(ສພຊ) ໃນຕອນເຊົ້າວັນທີ 27 ກໍລະກົດ 2023 ທີ່ສະພາແຫ່ງຊາດ, ທ່ານ ປອ. ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ ພ້ອມດ້ວຍຄະນະ ໄດ້ຕ້ອນຮັບການເຂົ້າຢ້ຽມຂໍ່ານັບຂອງທ່ານ ຄໍາພອນ ວົງສັນຕິ ເອກອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງ ສປປລາວ ປະຈໍາ ຮົງກາລີ ແລະ ທ່ານ ກິ່ງໂພແກ້ວ ພົມມະຫາໄຊ ເອກອັກຄະລັດຖະທູດວິສາມັນຜູ້ມີອໍານາດເຕັມ ແຫ່ງ ສປປລາວ ປະຈໍາ ແບນຊິກ ທີ່ຖືກແຕ່ງຕັ້ງໃຫ້ເອກອັກຄະລັດຖະທູດ ປະຈໍາ ຢູ່ ສອງປະເທດດັ່ງກ່າວ ໃນການເຂົ້າຢ້ຽມຂໍ່ານັບ, ທ່ານ ກິ່ງໂພແກ້ວ ພົມມະຫາໄຊ ຕາງໜ້າໃຫ້ທ່ານທູດທັງສອງລາຍງານຈຸດປະສົງຂອງການເຂົ້າຢ້ຽມຂໍ່ານັບໃນຄັ້ງນີ້ ພ້ອມທັງຂໍທິດຊີ້ນໍາຈາກທ່ານຮອງປະທານສະພາແຫ່ງຊາດ.

ໂອກາດດັ່ງກ່າວ, ທ່ານ ປອ. ນາງ ສູນທອນ ໄຊຍະຈັກ ໄດ້ກ່າວຕ້ອນຮັບຢ່າງອົບອຸ່ນ, ສະແດງຄວາມຍ້ອງຍໍຊົມເຊີຍ ແລະ ດີໃຈຢ່າງຍິ່ງນໍາທ່ານທູດທັງສອງ ທີ່ຖືກແຕ່ງຕັ້ງໃຫ້ເອກອັກຄະລັດຖະທູດ ປະຈໍາຢູ່ບັນດາປະເທດດັ່ງກ່າວ ເຊິ່ງໄດ້ສະແດງເຖິງຄວາມໄວ້ວາງໃຈ ແລະ ເຊື່ອໝັ້ນຕໍ່ຄວາມຮັບຜິດຊອບໃນດ້ານໜ້າທີ່ການເມືອງ, ຄວາມຮູ້ຄວາມສາມາດ, ບົດບາດ, ປະສົບການ ຂອງສອງທ່ານ ແລະ ໄດ້ໃຫ້ຮູ້ໂດຍຫຍໍ້ກ່ຽວກັບສະພາບການ ແລະ ກົງຈັກການຈັດຕັ້ງຂອງສະພາແຫ່ງຊາດ ໂດຍສະເພາະກ່ຽວກັບສະພາແຫ່ງຊາດ ຊຸດທີ IX ແລະ ສະເໜີໃຫ້ທ່ານເອກອັກຄະລັດຖະທູດທັງສອງ ຈົ່ງເອົາໃຈໃສ່ບັນຫາດັ່ງນີ້: ໃຫ້ຍຶດໝັ້ນແນວທາງການຕ່າງປະເທດ ຂອງພັກ, ລັດຖະທໍາມະນູນ, ບັນດາກົດໝາຍ ແລະ ນະໂຍບາຍຕ່າງໆ ຂອງ ສປປລາວ; ປົກປ້ອງອໍານາດອະທິປະໄຕ, ຄວາມໝັ້ນຄົງ, ກຽດສັກສີ ແລະ ຜົນປະໂຫຍດຂອງຊາດ ຕະຫຼອດຮອດສິດ ແລະ ຜົນປະໂຫຍດອັນຊອບທໍາ ຂອງພົນລະເມືອງລາວ ແລະ ນິຕິບຸກຄົນ ຂອງ ສປປລາວ ຢູ່ຕ່າງປະເທດ; ເສີມຂະຫຍາຍສາຍພົວພັນມິດຕະພາບທີ່ດີ ລະຫວ່າງ ສປປລາວ ກັບ ຕ່າງປະເທດ ທັງທາງດ້ານການເມືອງ, ວັດທະນະທໍາ-ສັງຄົມ ແລະ ເສດຖະກິດ, ຕ້ອງຖືສໍາຄັນການເຄື່ອນໄຫວການທູດດ້ານການເມືອງ ຕ້ອງໄປຄຽງຄູ່ກັບການທູດທາງດ້ານເສດຖະກິດ, ການທູດປ້ອງກັນເຫດ, ເພື່ອເພີ່ມມິດ ຫຼຸດຜ່ອນສັດຕູ; ຕິດຕາມ ແລະ ລາຍງານສະພາບການ ທີ່ພົ້ນເດັ່ນຂອງລັດຖະສະພາ ບັນດາປະເທດທີ່ຕົນຮັບຜິດຊອບ, ສະພາບການພາກພື້ນ ແລະ ສາກົນ ແລະ ອື່ນໆ ທີ່ກ່ຽວຂ້ອງ ລວມທັງການຄົ້ນຄ້ວາໃຫ້ທັດສະນະທີ່ເໝາະສົມ, ຖືກຕ້ອງ ແລະ ສອດຄ່ອງໃນສະພາບແຕ່ລະໄລຍະ; ສະເໜີໃຫ້ທ່ານທູດ ເອົາໃຈໃສ່ຊຸກຍູ້ ແລະ ສະໜັບສະໜູນ ການພົວພັນຮ່ວມມື ລະຫວ່າງ ສະພາແຫ່ງຊາດລາວ ກັບລັດຖະສະພາຕ່າງປະເທດ ໂດຍສະເພາະແມ່ນປະເທດ ຮົງກາລີ ແລະ ແບນຊິກ ທີ່ບັນດາທ່ານ ໄດ້ໄປປະຈຳການ ໃຫ້ມີການຂະຫຍາຍຕົວຂຶ້ນກວ່າເກົ່າ ເປັນຕົ້ນການແລກປ່ຽນຂອງຄະນະຜູ້ແທນ, ການຮ່ວມມືທາງດ້ານວິຊາການ, ຈັດກອງປະຊຸມສຳມະນາແລກປ່ຽນບົດຮຽນ, ທັດສະນະສຶກສາ ແລະ ແລກປ່ຽນບົດຮຽນ ເພື່ອຍົກສູງຂີດຄວາມສາມາດ ແກ່ສະພາແຫ່ງຊາດ ແລະ ສະພາປະຊາຊົນຂັ້ນແຂວງ ຂອງ ສປປລາວ; ນອກຈາກນີ້, ສະເໜີໃຫ້ມີການສະໜັບສະໜູນການພົວພັນຮ່ວມມືນໍາກັນ ໃນເວທີລັດຖະສະພາພາກພື້ນ ແລະ ສາກົນ ຕາມຄວາມເໝາະສົມ. ພິເສດ ແມ່ນການຍາດແຍ່ງເອົາການສະໜັບສະໜູນ ແລະ ການຊ່ວຍເຫຼືອຂອງຕ່າງປະເທດ ເຂົ້າໃນການສ້າງສາ ແລະ ພັດທະນາປະເທດຊາດຂອງພວກເຮົາ ແລະ ອື່ນໆ. ພ້ອມນັ້ນ, ທ່ານຮອງປະທານສະພາແຫ່ງຊາດ ຍັງໄດ້ອວຍພອນໄຊອັນປະເສີດໃຫ້ທ່ານ ເອກອັກຄະລັດຖະທູດທັງສອງ ຈົ່ງມີສຸຂະພາບແຂງແຮງ, ມີຄວາມຜາສຸກ ໃນຊີວິດສ່ວນຕົວ ກໍຄືຄອບຄົວ ແລະ ອວຍພອນໃຫ້ປະສົບຜົນສໍາເລັດຢ່າງຈົບງາມ ໃນການປະຕິບັດໜ້າທີ່ການທູດ.

(ພາບ ແລະ ຂ່າວ: ສອນສັກ ວັນວິໄຊ)