(ສພຊ) ໃນລະຫວ່າງວັນທີ 25 ກັນຍາ ຫາ 1 ຕຸລາ 2023 ທ່ານ ພົຈວ ສົມວັນ ທຳມາໄຊ ຮອງປະທານກໍາມາທິການປ້ອງກັນຊາດ-ປ້ອງກັນຄວາມສະຫງົບ ພ້ອມດ້ວຍຄະນະ ໄດ້ສຳເລັດການລົງເຄື່ອນໄຫວຕິດຕາມກວດກາຢູ່ ເຂດເລືອງຕັ້ງທີ 6 ແຂວງຫຼວງພະບາງ ມີ 9 ຈຸດຄື: ສະພາປະຊາຊົນແຂວງຫຼວງພະບາງ, ກອງບັນຊາການທະຫານແຂວງ, ກອງບັນຊາການປ້ອງກັນຄວາມສະຫງົບແຂວງ, ຄ້າຍຄຸມຂັງດັດສ້າງຂອງແຂວງ, ໂຮງໝໍບໍລິເວນ 107, ສາງອໍ 6, ໂຮງງານປະສານເຫຼົ່າ, ສະຫະພັນນັກຮົບເກົ່າແຂວງ ແລະ ໂຮງຮຽນນາຍສິບທະຫານຮາບເລກ 1 ກອງທັບ ເຊິ່ງມີຜູ້ເຂົ້າຮ່ວມທັງໝົດ 1.017 ສະຫາຍ, ຍິງ 265 ສະຫາຍ.
ໂອກາດດັ່ງກ່າວ ໄດ້ຮັບຟັງການລາຍງານກ່ຽວກັບຈຸດພິເສດ, ທີ່ຕັ້ງ, ພາລະບົດບາດ, ໜ້າທີ່ການເມືອງ ແລະ ໝາກຜົນຂອງການປັບປຸງກໍ່ສ້າງ ຮັບຟັງການລາຍງານສະພາບການເຄື່ອນໄຫວວຽກງານໄລຍະຜ່ານມາ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2023 ຂອງບັນດາກຳລັງຫຼວງ, ສະຫະພັນນັກຮົບເກົ່າ ແລະ ບັນດາຜູ້ເຂົ້າຮ່ວມກອງປະຊຸມ ເຊິ່ງໄດ້ລາຍງານສະພາບວຽກງານທີ່ພົ້ນເດັ່ນພາຍໃນແຂວງ, ກົມກອງຂອງຕົນ ສະພາບທີ່ພົວພັນເຖິງຄວາມບໍ່ສະຫງົບທາງດ້ານການເມືອງ ແລະ ຄວາມບໍ່ເປັນລະບຽບຮຽບຮ້ອຍໃນສັງຄົມ ບັນຫາຢາເສບຕິດ ສັງລວມສະພາບຈຸດດີ, ຈຸດອ່ອນ, ຂໍ້ຄົງຄ້າງ ແລະ ວຽກງານທີ່ຈະໄດ້ສຸມໃສ່ໃນຕໍ່ໜ້າ.
ຫຼັງຈາກນັ້ນ, ທ່ານ ພົຈວ ສົມວັນ ທຳມາໄຊ ກໍໄດ້ມີຄໍາເຫັນໂອ້ລົມຕໍ່ກອງປະຊຸມ ຍ້ອງຍໍຊົມເຊີຍຕໍ່ຜົນສຳເລັດທີ່ກົມກອງຍາດມາໄດ້ຫຼາຍດ້ານໃນໄລຍະຜ່ານມາ ຍົກໃຫ້ເຫັນປະຫວັດຄວາມເປັນມາຂອງລັດຖະທຳມະນູນ ແລະ ປະຫວັດຄວາມເປັນມາຂອງສະພາແຫ່ງຊາດ ສິດ ແລະ ພາລະບົດບາດຂອງສະພາແຫ່ງຊາດ ຍົກໃຫ້ເຫັນສະພາບພົ້ນເດັ່ນຂອງກອງປະຊຸມສະໄໝສາມັນ ເທື່ອທີ 5 ຂອງສະພາແຫ່ງຊາດ ຊຸດທີ IX ເວົ້າສະເພາະແມ່ນວຽກງານຂອງກຳມາທິການປ້ອງກັນຊາດ-ປ້ອງກັນຄວາມສະຫງົບ ການປະຕິບັດແນວທາງນະໂຍບາຍຂອງພັກ, ລະບຽບກົດໝາຍຂອງລັດ, ແຜນພັດທະນາເສດຖະກິດ-ສັງຄົມ.
ນອກຈາກນັ້ນ, ທ່ານ ພົຈວ ສົມວັນ ທຳມາໄຊ ຍັງຍົກໃຫ້ເຫັນສະພາບການຂອງໂລກ ແລະ ສະພາບການຫຍຸ້ງຍາກທາງດ້ານເສດຖະກິດຂອງລາວເຮົາ ອັດຕາແລກປ່ຽນເງິນຕາ, ເງິນເຟີ້, ບັນຫາລາຄາສິນຄ້າແພງ, ບັນຫາສັງຄົມທີ່ບໍ່ມີຄວາມສະຫງົບ ແລະ ແນໃສ່ໃຫ້ສືບຕໍ່ປະຕິບັດ 2 ວາລະແຫ່ງຊາດຄື: ການແກ້ໄຂຄວາມຫຍຸ້ງຍາກທາງດ້ານເສດຖະກິດ, ການແກ້ໄຂບັນຫາຢາເສບຕິດ ແລະ ໃຫ້ປະຕິບັດ 4 ໜ້າທີ່ໃຫຍ່ 26 ແຜນງາານຂອງກະຊວງປ້ອງກັນປະເທດວາງອອກ.
ພ້ອມນັ້ນ, ທ່ານ ພົຈວ ສົມວັນ ທຳມາໄຊ ຍັງໄດ້ເນັ້ນໃຫ້ ບັນດານາຍ ແລະ ພົນທະຫານ, ຕຳຫຼວດ ພະນັກງານ ຈົ່ງຍົກສູງ ສືບຕໍ່ຍຶດໝັ້ນຕໍ່ການນຳພາຂອງພັກ-ລັດ, ໃຫ້ເອົາໃຈໃສ່ເຄົາລົບລັດຖະທໍາມະນູນ ແລະ ກົດໝາຍ, ໃຫ້ຮັກສາມູນເຊື້ອທີ່ຍາດມາໄດ້ ໃນທ່າມກາງສະພາບການຫຍຸ້ງຍາກທາງດ້ານເສດຖະກິດ ເອົາໃຈໃສ່ສືບຕໍ່ການປັບປຸງລະບອບຄຸ້ມຄອງ-ບັນຊາ, ປັບປຸງກຳລັງປະເພດຕ່າງໆ ໂດຍຖືເອົາຄຸນນະພາບເປັນຕົ້ນຕໍ, ຕ້ອງມີແຜນການອັນລະອຽດຂອງກົມກອງ ໃຫ້ເປັນຮູບປະທຳ, ຫັນລົງກໍ່ສ້າງຮາກຖານການເມືອງ ແລະ ຮາກຖານກົມກອງໃຫ້ແຂງແຮງ ຕິດຕາມສະພາບການເຄື່ອນໄຫວອິດທິກຳລັງປໍລະປັກ ກໍ່ໃຫ້ເກີດຄວາມບໍ່ສະຫງົບຢູ່ຮາກຖານ ແກ້ໄຂໄດ້ຢ່າງຂາດຕົວ ຕາມເງື່ອນໄຂສະພາບການໃໝ່ ເພື່ອພ້ອມກັນເຮັດສຳເລັດໜ້າທີ່ວຽກງານຂອງຕົນທີ່ໄດ້ຮັບມອບໝາຍໃຫ້ມີຜົນສຳເລັດ ແລະ ປາກົດຜົນເປັນຈິງ.