງທຶນ ໃຫ້ຖືກຕ້ອງສອດຄ່ອງ ກັບລະບຽບການ ແລະ ກົດໝາຍ.
ໃນໂອກາດດັ່ງກ່າວ ທ່ານ ສົມມາດ ພົລເສນາ ໄດ້ເນັ້ນໃຫ້ບັນດາບໍລິສັດໃນການຂຸດຄົ້ນໃຫ້ຄຳນຶ່ງເຖິງສະພາບແວດລ້ອມໂດຍໃຫ້ໄດ້ຮັບຜົນກະທົບນ້ອຍທີ່ສຸດໂດຍສະເພາະແມ່ນບໍ່ໃຫ້ກະທົບເຖິງແຫຼ່ງນ້ຳ, ທໍາມະຊາດ ແລະ ສິ່ງແວດລ້ອມ, ຕ້ອງເອົາໃຈໃສ່ແກ້ໄຂບັນດາຜົນກະທົບຕໍ່ປະຊາຊົນຕາມຄວາມເໝາສົມ.
ສະພາປະຊາຊົນແຂວງຊຽງຂວາງ
ຂ່າວໂດຍ: ນາງສຸກສະຫວັນອິນທະແສງ