…………………………………………………………………..
(ສພຊ) ໃນວັນທີ 1 ມີນາ 2024 ທີ່ຫ້ອງຮັບແຂກສະພາແຫ່ງຊາດ, ທ່ານ ປອ. ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ ໄດ້ຕ້ອນຮັບທ່ານ ແບກ ແຈ ຢອນ (BAEK Jae Hyun) ເລຂາທິການສະພາແຫ່ງຊາດ ສ.ເກົາຫຼີ ພ້ອມດ້ວຍຄະນະ ໃນໂອກາດມາຢ້ຽມຢາມ ແລະ ເຮັດວຽກ ຢູ່ ສປປລາວ.

ໃນໂອກາດດັ່ງກ່າວ, ທ່ານ ປອ. ນາງ ສູນທອນ ໄຊຍະຈັກ ໄດ້ສະແດງຄວາມຕ້ອນຮັບຢ່າງອົບອຸ່ນ ພ້ອມທັງຕີລາຄາສູງຕໍ່ການພົບປະໃນຄັ້ງນີ້ ເຊິ່ງເປັນໂອກາດດີທີ່ຈະໄດ້ປຶກສາຫາລື ແລະ ຊຸກຍູ້ເສີມຂະຫຍາຍສາຍພົວພັນມິດຕະ ພາບ ແລະ ການຮ່ວມມືລະຫວ່າງສອງປະເທດ ລາວ – ສ.ເກົາຫຼີ ກໍຄືສອງອົງການນິຕິບັນຍັດ ທີ່ມີມູນເຊື້ອດີງາມມາແຕ່ດົນນານນັບຕັ້ງແຕ່ ສປປລາວ ແລະ ສ.ເກົາຫຼີ ໄດ້ສ້າງຕັ້ງສາຍພົວພັນການທູດນຳກັນໃນວັນທີ 25 ຕຸລາ 1995 ໃຫ້ໄດ້ຮັບການພັດທະນາ ແລະ ຂະຫຍາຍຕົວຢ່າງຕໍ່ເນື່ອງ; ຕີລາຄາສູງຕໍ່ການພົວພັນຮ່ວມມືລະຫວ່າງສະພາແຫ່ງຊາດລາວ – ສ.ເກົາຫຼີ ໄດ້ຮັບການເສີມຂະຫຍາຍດີຂຶ້ນຢ່າງຕໍ່ເນື່ອງ ເຊິ່ງໄລຍະຜ່ານມາ ໄດ້ມີການ​ແລກປ່ຽນການຢ້ຽມຢາມຂອງຄະ ນະ​ຜູ້​ແທນຂັ້ນສູງ, ຂັ້ນກຳມາທິການ, ຄະນະມິດຕະພາບລັດຖະສະພາ ແລະ ວິຊາການ ລວມທັງມີການ​ແລກປ່ຽນ​ບົດ ຮຽນ​ ​ແລະ ​ຂໍ້​ມູນ​ຂ່າວສານ,​ ສະໜັບສະໜູນເຊິ່ງກັນ ແລະກັນ ໃນເວທີລັດຖະສະພາພາກພື້ນ ແລະ ສາກົນຢ່າງເປັນປົກ ກະຕິ. ພ້ອມດຽວກັນນັ້ນ, ທ່ານຮອງປະທານສະພາແຫ່ງຊາດ ຖືໂອກາດນີ້ສະແດງຄວາມຂອບໃຈຕໍ່ລັດຖະບານ ແລະ ປະຊາຊົນ ສ.ເກົາຫຼີ ທີ່ໄດ້ໃຫ້ການຊ່ວຍເຫຼືອແກ່ ສປປລາວ ເປັນຕົ້ນການຊ່ວຍເຫຼືອເພື່ອການພັດທະນາຊົນນະບົດ, ການພັດທະນາດ້ານສາທາລະນະສຸກ, ການສຶກສາ, ທ່ອງທ່ຽວ, ກິລາ ເຊິ່ງເປັນການປະກອບສ່ວນໃນການພັດທະນາເສດ ຖະກິດ-ສັງຄົມຂອງ ສປປລາວ ໃຫ້ຂະຫຍາຍຕົວໄປເປັນກ້າວໆ.

ທ່ານເລຂາທິການສະພາແຫ່ງຊາດ ສ.ເກົາຫຼີ ໄດ້ສະແດງຄວາມຂອບໃຈຕໍ່ທ່ານຮອງປະທານສະພາແຫ່ງຊາດ ທີ່ໄດ້ໃຫ້ການຕ້ອນຮັບຢ່າງອົບອຸ່ນ ແລະ ໃຫ້ຄຳໝັ້ນວ່າຈະສືບຕໍ່ຊຸກຍູ້, ສົ່ງເສີມສາຍພົວພັນມິດຕະພາບ ແລະ ການຮ່ວມມືອັນດີງາມລະຫວ່າງສອງປະເທດ ກໍຄືສອງອົງການນິຕິບັນຍັດ ທີ່ມີມາແລ້ວນັ້ນ ໃຫ້ສືບຕໍ່ໄດ້ຮັບການເສີມຂະຫຍາຍ ແລະ ເປັນຮູບປະທຳຍິ່ງໆຂຶ້ນໄປ ລວມທັງຈະສືບຕໍ່ຊຸກຍູ້ ແລະ ສົ່ງເສີມໃຫ້ຂະແໜງການທີ່ກ່ຽວຂ້ອງຂອງລັດຖະບານສອງປະເທດ ຈັດຕັ້ງປະຕິບັດບັນດາສັນຍາ, ສົນທິສັນຍາ ແລະ ຂໍ້ຕົກລົງຕ່າງໆທີ່ໄດ້ລົງນາມຮ່ວມກັນ ໂດຍສະເພາະຂະ ແໜງການທີ່ສອງປະເທດມີທ່າແຮງ ເຊັ່ນ: ການພັດທະນາຊົນນະບົດ, ການສຶກສາ, ການບໍລິການ ແລະ ສາທາລະນະສຸກ ໃຫ້ໄດ້ຮັບປະສິດທິຜົນສູງເປັນກ້າວໆ.