(ສພຊ) – ຕອນເຊົ້າວັນທີ 13 ພະຈິກນີ້ ທີ່ສະພາແຫ່ງຊາດ, ທ່ານ ປອ. ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ ໄດ້ຕ້ອນຮັບ ແລະ ພົບປະພີ່ນ້ອງເຊື້ອຊາດລາວຈາກຕ່າງປະເທດ ທີ່ເດີນທາງມາຢ້ຽມຢາມ ແລະ ເຂົ້າຮ່ວມກອງປະຊຸມພົບປະພີ່ນ້ອງເຊື້ອຊາດລາວຄັ້ງປະຖົມມະລືກ ພາຍໃຕ້ຫົວຂໍ້ “ຮັກບ້ານເກີດ” ທີ່ຈັດຂຶ້ນເມື່ອວັນທີ 12 ພະຈິກຜ່ານມາ.

ທ່ານ ປອ. ນາງ ສູນທອນ ໄຊຍະຈັກ ໄດ້ສະແດງຄວາມຍິນດີຕ້ອນຮັບພີ່ນ້ອງເຊື້ອຊາດລາວຈາກຕ່າງປະເທດຢ່າງຈິງໃຈ ທັງໄດ້ຕີລາຄາສູງຕໍ່ການຢ້ຽມຢາມພົບປະບ້ານເກີດຂອງຊາວລາວເຊື້ອຊາດລາວໃນຄັ້ງນີ້ ເຊິ່ງເປັນໂອກາດອັນດີໃຫ້ຊາວລາວຢູ່ຕ່າງປະເທດໄດ້ມາເຫັນຍາດພີ່ນ້ອງ ແລະ ການພັດທະນາຂອງປະເທດຊາດ; ທ່ານຮອງປະທານສະພາແຫ່ງຊາດ ໄດ້ແຈ້ງໃຫ້ພີ່ນ້ອງຊາວລາວຊາບວ່າ: ລັດຖະບານ ສປປລາວ ຖືພີ່ນ້ອງຊາວລາວເປັນພາກສ່ວນໜຶ່ງທີ່ບໍ່ສາມາດຕັດແຍກອອກຈາກວົງຄະນະຍາດລາວແຫ່ງຊາດລາວ ແລະ ໄດ້ສະແດງຄວາມຊົມເຊີຍທີ່ໃນໄລຍະຜ່ານມາ ຊາວລາວຢູ່ຕ່າງປະເທດໄດ້ມີການໄປມາຫາສູ່, ອວ່າຍໜ້າມາຫາປະເທດຊາດນັບມື້ນັບຫຼາຍ, ໄດ້ມີການດຳເນີນທຸລະກິດຢູ່ ສປປລາວ ເຊິ່ງເປັນການປະກອບສ່ວນພັດທະນາປະເທດຊາດໃຫ້ນັບມື້ນັບເຂັ້ມແຂງ, ທັງໄດ້ສະແດງຄວາມມຸ່ງຫວັງທີ່ຢາກໃຫ້ພີ່ນ້ອງຊາວລາວທັງພາຍໃນ ແລະ ຕ່າງປະເທດ ມີຄວາມຮັກແພງສາມັກຄີກັນ, ມີຄວາມທະນົງໃຈຕໍ່ການເປັນຄົນລາວ, ເຊື້ອຊາດລາວ, ມີຈິດໃຈຮັກບ້ານເກີດເມືອງນອນອັນສູງສົ່ງ, ປະກອບສ່ວນເຂົ້າໃນການພັດທະນາປະເທດຊາດໃຫ້ມີຄວາມຈະເລີນຮຸ່ງເຮືອງ; ພ້ອມກັນນັ້ນ, ກໍໄດ້ເຊີນຊວນພີ່ນ້ອງເຊື້ອຊາດລາວຢູ່ຕ່າງປະເທດ ມາຢ້ຽມຢາມຍາດຕິພີ່ນ້ອງ, ມາຢ້ຽມຢາມທ່ອງທ່ຽວ, ທັງຊອກໂອກາດມາລົງທຶນຢູ່ ສປປລາວ ໃຫ້ນັບມື້ຫຼາຍຂຶ້ນເລື້ອຍໆ.

ໃນເວລາພົບປະກັບຊາວລາວຄັ້ງນີ້, ໄດ້ມີພີ່ນ້ອງຊາວລາວ ຈຳນວນ 10 ກວ່າທ່ານ ໄດ້ມີການແລກປ່ຽນຄຳຄິດຄຳເຫັນ, ຄວາມຮູ້ສຶກຕໍ່ການມາຢ້ຽມຢາມໃນຄັ້ງນີ້ ແລະ ມີຄວາມປະສົງຢາກຈະກັບມາບ້ານເກີດ, ມາລົງທຶນ ແລະ ມາມີສ່ວນຮ່ວມໃນການພັດທະນາປະ ເທດຊາດ.

ທ່ານຮອງປະທານສະພາແຫ່ງຊາດ ໄດ້ສະແດງຄວາມຊົມເຊີຍຢ່າງຈິງໃຈຕໍ່ພີ່ນ້ອງເຊື້ອຊາດລາວຢູ່ຕ່າງປະເທດ ທີ່ໄດ້ປະກອບສ່ວນອັນສຳຄັນເຂົ້າໃນການສ້າງສາພັດທະນາປະເທດຊາດໃນໄລຍະຜ່ານມາ ທັງມີຄວາມມຸ່ງຫວັງເປັນຢ່າງຍິ່ງທີ່ຢາກໃຫ້ພີ່ນ້ອງເຊື້ອຊາດລາວຢູ່ຕ່າງປະເທດ ເຄື່ອນໄຫວດໍາລົງຊີວິດຢ່າງໝັ້ນຄົງ, ຖືກຕ້ອງຕາມກົດໝາຍຂອງປະເທດທີ່ຕົນອາໄສຢູ່, ກໍ່ສ້າງຊີວິດການເປັນຢູ່ໃຫ້ດີ, ມີຄວາມທະນົງໃຈຕໍ່ການເປັນຄົນເຊື້ອຊາດລາວ, ມີນໍ້າໃຈຮັກຊາດຮັກບ້ານເກີດເມືອງນອນຂອງຕົນ, ສືບຕໍ່ຮັກມູນເຊື້ອວັດທະນະທໍາຮີດຄອງປະເພນີອັນດີງາມຂອງຊາດລາວ ແລະ ສືບຕໍ່ມີສ່ວນຮ່ວມໃນການພັດທະນາປະເທດຊາດໃຫ້ມີຄວາມຈະເລີນຮຸ່ງເຮືອງຮັ່ງມີຂຶ້ນໄປເລື້ອຍໆ ຕາມເງື່ອນໄຂ ແລະ ຄວາມອາດສາມາດຂອງຕົນ.

(ນາງ ອາລິນ ສຸພິມມະປະດິດ)