(ສພຊ) – ຕອນເຊົ້າວັນອາທິດທີ 1 ທັນວານີ້ ທີ່ສະພາແຫ່ງຊາດ, ສະຫາຍ ສຈ. ປອ. ຈະເລີນ ເຍຍປາວເຮີ ຮອງປະທານສະພາແຫ່ງຊາດ, ປະທານສະມາຄົມມິດຕະພາບ ລາວ-ກູບາ ໄດ້ຕ້ອນຮັບສະຫາຍ ນາງ ວຽງໄຊ ວານເດສ ຮັກສາການປະທານສະມາຄົມມິດຕະພາບ ກູບາ-ລາວ, ຜູ້ອໍານວຍການ ຟ້ອນບາເລ່ ແຫ່ງຊາດກູບາ ພ້ອມດ້ວຍຄະ ນະ ໃນໂອກາດມາຢ້ຽມຢາມ, ເຮັດວຽກ ແລະ ສະແດງສິ ລະປະຟ້ອນບາເລ່ ເພື່ອສະເຫຼີມສະຫຼອງວັນສ້າງຕັ້ງສາຍພົວພັນການທູດຂອງ ລາວ-ກູບາ ຄົບຮອບ 50 ປີ (04/11/1974-04/11/2024) ຢູ່ ສປປລາວ ແຕ່ວັນທີ 30 ພະຈິກ – 02 ທັນວາ 2024.

ໃນໂອກາດນີ້, ສະຫາຍ ສຈ. ປອ. ຈະເລີນ ເຍຍປາວ ເຮີ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ການຢ້ຽມຢາມຂອງຄະນະຜູ້ແທນສະມາຄົມມິດຕະພາບ ກູບາ-ລາວ ທັງຕີລາຄາສູງຕໍ່ສາຍພົວພັນ ແລະ ການຮ່ວມມືອັນເປັນມູນເຊື້ອລະຫວ່າງສອງພັກ, ສອງລັດ ແລະ ປະຊາ ຊົນສອງຊາດ ລາວ-ກູບາ ທີ່ສືບຕໍ່ໄດ້ຮັບການເສີມຂະຫຍາຍ ແລະ ເພີ່ມພູນຄູນສ້າງນັບມື້ກ້າວເຂົ້າສູ່ລວງເລິກ ແລະ ນໍາເອົາຜົນປະໂຫຍດມາສູ່ປະຊາຊົນສອງປະເທດ; ສະຫາຍ ນາງ ວຽງໄຊ ວານເດສ ກໍໄດ້ສະແດງຄວາມຂອບ ໃຈຕໍ່ການຕ້ອນຮັບຢ່າງອົບອຸ່ນ ແລະ ແຈ້ງໃຫ້ຊາບວ່າການຢ້ຽມຢາມ ແລະ ສະແດງສິລະປະໃນຄັ້ງນີ້ຂອງຄະນະຜູ້ ແທນກູບາ ນອກຈາກເປັນການສະເຫຼີມສະຫຼອງວັນສ້າງຕັ້ງສາຍພົວພັນການທູດ, ຍັງເປັນການເຄື່ອນໄຫວການທູດປະຊາຊົນ ກໍຄືການແລກປ່ຽນສິລະປະ-ວັດທະນະທໍາ ທັງເປັນການປະກອບສ່ວນເສີມຂະຫຍາຍ ແລະ ເພີ່ມພູນຄູນສ້າງສາຍພົວພັນອັນເປັນມູນເຊື້ອ ແລະ ການຮ່ວມມືອັນດີງາມລະຫວ່າງ ສ.ກູບາ ກັບ ສປປລາວ. ພ້ອມນັ້ນ, ສອງຝ່າຍຍັງໄດ້ແຈ້ງສະພາບການອັນພົ້ນເດັ່ນຂອງປະເທດ ກໍຄືການເຄື່ອນໄຫວອັນພົ້ນເດັ່ນຂອງອົງການຕົນ ໃຫ້ກັນຊາບໂດຍຫຍໍ້.