ໃນລະຫວ່າງວັນທີ 5-7 ເມສາ 2022 ທ່ານ ນາງ ບັງອອນ ໄຊຍະສິດ ກຳມະການປະຈໍາພັກແຂວງ ຮອງປະທານສະພາປະຊາຊົນແຂວງຄໍາມ່ວນ ແລະ  ທ່ານ ນາງ ກ້ອນແກ້ວ ຫຼວງໄຊມຸງຄຸນ ຄະນະປະຈໍາສະພາປະຊາຊົນແຂວງ ປະທານ ຄະນະກຳມາການວັດທະນະທຳ-ສັງຄົມ ແລະ ບັນດາເຜົ່າ ສະພາປະຊາຊົນແຂວງຄໍາມ່ວນ, ພ້ອມດ້ວຍຄະນະທີມງານໄດ້ລົງເຄື່ອນໄຫວຕິດຕາມກວດກາ, ຊຸກຍູ້ການຈັດຕັ້ງປະຕິບັດບັນດາຄາດໝາຍໃນຂົງເຂດສຶກສາທິການ ແລະ ກິລາ, ການປັບປຸງຄຸນນະພາບການຮຽນການສອນໃນທຸກຊັ້ນທຸກສາຍໃນໄລຍະໃໝ່ ແລະ ການຈັດຕັ້ງປະຕິບັດວຽກງານກິລາ-ກາຍະກຳ ຢູ່ 3 ຈຸດ ຄື: ເມືອງບົວລະພາ, ເມືອງໄຊບົວທອງ ແລະ ພະແນກສຶກສາທິການ ແລະກິລາແຂວງ.

ໃນການພົບປະເຄື່ອນໄຫວຕິດຕາມກວດກາຄັ້ງນີ້, ທາງຄະນະໄດ້ຮັບຟັງການລາຍງານການຈັດຕັ້ງປະຕິບັດວຽກງານໃນຂົງເຂດວັດທະນະທຳ-ສັງຄົມໂດຍສັງເຂບໃນໄລຍະຜ່ານມາ ແລະ ທິດທາງແຜນການຕໍ່ໜ້າຂອງພາກສ່ວນທີ່ກ່ຽວຂ້ອງ, ເຊິ່ງເຫັນໄດ້ສະພາບລວມ ມີທັງຂໍ້ສະດວກແລະ ຂໍຫຍຸ້ງຍາກ, ມາດຕະການຕະຫຼອດຮອດວິທີການທີ່ຈະຕ້ອງໄດ້ປັບປຸງແກ້ໄຂ, ພ້ອມນັ້ນ,​ ທ່ານຮອງປະທານສະພາປະຊາຊົນແຂວງ ພ້ອມດ້ວຍຄະນະ ໄດ້ມີຄໍາຊັກຖາມເຈາະຈີ້ມບາງບັນຫາໃນການຈັດຕັ້ງປະຕິບັດວຽກງານ, ບັນດາຜູ້ເຂົ້າຮ່ວມໄດ້ພ້ອມກັນແລກປ່ຽນຄໍາຄິດຄໍາເຫັນ ແລະ ຕອບຂໍ້ຊັກຖາມຢ່າງກົງໄປກົງມາ ແລະ ພາວະວິໃສຕາມຄໍາຖາມເຈາະຈີ້ມ ເພື່ອເປັນຂໍ້ມູນເບື້ອງຕົ້ນໃຫ້ແກ່ກອງປະຊຸມສະໄໝສາມັນເທື່ອທີ  3 ຂອງສະພາແຫ່ງຊາດ ຊຸດທີ IX  ທີ່ຈະໄດ້ໄຂຂຶ້ນໃນຕໍ່ໜ້າ.

ໃນຕອນທ້າຍກອງປະຊຸມ, ທ່ານ ນາງ ບັງອອນ ໄຊຍະສິດ ຮອງປະທານສະພາປະຊາຊົນແຂວງ ໄດ້ມີຄໍາເຫັນໂອ້ລົມ, ໂດຍທ່ານໄດ້ສະຫລຸບຕີລາຄາສູງຕໍ່ຜົນງານທີ່ຍາດມາໄດ້ ແລະ ທ່ານຍັງເນັ້ນໜັກຈົ່ງຕັ້ງປະຕິບັດພາລະບົດບາດຂອງຕົນໃຫ້ສຳເລັດຕາມລະດັບຄາດໝາຍທີ່ການຈັດຕັ້ງພັກ-ລັດມອບໝາຍໃຫ້.

( ອາລີ )