(ສພຊ) ແລວທາງ ແລະ ສະຖານີລົດໄຟ ຂອງໂຄງການກໍ່ສ້າງທາງລົດໄຟ ລາວ-ຈີນ (ຊ່ວງຜ່ານແຂວງອຸດົມໄຊ) ຖືກຜົນກະທົບໃນ 3 ເມືອງ 39 ບ້ານຄື: ເມືອງນາໝໍ້ 12 ບ້ານ; ເມືອງໄຊ 14 ບ້ານ ແລະ ເມືອງງາ 13 ບ້ານ. ການໄກ່ເກ່ຍເກັບກໍາຂໍ້ມູນມາເຖິງປັດຈຸບັນ ມີຄອບຄົວທີ່ໄດ້ຮັບຜົນກະທົບ 1.541 ຄອບຄົວ ເນື້ອທີ່ໄດ້ຮັບຜົນກະທົບທັງໝົດ 439,61 ເຮັກຕາ, ແບ່ງອອກເປັນດິນປຸກສ້າງ 13,01 ເຮັກຕາ, ດິນນາ 143,9 ເຮັກຕາ, ດິນສວນ 268,5 ເຮັກຕາ ແລະ ດິນໜອງປາ 14,2 ເຮັກຕາ, ຜົນລະປູກ 157.564 ຕົ້ນ, ນອກຈາກນີ້ ຍັງມີຜົນກະທົບຖືກເຮືອນປະຊາຊົນ 107 ຫລັງ, ໂຮງຮຽນປະຖົມ-ມັດທະຍົມສົມບູນ 1 ຫລັງ, ຫົວງານນໍ້າລິນ 6 ແຫ່ງ, ຄອງເໝືອງ-ຝາຍ ຈໍານວນ 48 ຈຸດ. ສຳລັບການຈ່າຍຄ່າຊົດເຊີຍ ແລະ ເວນຄືນຜົນກະທົບຈາກແລວທາງລົດໄຟ ລາວ-ຈີນ (ຊ່ວງຜ່ານແຂວງອຸດົມໄຊ) ຜ່ານການຈັດຕັ້ງປະຕິບັດໃນໄລຍະຜ່ານມາ ສາມາດເບີກຈ່າຍຄ່າຊົດເຊີຍຜົນກະທົບຜ່ານມາ ຈຳນວນ 7 ຄັ້ງ ລວມມູນຄ່າ 183.430.051.688 ກີບ ເທົ່າກັບ 72,48% ຂອງມູນຄ່າທັງໝົດ 253.063.454.748 ກີບ, ສ່ວນທີ່ຍັງຄ້າງຈໍານວນ 69.633.403.060 ກີບ ແມ່ນຜົນກະທົບທາງອ້ອມ ເປັນຕົ້ນແມ່ນຜົນກະທົບທາງຊອຍເຂົ້າຫາຈຸດກໍ່ສ້າງ ແລະ ຈຸດຕັ້ງແຄັມຂອງບໍລິສັດຜູ້ຮັບເໝົາ.
ແລວທາງລົດໄຟທີ່ຜ່ານແຂວງອຸດົມໄຊ ມີຄວາມຍາວທັງໝົດ: 126,6 ກິໂລແມັດ (ກມ) ໃນນັ້ນ, ກວມເອົາ 3 ສັນຍາຄື: ສັນຍາທີ 1: ມີຄວາມຍາວ 35,10 ເລີ່ມແຕ່ ກມ 16+900 ຫາ ກມ 52+000; ສັນຍາທີ 2: ມີຄວາມຍາວ 67,00 ກມ ເລີ່ມແຕ່ ກມ 52+000 ຫາ ກມ 119+000; ສັນຍາທີ 3: ມີຄວາມຍາວ 24,5 ກມ ເລີ່ມແຕ່ ກມ 9+000 ຫາ ກມ 143+500. ມີຂົວ 60 ແຫ່ງ ຍາວ 12.695 ກມ, ກວມອັດຕາສ່ວນ 10,02% ຂອງຄວາມຍາວຜ່ານແຂວງອຸດົມໄຊ, ມີອຸມົງ 32 ຈຸດ, ຍາວ 87.196 ກມ, ກວມອັດຕາສ່ວນ ເທົ່າກັບ 67,03% ຄວາມຍາວຜ່ານແຂວງອຸດົມໄຊ, ຈຸດດິນຕັດ-ດິນຖົມຄັນທາງ ມີຄວາມຍາວ 29.036 ກິໂລແມັດ ເທົ່າກັບ 22,93% ຂອງຄວາມຍາວຜ່ານແຂວງອຸດົມໄຊ ມີສະຖານີ 9 ຈຸດ ໃນນີ້ ຢູ່ເມືອງນາໝໍ້ມີ 2 ຈຸດ, ເມືອງໄຊ 3 ຈຸດ ແລະ ເມືອງງາ 4 ຈຸດ ແຕ່ແຜນການເບື້ອງຕົ້ນ ແມ່ນຈະກໍ່ສ້າງພຽງ 3 ຈຸດຄື: ສະຖານີໂດຍສານເມືອງນາໝໍ້, ສະຖານີໂດຍສານ-ສິນຄ້າ ເມືອງໄຊ ແລະ ສະຖານີເມືອງງາ. ທັງໝົດນັ້ນ, ແມ່ນການລາຍງານໂດຍຫຍໍ້ຂອງທ່ານ ຄຳດີ ວົງລ້ອມ ປະທານສະພາປະຊາຊົນແຂວງອຸດົມໄຊ ຕໍ່ທ່ານພົນໂທ ສຸວອນ ເລືອງບຸນມີ ຮອງປະທານສະພາແຫ່ງຊາດ ພ້ອມດ້ວຍຄະນະ ໃນໂອກາດເຄື່ອນໄຫວຕິດຕາມກວດກາ ການຊົດເຊີຍຜົນກະທົບຈາກໂຄງການກໍ່ສ້າງທາງລົດໄຟລາວ-ຈີນ ແລະ ການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ຢູ່ເມືອງນາໝໍ້ ແລະ ເມືອງໄຊ ແຂວງອຸດົມໄຊ ໃນວັນທີ 28 ມີນາຜ່ານມາ.
ຈາກນັ້ນ, ຄະນະ ໄດ້ເດີນທາງຢ້ຽມຢາມສະຖານທີ່ຕົວຈິງ ເປັນຕົ້ນ ທີ່ດິນປຸກສ້າງ, ບ້ານຈັດສັນທົດແທນຄືນ ແລະ ທີ່ດິນທຳການຜະລິດຂອງປະຊາຊົນທີ່ຖືກຜົນກະທົບຈາກໂຄງການດັ່ງກ່າວ ພ້ອມທັງຟັງການລາຍງານຜົນກະທົບຈາກການນຳຂັ້ນເມືອງ ແລະ ປະຊາຊົນທີ່ຖືກຜົນກະທົບຕົວຈິງຂອງທັງສອງເມືອງ.
(ພາບ ແລະ ຂ່າວ ກົງທະນູຄໍາ ພິພັດເສລີ)