(ສພຊ) ໃນຕອນບ່າຍວັນທີ 18 ພຶດສະພາ 2023 ທີ່ສະພາແຫ່ງຊາດ, ທ່ານ ຄໍາໃບ ດໍາລັດ ຮອງປະທານສະພາແຫ່ງຊາດ ແຫ່ງ ສປປລາວ ໄດ້ຕ້ອນຮັບການເຂົ້າຢ້ຽມຂ່ຳນັບຂອງທ່ານ Suh Byung-soo ສະມາຊິກສະພາແຫ່ງຊາດ ສ. ເກົາຫຼີ, ຫົວໜ້າຄະນະກຳມະການພິເສດ ສະໜັບສະໜູນໃນການສະໝັກເປັນເຈົ້າພາບງານວາງສະແດງໂລກ 2030 ຂອງແຂວງບູຊານ.
ໃນໂອກາດດັ່ງກ່າວ, ທ່ານ ຮອງປະທານສະພາແຫ່ງຊາດ ໄດ້ສະແດງຄວາມຍິນດີຕ້ອນຮັບຢ່າງອົບອຸ່ນ ແລະ ຈິງໃຈຕໍ່ທ່ານ Suh Byung-soo ໃນການເຂົ້າຢ້ຽມຂໍ່ານັບຄັ້ງນີ້ ເພື່ອປຶກສາຫາລື ກ່ຽວກັບການຊຸກຍູ້ ແລະ ສົ່ງເສີມສາຍພົວພັນມິດຕະພາບ ທີ່ເປັນມູນເຊື້ອອັນດີງາມ ລະຫວ່າງ ສອງປະເທດ ລາວ-ສ.ເກົາຫຼີ ເຊິ່ງເປັນການເສີມຂະຫຍາຍສາຍພົວພັນຮ່ວມມື ຂອງສອງປະເທດ ສປປລາວ ແລະ ສ.ເກົາຫຼີ ຕະຫຼອດໄລຍະຜ່ານມາ, ສອງປະເທດ ມີການພົວພັນຮ່ວມມືອັນດີງາມນຳກັນຢ່າງເປັນປົກກະຕິ.
ທ່ານ ຮອງປະທານສະພາແຫ່ງຊາດ ໄດ້ຕີລາຄາສູງການພົວພັນຮ່ວມມື ຂອງສອງອົງການນິຕິບັນຍັດ ຂອງສອງປະເທດ ເຊິ່ງສະແດງອອກມີການແລກປ່ຽນການຢ້ຽມຢາມ ລະຫວ່າງ ຄະນະຜູ້ແທນຂັ້ນສູງ ຂອງສອງຝ່າຍຜ່ານມາ ເປັນ ຕົ້ນ ໃນປີ 2013 ທ່ານປະທານປະເທດ ແຫ່ງ ສປປລາວ ໄດ້ເດີນທາງຢ້ຽມຢາມ ສ.ເກົາຫຼີ ແລະ ໃນເດືອນກັນຍາ 2019 ທ່ານ ປະທານາທິບໍດີ ສ.ເກົາຫຼີ ໄດ້ເດີນທາງມາຢ້ຽມຢາມລັດຖະກິດ ສປປລາວ. ໃນເດືອນມີນາ 2022 ທີ່ຜ່ານມາ ທ່ານ ໄຊສົມພອນ ພົມວິຫານ ປະທານສະພາແຫ່ງຊາດລາວ ໄດ້ພົບປະກັບທ່ານ ປາກ ບຽວ ຊຶງ ປະທານສະພາແຫ່ງຊາດ ແຫ່ງ ສ. ເກົາຫຼີ ແບບທາງໄກ. ນອກຈາກນີ້, ຄະນະຜູ້ແທນ ສ.ເກົາຫຼີ ນຳໂດຍທ່ານ ຮອງປະທານສະພາແຫ່ງຊາດ ແຫ່ງ ສ.ເກົາຫຼີ ກໍໄດ້ມາຢ້ຽມຢາມລາວ ໃນທ້າຍປີ 2022. ພ້ອມກັນນີ້, ທ່ານ ຮອງປະທານສະພາແຫ່ງຊາດ ໄດ້ແຈ້ງສະພາບການປະຕິບັດພາລະບົດບາດ ແລະ ໜ້າທີ່ ຂອງສະມາຊິກສະພາແຫ່ງຊາດ ຊຸດທີ IX ໃຫ້ຄະນະຜູ້ແທນ ສ.ເກົາຫຼີ ແລະ ປຶກສາຫາລືການພົວພັນຮ່ວມມື ລະຫວ່າງ ສອງອົງການນິຕິບັນຍັດ ໃນຕໍ່ໜ້າ ໂດຍຈະສືບຕໍ່ຊຸກຍູ້ ໃຫ້ສອງປະເທດ ກໍຄື 2 ສະພາແຫ່ງຊາດ, ສະໜັບສະໜູນການຮ່ວມມືກັນໃນເວທີລັດຖະສະພາພາກພື້ນ ແລະ ສາກົນ ເພື່ອປະກອບສ່ວນເຂົ້າໃນການພັດທະນາຮອບດ້ານ ໃນພາກພື້ນ ແລະ ສາກົນ.
ທ່ານຫົວໜ້າຄະນະຜູ້ແທນສະພາແຫ່ງຊາດ ສ.ເກົາຫຼີ ກໍໄດ້ກ່າວສະແດງຄວາມຂອບໃຈຕໍ່ທ່ານ ຮອງປະທານສະ ພາແຫ່ງຊາດ ທີ່ໄດ້ເສຍສະຫຼະເວລາອັນມີຄ່າ ໃຫ້ການຕ້ອນຮັບໃນຄັ້ງນີ້ ແລະ ເຫັນດີຕໍ່ຄຳຄິດຄຳເຫັນ ຂອງທ່ານຮອງປະ ທານສະພາແຫ່ງຊາດ ທີ່ໄດ້ກ່າວມາແລ້ວນັ້ນ, ທ່ານໄດ້ຢັ້ງຢືນຈະສືບຕໍ່ຮ່ວມມື ເປັນຕົ້ນດ້ານເສດຖະກິດ ລະຫວ່າງ ສອງປະເທດ ລາວ-ສ.ເກົາຫຼີ ແລະ ດ້ານອື່ນໆ ໃຫ້ມີການພັດທະນາຂຶ້ນໄປເລື້ອຍໆ ໃນຖານະເປັນສະມາຊິກສະພາແຫ່ງຊາດ ສ.ເກົາຫຼີ ເພື່ອເສີມຂະຫຍາຍສາຍພົວພັນສອງປະເທດ ກໍຄືສອງພັກ, ສອງລັດ ເວົ້າສະເພາະ ກໍຄືສອງອົງການນິຕິ ບັນຍັດ ໃຫ້ນັບມື້ນັບແໜ້ນແຟ້ນ ແລະ ເປັນຮູບປະທຳຫຼາຍຂຶ້ນກວ່າເກົ່າ.
ພ້ອມນີ້, ທ່ານຫົວໜ້າຄະນະຜູ້ແທນສະພາແຫ່ງຊາດ ສ.ເກົາຫຼີ ໄດ້ແຈ້ງໃຫ້ຊາບ ສ.ເກົາຫຼີ ໄດ້ສະໝັກເປັນເຈົ້າ ພາບຈັດງານວາງສະແດງສິນຄ້າໂລກ ປີ 2030 ຂອງແຂວງບູຊານ ເຊິ່ງຈະຜ່ານການລົງຄະແນນ ໃນເດືອນພະຈິກ 2023 ນີ້ ເຊິ່ງສະເໜີໃຫ້ລາວ ຊ່ວຍສະໜັບສະໜູນການສະເໜີເປັນເຈົ້າພາບດັ່ງກ່າວ ແລະ ສະເໜີສະພາແຫ່ງຊາດລາວ ຊ່ວຍຊຸກຍູ້ນັກລົງທຶນຂອງ ສ.ເກົາຫຼີ ຢູ່ລາວ ໂດຍສະເພາະໂຄງການສ້າງຂະຫຍາຍສະໜາມບິນຫຼວງພະບາງ, ຈະເປັນໂຄງການທີ່ມີຄວາມໝາຍສຳຄັນ ມີເງື່ອນໄຂດຶງດູດນັກທ່ອງທ່ຽວ ຈາກຫຼາຍປະເທດມາທ່ອງທ່ຽວ ແລະ ຢ້ຽມຢາມຫຼວງພະບາງຕື່ມອີກ.
ຕໍ່ການສະເໜີ ຂອງຝ່າຍ ສ.ເກົາຫຼີ ທ່ານຮອງປະທານສະພາແຫ່ງຊາດ ເຫັນດີຈະຊຸກຍູ້ຕາມບົດບາດຂອງຕົນ. ພ້ອມສະແດງຄວາມເຊື່ອໝັ້ນວ່າ ສ.ເກົາຫຼີ ຈະສາມາດເປັນເຈົ້າພາບທີ່ດີໄດ້ ໃນງານວາງສະແດງໂລກດັ່ງ ກ່າວ ໃນປີ 2030. ຕອນທ້າຍໄດ້ສະແດງຄວາມຂອບໃຈ ຕໍ່ການຊ່ວຍເຫຼືອ ຂອງ ສ.ເກົາຫຼີ ໃນການກະກຽມເປັນເຈົ້າພາບ ASEAN ຂອງ ສປປລາວ.