(ສພຊ) – ຕອນເຊົ້າຂອງວັນທີ 22 ພະຈິກ 2024 ທີ່ສະພາແຫ່ງຊາດ, ທ່ານ ປອ. ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ ໄດ້ຕ້ອນຮັບການຢ້ຽມຂ່ຳນັບຂອງຄະນະຜູ້ແທນສະພາແຫ່ງຊາດ ແຫ່ງ ສ.ເກົາຫຼີ ນໍາໂດຍທ່ານ ປາກ ດັກ ຮືມ (Park Duk Hyum) ສະມາຊິກສະພາແຫ່ງຊາດ ແຫ່ງ ສ.ເກົາຫຼີ ພ້ອມດ້ວຍຄະນະ ໃນໂອກາດເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ.

ໃນການພົບປະຄັ້ງນີ້, ທ່ານຮອງປະທານສະພາແຫ່ງຊາດ ໄດ້ສະແດງຄວາມປິຕິຍິນດີທີ່ໄດ້ມີໂອ ກາດຕ້ອນຮັບຄະນະຜູ້ແທນສະພາແຫ່ງຊາດ ແຫ່ງ ສ.ເກົາຫຼີ ພ້ອມທັງຕີລາຄາສູງຕໍ່ການມາຢ້ຽມຢາມໃນຄັ້ງນີ້ ເຊິ່ງເປັນການປະກອບສ່ວນສໍາຄັນເຂົ້າໃນການເສີມຂະຫຍາຍການພົວພັນຮ່ວມມືລະຫວ່າງ 2 ປະເທດ ກໍຄືລະຫວ່າງ 2 ອົງການນິຕິບັນຍັດຂອງສອງປະເທດ.

ທ່ານຮອງປະທານສະພາແຫ່ງຊາດ ໄດ້ແຈ້ງສະພາບການພົ້ນເດັ່ນຂອງ ສປປລາວ ໃຫ້ແກ່ຄະນະຜູ້ແທນຊາບ ແລະ ຕີລາຄາການພົວພັນຮ່ວມມືລະຫວ່າງ 2 ປະເທດທີ່ມີມາຕະຫຼອດໄລຍະ 30 ປີ ພາຍຫຼັງທີ່ມີການສ້າງຕັ້ງສາຍພົວພັນການທູດນໍາກັນແຕ່ປີ 1995 ເປັນຕົ້ນມາ ເຊິ່ງສະແດງອອກໃນການພົວພັນດ້ານຕ່າງໆເຊັ່ນ: ດ້ານການເມືອງ ໄດ້ມີການແລກປ່ຽນຄະນະຜູ້ແທນຂັ້ນສູງນໍາກັນ, ດ້ານເສດຖະກິດ-ການຄ້າ ການລົງທຶນ ມີຄວາມຄືບໜ້າຫຼາຍ ເຊິ່ງ ສ.ເກົາຫຼີ ເປັນປະເທດທີ່ມີການລົງທຶນຫຼາຍຢູ່ ສປປລາວ ໃນມູນຄ່າຫຼາຍຮ້ອຍລ້ານໂດລາສະຫະລັດ, ຈັດເປັນປະເທດອັນດັບ 4 ໃນຈໍານວນ 53 ປະເທດທີ່ມີການລົງທຶນຢູ່ລາວ, ນອກນັ້ນ ຍັງໄດ້ມີການຊ່ວຍເຫຼືອສະໜັບສະໜູນ ສປປລາວ ໃນຫຼາຍດ້ານ: ບົດຮຽນໃນການພັດທະນາຊົນນະບົດ, ການສ້າງພື້ນຖານໂຄງລ່າງ, ການພັດທະນາຊັບພະຍາກອນມະນຸດ, ການຊ່ວຍໃນໂຄງການເກັບກູ້ລະເບີດທີ່ບໍ່ທັນແຕກ, ການທ່ອງທ່ຽວ ແລະ ຂົງເຂດອື່ນໆທີ່ເປັນທ່າແຮງຂອງສອງຝ່າຍ.

ທ່ານ ປາກ ດັກ ຮືມ ໄດ້ສະແດງຄວາມດີໃຈທີ່ໄດ້ມີໂອກາດມາຢ້ຽມຢາມລາວເປັນຄັ້ງທໍາອິດ ແລະ ຕີລາຄາສູງຕໍ່ການຕ້ອນຮັບຂອງທ່ານຮອງປະທານສະພາແຫ່ງຊາດລາວ ແລະ ມີຄວາມປິຕິຍິນດີຕໍ່ການພົວພັນຮ່ວມມືລະຫວ່າງ 2 ປະເທດ ແລະ ຈະສືບຕໍ່ມີການຮ່ວມມືກັບຝ່າຍລາວທາງດ້ານນິຕິບັນ ຍັດໃນຕໍ່ໜ້າ.

ທ່ານຮອງປະທານສະພາແຫ່ງຊາດ ໄດ້ສະແດງຄວາມເຊື່ອໝັ້ນວ່າໃນໂອກາດສະເຫຼີມສະຫຼອງ ຄົບຮອບ 30 ປີ ວັນສ້າງຕັ້ງສາຍພົວພັນການທູດໃນປີ 2025 ນີ້, ສອງຝ່າຍຈະມີບັນດາກິດຈະກໍາສໍາຄັນຫຼາຍກິດຈະກໍາຮ່ວມກັນ.

(ນາງ ອາລິນ ສຸພິມມະປະດິດ)