(ສພຊ) ວັນອັງຄານທີ 29 ພຶດສະພາ 2018, ທ່ານ ສົມພັນ ແພງຄໍາມີ ກໍາມະການສູນກາງພັກ, ຮອງປະທານສະພາແຫ່ງຊາດ (ສພຊ) ໄດ້ປາຖະກະຖາກ່ຽວກັບລັດ ແລະ ກົດໝາຍໃຫ້ແກ່ນັກຮຽນບໍາລຸງວຽກງານປ້ອງກັນຊາດ-ປ້ອງກັນຄວາມສະຫງົບ ຊຸດທີ 15 (ພາກສ່ວນການນໍາພັກ-ລັດ) ຈາກທົ່ວປະເທດ ຢູ່ທີ່ວິທະຍາຄານປ້ອງກັນຊາດ ໄກສອນພົມວິຫານ ມີບັນດານັກຮຽນບໍາລຸງວຽກງານປ້ອງກັນຊາດ ທັງໝົດ 30 ທ່ານເຂົ້າຮ່ວມ.

ທ່ານຮອງປະທານ ສພຊ ໄດ້ຍົກໃຫ້ເຫັນຄວາມໝາຍຄວາມສໍາຄັນຂອງລັດ ແລະ ກົດໝາຍ ເປັນຕົ້ນແມ່ນຄວາມສໍານຶກທົ່ວໄປ ກ່ຽວກັບລັດແມ່ນຫຍັງ, ກົດໝາຍແມ່ນຫຍັງ (ຕາມກົດໝາຍວິທະຍາ, ໃນມູມມອງຂອງວິທະຍາກົດໝາຍ); ລັດ ແລະ ກົດໝາຍແຫ່ງສາທາລະນະລັດປະຊາທິປະໄຕປະຊາຊົນລາວ, ມະຕິກອງປະຊຸມໃຫຍ່ຄັ້ງທີ X ຂອງພັກກ່ຽວກັບລັດ ແລະ ກົດໝາຍຂອງສາທາລະນະລັດປະຊາທິປະໄຕປະຊາຊົນລາວເຊັ່ນ: ທິດທາງໜ້າທີ່ລວມ ແລະ ຄາດໝາຍໃຫຍ່ ເມື່ອຮອດປີ 2025, ຍົກສູງປະສິດທິພາບຂອງການຄຸ້ມຄອງລັດດ້ວຍກົດໝາຍ, ສ້າງຄວາມໝັ້ນຄົງໃຫ້ແກ່ລັດປະຊາ ທິປະໄຕປະຊາຊົນ ປະກອບມີ 1. ຄວາມສໍາຄັນ ແລະ ຄວາມຈໍາເປັນຂອງການຍົກສູງປະ ສິດທິພາບຂອງການຄຸ້ມຄອງລັດດ້ວຍກົດໝາຍ; 2. ທັດສະນະຊີ້ນໍາກ່ຽວກັບການຍົກສູງປະສິດທິພາບໃນການຄຸ້ມຄອງລັດດ້ວຍກົດໝາຍ ເພື່ອສ້າງຄວາມໝັ້ນຄົງໃຫ້ແກ່ລັດປະ ຊາທິປະໄຕປະຊາຊົນ; 3. ທິດທາງໜ້າທີ່ລວມໃນການຍົກສູງປະສິດທິພາບໃນການຄຸ້ມຄອງລັດດ້ວຍກົດໝາຍ ເພື່ອສ້າງຄວາມໝັ້ນຄົງໃຫ້ແກ່ລັດປະຊາທິປະໄຕ ແລະ 4. ຍູ້ແຮງ ແລະ ເສີມຂະຫຍາຍບົດບາດຂອງສະພາແຫ່ງຊາດ.

ນອກຈາກນັ້ນ, ທ່ານຮອງປະທານສະພາແຫ່ງຊາດ ຍັງໄດ້ສະເໜີແລກປ່ຽນຄໍາເຫັນສອງເນື້ອໃນຄື: ສະພາແຫ່ງຊາດມີຈັກພາລະບົດບາດ, ປະຕິບັດພາລະບົດບາດຢ່າງເຕັມສ່ວນ ແລະ ຄົບຖ້ວນແມ່ນແນວໃດ ແລະ ພ້ອມທັງໃຫ້ຮັບຮູ້ກ່ຽວກັບລັດຖະທໍາມະນູນ ປີ 2015, ກົດໝາຍວ່າດ້ວຍສະພາແຫ່ງຊາດ ແລະ ກົດໝາຍວ່າດ້ວຍສະພາປະຊາຊົນຂັ້ນແຂວງ.

(ສອນສັກ ວັນວິໄຊ)