(ສພຊ) ໃນວັນທີ 10 ກໍລະກົດ 2023, ທ່ານ ປອ. ນາງ ສູນທອນ ໄຊຍະຈັກ ເລຂາທິການສູນກາງພັກ, ຮອງປະທານສະພາແຫ່ງຊາດ ແຫ່ງ ສປປລາວ ໄດ້ພົບປະສອງຝ່າຍກັບ ທ່ານ ເຈິ່ນ ແທງ ເມິ້ນ ກຳມະການກົມການເມືອງສູນກາງພັກ, ຮອງປະທານສະພາແຫ່ງຊາດຜູ້ທີ່ໜຶ່ງ ສະພາແຫ່ງຊາດ ສສ.ຫວຽດນາມ ເນື່ອງໃນໂອກາດການເຂົ້າຮ່ວມກອງປະຊຸມຄະນະປຶກສາສະມັດຊາລັດຖະສະພາລະຫວ່າງຊາດອາຊຽນ (AIPA Caucus) ຄັ້ງທີ 14, ທີ່ ຟູກັວກ, ສສ.ຫວຽດນາມ.
ໃນໂອກາດດັ່ງກ່າວ, ທ່ານຮອງປະທານສະພາແຫ່ງຊາດຫວຽດນາມ ໄດ້ກ່າວຕ້ອນຮັບຄະນະຜູ້ແທນສະພາແຫ່ງຊາດລາວຢ່າງອົບອຸ່ນ ແລະ ໄດ້ຕີລາຄາສູງຕໍ່ມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລະຫວ່າງ ຫວຽດນາມ-ລາວ ທີ່ມີການຂະຫຍາຍຕົວຢ່າງບໍ່ຢຸດຢັ້ງ ເຊິ່ງສະແດງອອກໃນການແລກປ່ຽນຄະນະຜູ້ແທນຂັ້ນສູງ ແລະ ຂັ້ນຕ່າງໆນຳກັນຢ່າງເປັນປົກກະຕິ, ສະແດງຄວາມຊົມເຊີຍຕໍ່ຜົນສຳເລັດໃນການພັດທະນາເສດຖະກິດ-ສັງຄົມ ຂອງ ສປປລາວ ທີ່ມີຄວາມຄືບໜ້າ ເຖິງຈະມີຄວາມຫຍຸ້ງຍາກ ແລະ ອຸປະສັກຫຼາຍຢ່າງ; ພ້ອມທັງຝາກຄວາມຢ້ຽມຢາມຖາມຂ່າວອັນອົບອຸ່ນເຖິງ ທ່ານ ປອ. ໄຊສົມພອນ ພົມວິຫານ ປະທານສະພາແຫ່ງຊາດ ແຫ່ງ ສປປລາວ ແລະ ບັນດາການນຳພັກ-ລັດ ແລະ ສະພາແຫ່ງຊາດລາວ.
ທ່ານຮອງປະທານສະພາແຫ່ງຊາດລາວ ໄດ້ສະແດງຄວາມຂອບໃຈຕໍ່ການເຊື້ອເຊີນ ແລະ ໃຫ້ການຕ້ອນຮັບຄະນະຜູ້ແທນສະພາແຫ່ງຊາດລາວຢ່າງອົບອຸ່ນ, ພ້ອມທັງສະແດງຄວາມຊົມເຊີຍຕໍ່ການເປັນເຈົ້າພາບກອງປະຊຸມ AIPA Caucus ຄັ້ງທີ 14 ຂອງສະພາແຫ່ງຊາດຫວຽດນາມ, ຊົມເຊີຍເມືອງຟູກັວກ ກໍຄື ແຂວງກຽນຢາງ ທີ່ໄດ້ມີການພັດທະນາຢ່າງໄວວາຮອບດ້ານ ໂດຍສະເພາະແມ່ນການທ່ອງທ່ຽວ. ທ່ານຮອງປະທານສະພາແຫ່ງຊາດລາວ ຍັງໄດ້ແຈ້ງໃຫ້ຝ່າຍຫວຽດນາມຊາບ ກ່ຽວກັບການດຳເນີນກອງປະຊຸມສະໄໝສາມັນ ເທື່ອທີ 5 ຂອງສະພາແຫ່ງຊາດລາວ ຊຸດທີ IX, ການກະກຽມເປັນເຈົ້າພາບກອງປະຊຸມສຸດຍອດລັດຖະສະພາ ກຳປູເຈຍ-ລາວ-ຫວຽດນາມ (CLV) ໃນເດືອນທັນວາ 2023 ແລະ ເປັນປະທານ AIPA ຂອງສະພາແຫ່ງຊາດລາວ ໃນປີ 2024 ເຊິ່ງຫວັງວ່າສະພາແຫ່ງຊາດຫວຽດນາມ ຈະໃຫ້ການສະໜັບສະໜູນສະພາແຫ່ງຊາດລາວ ໃນການປະຕິບັດໜ້າທີ່ສຳຄັນດັ່ງກ່າວ.
ທ່ານຮອງປະທານສະພາແຫ່ງຊາດຫວຽດນາມ ສະແດງຄວາມຍິນດີທີ່ຈະໃຫ້ການສະໜັບສະໜູນສະພາແຫ່ງຊາດລາວ ໃນການເປັນເຈົ້າພາບກອງປະຊຸມ CLV ແລະ ການເປັນເຈົ້າພາບກອງປະຊຸມໃຫຍ່ AIPA ຢ່າງເຕັມທີ່ ພ້ອມທັງເຊື່ອໝັ້ນວ່າ ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລະຫວ່າງສອງພັກ, ສອງລັດ ກໍຄື ລະຫວ່າງສະພາແຫ່ງຊາດຫວຽດນາມ-ລາວ ຈະສືບຕໍ່ໄດ້ຮັບການຂະຫຍາຍຕົວ ແລະ ມີປະສິດທິຜົນຍິ່ງໆຂຶ້ນ. ນອກນັ້ນ, ທ່ານຍັງໄດ້ສະເໜີໃຫ້ສອງສະພາແຫ່ງຊາດ ສືບຕໍ່ຈັດຕັ້ງປະຕິບັດບັນດາຂໍ້ຕົກລົງວ່າດ້ວຍການຮ່ວມມືທີ່ສອງສະພາແຫ່ງຊາດໄດ້ລົງນາມຮ່ວມກັນໃຫ້ດີ ແລະ ມີໝາກຜົນ, ຊຸກຍູ້ການເຄື່ອນໄຫວວຽກງານຂອງຄະນະມິດຕະພາບລັດຖະສະພາ ຫວຽດນາມ-ລາວ ແລະ ລາວ-ຫວຽດນາມ, ສືບຕໍ່ແລກປ່ຽນຄະນະຜູ້ແທນໄປມາຫາສູ່ກັນ ເພື່ອແບ່ງປັນປະສົບການນຳກັນ, ປະສານສົມທົບກັນໃນການຕິດຕາມກວດກາບັນດາໂຄງການໃຫຍ່ທີ່ຫວຽດນາມລົງທຶນຢູ່ ສປປລາວ ເພື່ອຊຸກຍູ້ໃຫ້ມີປະສິດທິພາບ ແລະ ປະສິດທິຜົນສູງສຸດ, ສືບຕໍ່ສະໜັບສະໜູນ ເຊິ່ງກັນ ແລະ ກັນ ໃນເວທີລັດຖະສະພາພາກພື້ນ ແລະ ສາກົນ.