ດ້ວຍຄວາມຫວ່ງໃຍຂອງຄະນະປະຈໍາສະພາປະຊາຊົນແຂວງຄໍາມ່ວນ ແລະ ເພື່ອເປັນການຕິດຕາມ, ກວດກາ, ຊຸກຍູ້ການຟຶ້ນນຟູ ແລະ ເຝົ້າລະວັງໄພນໍ້າຖ້ວມຢູ່ບັນດາເມືອງພາຍໃນແຂວງຄໍາມ່ວນແຕ່ລະໄລຍະ.

ໃນລະຫວ່າງວັນທີ 12-15 ສິງຫາ 2023 ທ່ານ ບົວພັນ ແສງຈັນ ກຳມະການພັກແຂວງ ຮອງປະທານສະພາປະຊາຊົນແຂວງຄໍາມ່ວນ, ທ່ານ ສະເຫຼີກສັກ ແກ້ວຈັນທະລາ ( ສຊຊ ) ປະຈໍາເຂດເລືອກຕັ້ງທີ 12 ແຂວງຄໍາມ່ວນ ຄະນະປະຈໍາສະພາປະຊາຊົນແຂວງ ເລຂາທິການສະພາປະຊາຊົນແຂວງຄໍາມ່ວນ ພ້ອມດ້ວຍຄະນະ ໄດ້ລົງເຄື່ອນໄຫວຕິດຕາມສະພາບນໍ້າຖ້ວມຢູ່ 5 ເມືອງຂອງແຂວງຄໍາມ່ວນຄື: ຫີນບູນ, ຄູນຄໍາ, ນາກາຍ, ຍົມມະລາດ ແລະ ມະຫາໄຊ; ໂດຍເປັນກຽດຕ້ອນຮັບ ແລະ ເຂົ້າຮ່ວມເຮັດວຽກມີບັນດາທ່ານເຈົ້າເມືອງ, ຄະນະປະຈໍາພັກເມືອງ, ຄະນະສະມາຊິກສະພາປະຊາຊົນແຂວງປະຈໍາເຂດເລືອກຕັ້ງເມືອງ, ມີຄະນະກຳມະການຄຸ້ມຄອງໄພພິບັດ ຂັ້ນເມືອງ ແລະ ການຈັດຕັ້ງທຸກພາກສ່ວນທີ່ກ່ຽວຂ້ອງເຂົ້າຮ່ວມ.

     ຕາມວາລະແຜນການເຄື່ອນໄຫວຄະນະນໍາຂອງແຕ່ລະເມືອງ ກໍ່ໄດ້ລາຍງານການຈັດຕັ້ງປະຕິບັດວຽກງານ ແລະ ການປະເຊີນໜ້າກັບໄພນໍ້າຖ້ວມສາເຫດຍ້ອນເກີດມີຝົນຕົກໜັກຕິດຕໍ່ກັນຫຼາຍວັນເຊິ່ງໃຫ້ຮູ້ຂໍ້ເບື້ອງຕົ້ນວ່າ: ເມືອງຫີນບູນ ເກີດຜົນກະທົບນໍ້າຖ້ວມ ຈໍານວນ 13 ບ້ານ, 709 ຫຼັງຄາ, ເນື້ອທີ່ນາຖືກຖ້ວມ 2.148 ເຮັກຕາ, ມີ 2.358ຄອບຄົວ; ເມືອງຄູນຄໍາ ບ້ານທີ່ຖືກຖ້ວມ ມີ 14 ບ້ານ, 2.575 ຫຼັງຄາ, 2.812 ຄອບຄົວ, ເນື້ອທີ່ນາຖືກຖ້ວມ 3.924 ເຮັກຕາ; ເມືອງນາກາຍ ບ້ານທີ່ຖືກຖ້ວມ 12 ຄຸ້ມບ້ານ, 191 ຫຼັງຄາ, 554 ຄອບຄົວ,ບ້ານທີ່ບໍ່ສາມາດສັນຈອນຫາເມືອງໄດ້ປົກກະຕິ ມີ 2 ບ້ານ, ເນື້ອທີ່ນາຖືກຖ້ວມ 516,94 ເຮັກຕາ; ເມືອງຍົມມະລາດ ບ້ານທີ່ຖືກຖ້ວມ 9 ບ້ານ, 83 ຄອບຄົວ, ເນື້ອທີ່ນາຖືກຖ້ວມ 231,2 ເຮັກຕາ ແລະ ເມືອງມະຫາໄຊ ບ້ານທີ່ມີຄວາມສ່ຽງຕິດຕາມເຝົ້າລະວັງມີ 3 ຈຸດຄື: ບ້ານ ເວີນ, ບ້ານ ນາກຽວ ແລະ ທາງເຂົ້າບ້ານໂພນຄໍາ; ພ້ອມນັ້ນ, ບັນດາທ່ານຄະນະປະຈໍາສະພາປະຊາຊົນແຂວງຄໍາມ່ວນ, ຄະນະສະມາຊິກສະພາປະຊາຊົນແຂວງປະຈໍາເຂດເລືອກຕັ້ງເມືອງ ແລະ ບັນດາການນຳຂອງເມືອງໄດ້ປືກສາຫາລືຫາວິທີແກ້ໄຂຕໍ່ການປະເຊີນໜ້າກັບໄພນໍ້າຖ້ວມດັ່ງກ່າວ.

 

ຈາກນັ້ນ, ທ່ານ ຮອງປະທານສະພາປະຊາຊົນແຂວງກໍ່ໄດ້ສະແດງຄວາມເປັນຫ່ວງເປັນໃຍ ພ້ອມທັງໃຫ້ທິດຊີ້ນໍາວ່າ: ສໍາລັບຈຸດທີ່ຖືກນ້ຳຖ້ວມໜັກ ແລະບໍ່ສາມາດສັນຈອນໄປມາໄດ້ ແມ່ນໃຫ້ຄະນະຄຸ້ມຄອງໄພພິບັດຂັ້ນເມືອງ ກໍ່ຄືການນໍາຂອງແຕ່ລະເມືອງຈົ່ງຕິດຕາມເຝົ້າລະວັງ ແລະກຽມມພ້ອມຕະຫຼອດເວລາ, ໂຄສະນາປຸກລະດົມພໍ່ແມ່ປະຊາຊົນໃຫ້ພາກັນອົບພະຍົບໄປຢູ່ໃນເຂດທີ່ປອດໄພ, ກະກຽມເຮືອໄວ້ໃນແຕ່ລະຈຸດທີ່ປະຊາຊົນຕ້ອງໄດ້ເຄື່ອນຍ້າຍ ຫຼືເດີນທາງທັງນີ້ກໍ່ເພື່ອອໍານວຍຄວາມສະດວກໃຫ້ປະຊາຊົນ. ສໍາລັບເມືອງໃດທີ່ເກີດມີຂົວຂາດ ຫາກຄໍານວນແລ້ວວ່າ ຖ້າສ້ອມແປງແລ້ວມີຫຼາຍບ້ານສາມາດໄດ້ຮັບຜົນປະໂຫຍດກໍ່ໃຫ້ຟ້າວເລັ່ງແກ້ໄຂກ່ອນ; ພ້ອມນັ້ນ ທ່ານຍັງຮຽກຮ້ອງມາຍັງພໍ່ແມ່ປະຊາຊົນຊາວແຂວງຄຳມ່ວນ ຈົ່ງໄດ້ເອົາໃຈໃສ່ຕິດຕາມເຝົ້າລະວັງກ່ຽວກັບສະພາບການນໍ້າຖ້ວມທີ່ອາດຈະເກີດຂຶ້ນໃນຕໍ່ໜ້ານີ້ ເນື່ອງຈາກວ່າສະພາບຝົນແມ່ນຍັງສືບຕໍ່ຕົກຢ່າງຕໍ່ເນື່ອງ, ນໍ້າໃນແມ່ນໍ້າຕ່າງໆກໍ່ເພີ່ມລະດັບສູງຂຶ້ນເລື້ອຍໆ ໃນບາງແມ່ນໍ້າຢູ່ບັນດາເມືອງຕ່າງໆກໍ່ໄດ້ຂຶ້ນກາຍເຂດເຕືອນໄພ ແລະ ກາຍເຂດອັນຕະລາຍ ໃຫ້ປະຊາຊົນຢູ່ໃນເຂດທີ່ມີຄວາມສ່ຽງຈົ່ງໄດ້ຕິດຕາມເຝົ້າລະວັງ ແລະ ໃຫ້ອຳນາດການປົກຄອງເມືອງ ຕິດຕາມຢ່າງໃກ້ຊິດ ເພື່ອແຈ້ງເຕືອນຕໍ່ປະຊາຊົນກະກຽມຮັບມື ພ້ອມນີ້ກໍ່ຮຽກຮ້ອງມາຍັງທຸກພາກສ່ວນໃນສັງຄົມຈົ່ງໄດ້ໃຫ້ການຊ່ວຍເຫຼືອທາງດ້ານວັດຖຸ ແລະ ຈິດໃຈ ປະກອບສ່ວນແກ້ໄຂບັນຫາໃນຄັ້ງນີ້ ເພື່ອຫຼີກລ້ຽງການເສຍຊີວິດຂອງປະຊາຊົນ ແລະ ຫຼຸດຜ່ອນຜົນເສຍຫາຍທາງດ້ານຊັບສິນຂອງປະຊາຊົນໃຫ້ໜ້ອຍທີ່ສຸດ.

    ໃນໂອກາດລົງຕິດຕາມ, ກວດກາ, ຊຸກຍູ້ການຟື້ນຟູ ແລະ ເຝົ້າລະວັງໄພນໍ້າຖ້ວມຢູ່ບັນດາເມືອງພາຍໃນແຂວງຄໍາມ່ວນຄັ້ງນີ້, ຄະນະປະຈໍາສະພາປະຊາຊົນແຂວງຄໍາມ່ວນ ພ້ອມດ້ວຍຄະນະ ກໍ່ໄດ້ນໍາເອົາເຄື່ອງອຸປະກອນໄອທີ ແລະ ເຄື່ອງຈໍານວນໜຶ່ງຂອງໂຄງການຊ່ວຍເຫຼືອສູນກາງ ແລະ ຂອງບັນດາບໍລິສັດຫ້າງຮ້ານທີ່ມອບໃຫ້ກອງເລຂາຂັ້ນແຂວງ ມາມອບຕໍ່ໃຫ້ບັນດາທ່ານການນໍາຂອງເມືອງ, ຄະນະສະມາຊິກສະພາປະຊາຊົນຂັ້ນແຂວງປະຈໍາເຂດເລືອກຕັ້ງເມືອງ; ຕາງໜ້າມອບໂດຍ ທ່ານ ບົວພັນ ແສງຈັນ ກຳມະການພັກແຂວງ ຮອງປະທານສະພາປະຊາຊົນແຂວງ ແລະ ຕາງໜ້າຮັບໂດຍບັນດາທ່ານການນໍາຂອງເມືອງ ພ້ອມດ້ວຍ ຄະນະສະມາຊິກສະພາປະຊາຊົນຂັ້ນແຂວງປະຈໍາເຂດເລືອກຕັ້ງເມືອງ 5 ຕົວເມືອງພາຍໃນແຂວງ, ມີຄະນະກຳມະການຄຸ້ມຄອງໄພພິບັດຂັ້ນເມືອງ ແລະ ພາກສ່ວນຂະແໜງການຮ່ວມເປັນສັກຂີພະຍານ; ເຄື່ອງທີນຳມາມອບໃນຄັ້ງນີ້: ປະກອບມີ: ຄອມພິວເຕີ ( Notebook ) ຈໍານວນ 10 ເຄື່ອງ, ເຄື່ອງປິນເຕີ ຈໍານວນ 5 ເຄື່ອງ, ເຄື່ອງສາຍ LCD ຈໍານວນ 5 ເຄື່ອງ, ເຄື່ອງບໍລິໂພກ-ອຸປະໂພກ, ເຄື່ອງສຸຂະອານາໄມ ແລະ ເງິນສົດຈໍານວນ 50 ລ້ານກີບ ລວມມູນຄ່າທັງໝົດ 323.442.870 ກີບ; ທັງນີ້ກໍ່ເພື່ອໃຫ້ ຄະນະສະມາຊິກສະພາປະຊາຊົນແຂວງປະຈໍາເຂດເລືອກຕັ້ງເມືອງ, ການນໍາຂອງແຕ່ລະເມືອງເພື່ອນຳໃຊ້ເຂົ້າໃນວຽກງານ ແລະ ນໍາເຄື່ອງໄປແຈກຢາຍໃຫ້ປະຊາຊົນເພື່ອແກ້ໄຂຜົນກະທົບທີ່ເກີດຈາກໄພນໍ້າຖ້ວມ.