(ສພຊ) ຕອນເຊົ້າຂອງວັນທີ 4 ມິຖຸນາ 2021 ທີ່ສະພາແຫ່ງຊາດ (ທາດຫລວງ) ທ່ານ ຈະເລີນ ເຍຍປາວເຮີ ຮອງປະທານສະພາແຫ່ງ ທັງເປັນປະທານກຳມາທິການກົດໝາຍ ສະພາແຫ່ງຊາດ  ໄດ້ຕ້ອນຮັບການເຂົ້າຢ້ຽມຂໍ່ານັບຂອງທ່ານ ປີເຕີ ເອັມ ເຮມອນ (Peter MD Haymond) ເອກອັກຄະລັດຖະທູດ  ແຫ່ງ ສະຫະລັດອາເມລິກາ (ສ.ອາເມລິກາ) ປະຈຳ ສປປລາວ.

ທ່ານ ຈະເລີນ ເຍຍປາວເຮີ ຮອງປະທານສະພາແຫ່ງຊາດ ໄດ້ສະແດງຄວາມຍິນດີຕ້ອນຮັບຢ່າງອົບອຸ່ນ ແລະ ຈິງໃຈ ຕໍ່ທ່ານ ປີເຕີ ເອັມ ເຮມອນ ໃນນາມເປັນຕົວແທນຂອງສະຫະລັດອາເມລິກາ ຕໍ່ການມາຢ້ຽມຢາມຂໍ່ານັບໃນຄັ້ງນີ້ ເຊິ່ງເປັນການປະກອບສ່ວນສຳຄັນໃນການເສີມຂະຫຍາຍສາຍພົວພັນ ແລະ ການຮ່ວມມື ບົນພື້ນຖານການເປັນຄູ່ຮ່ວມມືແບບກວມລວມ ລະຫວ່າງ ສອງປະເທດ ສປປລາວ-ສ.ອາເມລິກາ, ທັງສະແດງຄວາມເຊື່ອໝັ້ນວ່າທ່ານທູດ ຈະປະກອບສ່ວນປັບປຸງສາຍພົວພັນມິດຕະພາບ ລະຫວ່າງ ສອງປະເທດນັບມື້ໃຫ້ດີຍິ່ງໆຂຶ້ນ. ພ້ອມນັ້ນ, ທ່ານຍັງໄດ້ສະແດງຄວາມເຫັນອົກເຫັນ ໃຈຢ່າງຈິງໃຈ ຕໍ່ປະຊາຊົນ ສ.ອາເມລິກາ ທີ່ໄດ້ຖືກຜົນກະທົບຢ່າງຮ້າຍແຮງຈາກພະຍາດໂຄວິດ-19 ແລະ ເຊື່ອໝັ້ນວ່າ ສ.ອາເມລິກາ ຈະສາມາດຜ່ານພົ້ນຜົນກະທົບດັ່ງກ່າວ ໄປໄດ້ດ້ວຍດີ. ໃນໂອກາດດັ່ງກ່າວ, ທ່ານຮອງປະທານສະພາແຫ່ງຊາດ ຍັງໄດ້ຕີລາຄາສູງຕໍ່ການຮ່ວມມືລະຫວ່າງສອງປະເທດ ສປປລາວ ແລະ ສ.ອາເມລິກາ ກໍ່ຄືສອງອົງການນິຕິບັນຍັດ ຂອງ ສປປລາວ-ສ.ອາເມລິການ, ພ້ອມທັງແຈ້ງໃຫ້ຊາບກ່ຽວກັບສະພາແຫ່ງຊາດ, ການປະຕິບັດໜ້າທີ່ ຂອງ ກຳມາທິການກົດໝາຍ ໂດຍຂັງເຂບ ແລະ ຂໍ້ສະເໜີ ກ່ຽວກັບການພົວພັນຮ່ວມມືໃນຕໍ່ໜ້າ.

ໃນຕອນທ້າຍ, ທ່ານເອກອັກຄະລັດຖະທູດ ໄດ້ກ່າວສະແດງຄວາມຂອບໃຈເປັນຢ່າງຍິ່ງຕໍ່ການຕ້ອນຮັບອັນອົບອຸ່ນ ແລະ ສະແດງຄວາມຍິນດີໃນໂອກາດທີ່ທ່ານ ຈະເລີນ ເຍຍປາວເຮີ ເຂົ້າຮັບໜ້າເປັນຮອງປະທານສະພາແຫ່ງຊາດ ທັງເປັນປະທານ ກຳມາທິການກົດໝາຍ ຄົນໃຫມ່. ພ້ອມທັງກ່າວວ່າ ຈະສືບຕໍ່ເສີມຂະຫຍາຍສາຍພົວພັນ ແລະ ການຮ່ວມມື ບົນພື້ນຖານການເປັນຄູ່ຮ່ວມມືແບບກວມລວມ ລະຫວ່າງ ສອງປະເທດ, ສືບຕໍ່ປະຕິບັດ ໜ້າຂອງຕົນໃນຖານະເປັນເອກອັກຄະລັດຖະທູດ  ແຫ່ງ ສ.ອາເມລິກາ ປະຈຳ ສປປລາວ ໃຫ້ໄດ້ຮັບໝາກຜົນຂຶ້ນເລື້ອຍໆ. ນອກຈາກນີ້, ຍັງໄດ້ແລກປ່ຽນຄຳຄິດຄຳເຫັນ ກ່ຽວກັບມາດຕະການໃນການຕ້ານ ແລະ ສະກັດກັ້ນການແຜ່ລະບາດຂອງພະຍາດໂຄວິດ-19 ແລະ ບັນຫາອື່ນໆອີກຈຳນວນຫນື່ງ.

ແຫຼ່ງຂ່າວທີ່ມາ: ສະພາແຫ່ງຊາດ