ໃນວັນທີ 31 ມີນາ 2023 ຜ່ານມານີ້, ທ່ານ ສົມພອນ ສີອຸດົມພັນ ຮອງປະທານຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 6, ຮອງປະທານສະພາປະຊາຊົນແຂວງ, ປະທານຄະນະກຳມະການເສດຖະກິດ, ແຜນການ ແລະ ການເງິນ ໄດ້ລົງເຜີຍແຜ່ຜົນສຳເລັດກອງປະຊຸມສະ ໄໝສາມັນເທື່ອທີ 4 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນແຂວງ ຊຸດທີ II ຕາມຄໍາແນະນຳຂອງຄະນະປະຈຳສະພາແຫ່ງຊາດ ແລະ ຄະນະປະຈຳສະພາປະຊາຊົນແຂວງ ຢູ່ຫ້ອງປະຊຸມຂອງພະແນກໂຍທາທິການ ແລະ ຂົນສົ່ງແຂວງຫຼວງພະບາງ, ໃຫ້ກຽດເຂົ້າຮ່ວມໂດຍ ທ່ານ ບຼົ່ງວ່າງ ຫວ່າງເຈຍຊ່າ ຫົວໜ້າພະແນກໂຍທາທິການ ແລະ ຂົນສົ່ງແຂວງ, ມີບັນດາທ່ານ
ທີ່ຕາງໜ້າໃຫ້ແກ່ ສະໜາມບິນສາກົນ, ລັດວິສາຫະກິດນໍ້າປະປາ, ລັດວິສາຫະກິດລາວໂທລະຄົມ ສາຂາແຂວງຫຼວງພະບາງ ແລະ ພະນັກງານຫຼັກແຫຼ່ງ ຂອງພະແນກໂຍທາທິການ ແລະ ຂົນສົ່ງແຂວງ ເຂົ້າຮ່ວມຮັບຟັງ; ການລົງເຄື່ອນໄຫວວຽກງານໃນຄັ້ງນີ້ ໄດ້ຮັບຟັງການລາຍງານສະພາບການໂດຍຫຍໍ້ການຈັດຕັ້ງປະຕິບັດວຽກງານ ປີ 2022 ແລະ ທິກທາງແຜນການ ປີ 2023 ຂອງພະແນກໂຍທາທິການ ແລະ ຂົນສົ່ງແຂວງ, ຫຼັງຈາກນັ້ນ ຈຶ່ງໄດ້ຮັບຟັງການໂອ້ລົມຈາກ ທ່ານ ສົມພອນ ສີອຸດົມພັນ ເຊິ່ງໄດ້ນໍາເອົາເນື້ອໃນຈິດໃຈຂອງກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດ ແລະ ສະພາປະຊາຊົນແຂວງມາເຜີຍແຜ່ໃຫ້ບັນດາທ່ານ ໄດ້ຮັບຮູ້ ແລະ ເຂົ້າໃຈທົ່ວເຖິງກັນ, ພ້ອມນັ້ນ ກໍຍັງໄດ້ມີພິທີເຊັນບົດບັນທຶກ ການປະສານງານລະຫວ່າງ ຄະນະກຳມະການເສດຖະກິດ, ແຜນການ ແລະ ການເງິນ ກັບ ພະແນກໂຍທາທິການ ແລະ ຂົນສົ່ງແຂວງ,
ຊຶ່ງ ທ່ານ ອຸ່ນ ດວງມະນີ ຮອງປະທານຄະນະກໍາມະການເສດຖະກິດ, ແຜນການ ແລະ ການເງິນ ໄດ້ຂຶ້ນລາຍງານຄວາມຈໍາເປັນໃນການສ້າງບົດບັນທຶກດັ່ງກ່າວ ເພື່ອເປັນບ່ອນອີງພື້ນຖານ ແລະ ເປັນໃຈກາງການປະສານງານ ໃຫ້ແກ່ການເຄື່ອນໄຫວວຽກງານໃຫ້ມີປະສິດທິພາບ, ວ່ອງໄວ ແລະ ຮັດກຸມຂຶ້ນກວ່າເກົ່າ, ເຊິ່ງຕາງໜ້າລົງລາຍເຊັນໃນບົດບັນທຶກໂດຍ ທ່ານ ສົມພອນ ສີອຸດົມພັນ ໃນນາມປະທານຄະນະກຳມະການເສດຖະກິດ, ແຜນການ ແລະ ການເງິນ ແລະ ທ່ານ ບຼົ່ງວ່າງ ຫວ່າງເຈຍຊ່າ ໃນນາມຫົວໜ້າພະແນກໂຍທາທິການ ແລະ ຂົນສົ່ງແຂວງ ມີບັນດາທ່ານທີ່ເຂົ້າຮ່ວມພິທີ ເປັນສັກສີພິຍານ.
ພາບ ວິລິຍະ ວັນນະສີ; ຂ່າວ ສຸດາກອນ ໂພສະຫວັດ