(ສພຊ) ໃນວັນທີ 22 ມັງກອນ 2024 ທີ່ຫ້ອງຮັບແຂກສະພາແຫ່ງຊາດ, ທ່ານ ປອ. ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ ໄດ້ຕ້ອນຮັບການເຂົ້າຢ້ຽມຂ່ຳນັບຂອງທ່ານ ລູເຊິນ ວອງ (Lucien Wong) ຫົວໜ້າອົງການໄອຍະການສູງສຸດ ແຫ່ງ ສ.ສິງກະໂປ ໃນໂອກາດ ທີ່ໄດ້ນໍາພາຄະນະຜູ້ແທນອົງການໄອຍະການສູງສຸດ ແຫ່ງ ສ.ສິງກະໂປ ຢ້ຽມຢາມ ແລະ ເຮັດວຽກ ຢູ່ ສປປລາວ ຢ່າງເປັນທາງການ.
ໂອກາດນີ້, ທ່ານ ປອ. ນາງ ສູນທອນ ໄຊຍະຈັກ ໄດ້ກ່າວສະແດງຄວາມຍິນດີຕ້ອນຮັບຢ່າງ ອົບອຸ່ນ ພ້ອມທັງຕີລາຄາສູງຕໍ່ການມາຢ້ຽມຢາມຄັ້ງນີ້ຂອງທ່ານ ລູ ເຊິນ ວອງ ເຊິ່ງເປັນການປະ ກອບສ່ວນອັນສໍາຄັນໃນການຊຸກຍູ້ ແລະ ເສີມຂະຫຍາຍສາຍພົວພັນມິດຕະພາບ ແລະ ການຮ່ວມ ມືອັນດີງາມລະຫວ່າງ ສປປລາວ ກັບ ສ.ສິງກະໂປ ກໍຄື ລະຫວ່າງສອງອົງການໄອຍະການຂອງ ສອງປະເທດ ໃຫ້ໄດ້ຮັບການພັດທະນາ ແລະ ຂະຫຍາຍຕົວຍິ່ງໆຂຶ້ນ.
ທ່ານຮອງປະທານສະພາແຫ່ງຊາດ ຍັງໄດ້ຕີລາສູງຕໍ່ການພົວພັນ ແລະ ການຮ່ວມມືລະ ຫວ່າງສອງປະເທດລາວ ກັບ ສິງກະໂປ ນັບແຕ່ສ້າງຕັ້ງສາຍພົວພັນທາງການທູດຮ່ວມກັນ ໃນວັນທີ 2 ທັນວາ 1974 ເປັນຕົ້ນມາ ໄດ້ຮັບການພັດທະນາຂຶ້ນເລື້ອຍໆ ເຊິ່ງສະແດງອອກໃນການພົບ ປະແລກປ່ຽນການຢ້ຽມຢາມຂອງຄະນະຜູ້ແທນຂັ້ນສູງ ແລະ ຂັ້ນຕ່າງໆລະຫວ່າງສອງປະເທດ, ການໄປມາຫາສູ່ກັນລະຫວ່າງປະຊາຊົນ, ການພົວພັນຮ່ວມມືທາງດ້ານການຄ້າ-ການລົງທຶນ, ການ ສຶກສາ, ການພັດທະນາຊັບພະຍາກອນມະນຸດ ລວມທັງການຍົກລະດັບພາສາອັງກິດ ແລະ ອື່ນໆ, ໂດຍສະເພາະດ້ານການຄ້າ-ການລົງທຶນຂອງສິງກະໂປຢູ່ ສປປລາວ ໄດ້ສືບຕໍ່ເພີ່ມຂຶ້ນຢ່າງຕໍ່ເນື່ອງ, ປັດຈຸບັນ ມີ 83 ໂຄງການ ລວມມູນຄ່າການລົງທຶນທັງໝົດ 362 ລ້ານໂດລາສະຫະລັດ (ຈັດຢູ່ອັນ ດັບ 10 ການລົງທຶນຂອງຕ່າງປະເທດ ຢູ່ ສປປລາວ); ໃນໂອກາດນີ້, ທ່ານຮອງປະທານສະພາແຫ່ງ ຊາດ ກໍໄດ້ສະແດງຄວາມເຊື່ອໝັ້ນວ່າທ່ານຫົວໜ້າອົງການໄອຍະການສູງສຸດສິງກະໂປ ຈະຊ່ວຍຊຸກ ຍູ້ບັນດານັກທຸລະກິດຂອງສິງກະໂປ ເຂົ້າມາລົງທຶນຢູ່ ສປປລາວ, ຊຸກຍູ້ບັນດານັກທ່ອງທ່ຽວສິງກະ ໂປ ມາທ່ອງທ່ຽວຢູ່ລາວ ໃຫ້ຫຼາຍຂຶ້ນຕື່ມ ເພາະປີ 2024 ເປັນປີທ່ອງທ່ຽວຂອງລາວ.
ທ່ານຮອງປະທານສະພາແຫ່ງຊາດ ໄດ້ຕີລາຄາສູງຜົນການພົບປະເຮັດວຽກຂອງສອງອົງ ການໄອຍະການສອງປະເທດທີ່ນັບມື້ນັບຂະຫຍາຍຕົວ, ສອງອົງການກໍໄດ້ມີບົດບັນທຶກຄວາມເຂົ້າ ໃຈທີ່ໄດ້ລົງນາມຮ່ວມກັນໃນວັນທີ 11 ມິຖຸນາ 2019 ມີການແລກປ່ຽນຄວາມຮູ້ດ້ານວິຊາການ ໂດຍການຈັດເຝິກອົບຮົມ ແລະ ພັດທະນາທັກສະໃຫ້ແກ່ພະນັກງານ, ຈັດສໍາມະນາ, ກອງປະຊຸມ ແລກປ່ຽນຂໍ້ມູນຂ່າວສານກ່ຽວກັບກົດໝາຍ, ບົດຮຽນ ແລະ ປະສົບການໃນການຕ້ານອາດຊະຍາ ກໍາທາງໄຟເບີ ແລະ ການສ້າງບຸກຄະລາກອນໃນຕໍ່ໜ້າ ເພື່ອສືບຕໍ່ເສີມຂະຫຍາຍສາຍພົວພັນມິດຕະ ພາບ ແລະ ການຮ່ວມມືອັນດີງາມລະຫວ່າງ ສປປລາວ ກັບ ສ.ສິງກະໂປ ກໍຄືລະຫວ່າງສອງອົງ ການນິຕິບັນຍັດໃຫ້ໄດ້ຮັບການພັດທະນາ ແລະ ຂະຫຍາຍຕົວຍິ່ງໆຂຶ້ນ.
ທ່ານຮອງປະທານສະພາແຫ່ງຊາດຍັງແຈ້ງໃຫ້ຊາບຕື່ມອີກວ່າ: ສະພາແຫ່ງຊາດລາວ ແລະ ລັດຖະສະພາສິງກະໂປ ມີການພົວພັນຮ່ວມມືອັນດີທັງໃນຂອບສອງຝ່າຍ ແລະ ຫຼາຍຝ່າຍ, ໄດ້ມີ ການແລກປ່ຽນຄະນະຜູ້ແທນຂັ້ນສູງ ແລະ ຂັ້ນຕ່າງໆນໍາກັນ, ຮ່ວມມື ແລະ ສະໜັບສະໜູນເຊິ່ງ ກັນ ແລະກັນ ໃນເວທີລັດຖະສະພາພາກພື້ນ ແລະ ສາກົນ; ໃນປີ 2024 ສປປລາວ ຈະເປັນປະ ທານອາຊຽນ ແລະ ສະພາແຫ່ງຊາດ ກໍຈະເປັນປະທານອົງການສະມັດຊາລັດຖະສະພາລະ ຫວ່າງ ຊາດອາຊຽນ ຫຼື ໄອປາ, ຫວັງເປັນຢ່າງຍິ່ງວ່າຈະໄດ້ຮັບການຮ່ວມມື ແລະ ສະໜັບສະໜູນ ຈາກລັດ ຖະບານ ແລະ ລັດຖະສະພາສິງກະໂປ.
ຈາກນັ້ນ, ທ່ານ ລູເຊິນ ວອງ ກໍໄດ້ກ່າວສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ພ້ອມທັງແຈ້ງໃຫ້ຊາບໃນການເຄື່ອນໄຫວຢ້ຽມຢາມ ແລະ ເຮັດວຽກຢູ່ ສປປລາວ ໃນເທື່ອນີ້ ແລະ ໃຫ້ຄຳໝັ້ນໝາຍວ່າຈະສືບຕໍ່ຊຸກຍູ້, ສົ່ງເສີມສາຍພົວພັນມິດຕະພາບ ແລະ ການຮ່ວມມືອັນດີງາມ ລະຫວ່າງສອງປະເທດ ກໍຄືສອງອົງການນິຕິບັນຍັດ, ອົງການໄອຍະການສູງສຸດ ສ.ສິງກະໂປ ກັບອົງ ການໄອຍະການປະຊາຊົນສູງສຸດ ສປປລາວ ສືບຕໍ່ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືອັນດີງາມລະຫວ່າງ ສ.ສິງກະໂປ ກັບ ສປປລາວ ກໍຄືລະຫວ່າງສອງອົງການນິຕິບັນຍັດ ໃຫ້ໄດ້ຮັບການພັດທະນາ ແລະ ຂະຫຍາຍຕົວຍິ່ງໆຂຶ້ນ.
(ຂ່າວ: ນາງ ໄຊໂສພາພອນ ມິ່ງມຸງຄຸນ, ພາບ: ສອນສັກ ວັນວິໄຊ)