ໃນຕອນເຊົ້າຂອງວັນທີ 2 ມີນາ 2022 ນີ້ ທ່ານ ພົຈວ ປອ ມາລາ ວິລະຈິດ ຮອງປະທານກໍາມາທິການປ້ອງກັນຊາດ-ປ້ອງກັນຄວາມສະຫງົບ ສະພາແຫ່ງຊາດ ພ້ອມຄະນະ ເຄື່ອນໄຫວຕິດຕາມກວດກາ ເຮັດວຽກຢູ່ແຂວງຈໍາປາສັກ ການເຄື່ອນໄຫວ ໄດ້ພົບປະກັບ ທ່ານ ສາຍທອງ ໄຊຍະວົງ ຮອງເລຂາພັກແຂວງ ປະທານສະພາປະຊາຊົນແຂວງ ຢູ່ຫ້ອງຮັບຮອງຂອງສະພາປະຊາຊົນແຂວງ.

ພ້ອມທັງ, ໄດ້ເປີດກອງປະຊຸມເຮັດເຮັດວຽກຮ່ວມກັບ ຄະນະກໍາມະການຍຸຕິທໍາ ແລະ ປ້ອງກັນຊາດ-ປ້ອງກັນຄວາມສະຫງົບ ສະພາປະຊາຊົນແຂວງ, ຄະນະກອງບັນຊາການທະຫານແຂວງ, ຄະນະກອງບັນຊາການປ້ອງກັນຄວາມສະຫງົບແຂວງ, ຄະນະສະຫະພັນນັກຮົບເກົ່າແຂວງ, ຂະແໜງນິຕິກໍາ-ຍຸຕິທໍາ, ຂະແໜງ ປ້ອງກັນຊາດ-ປ້ອງກັນຄວາມສະຫງົບ ຢູ່ທີຫ້ອງປະຊຸມຂອງສະພາປະຊາຊົນແຂວງ ໂດຍໄດ້ຮັບຟັັງການລາຍງານຈາກພາກສ່ວນທີ່ກ່ຽວຂອງ ເຊິ່ງເຫັນໄດ້ສະພາບລວມຈຸດພິເສດຂໍ້ສະດວກ ແລະ ຄວາມຫຍຸ້ງຍາກ ໃນການຈັດຕັ້ງປະຕິບັດວຽກງານຂອງແຕ່ລພາກສ່ວນ ທີ່ຈະຕ້ອງໄດ້ສຸມໃສ່ໃນການຈັດຕັ້ງປະຕິບັດໃຫ້ສໍາເລັດໃນຕໍ່ໜ້າ.

ໃນຕອນທ້າຍ, ທ່ານ ພົຈວ.ປອ ມາລາ ວິລະຈິດ ຮອງປະທານກໍາມາທິການປ້ອງກັນຊາດ-ປ້ອງກັນຄວາມສະຫງົບ ສະພາແຫ່ງຊາດ ໄດ້ມີຄໍາເຫັນໂອ້ລົມ ໂດຍໄດ້ສະຫຼຸບຕີລາຄາສູງຕໍ່ໝາກຜົນຜົນງານທີ່ທຸກພາກສ່ວນຍາດມາໄດ້ ເຊິ່ງການລົງເຄື່ອນໄຫວຕິດຕາມກວດກາ ຂອງກໍາມາທິການປ້ອງກັນຊາດ-ປ້ອງກັນຄວາມສະຫງົບ ໃນຄັ້ງນີ້ ຈະເປັນການລົງເກັບຂໍ້ມູນອັນສໍາຄັນໃນການນໍາໄປຄົ້ນຄວ້າປຶກສາຫາລື ແລະ ນໍາສະເໜີຕໍ່ຄະນະປະຈໍາສະພາແຫ່ງຊາດ.

ຈາກນັ້ນ, ໃນຕອນບ່າຍຂອງວັນດຽວກັນ ຄະນະຂອງທ່ານຮອງປະທານກໍາມາທິການປ້ອງກັນຊາດ-ປ້ອງກັນຄວາມສະຫງົບ ສະພາແຫ່ງຊາດ ຍັງໄດ້ເຄື່ອນໄຫວເຮັດວຽກຮ່ວມກັບຄະນະກອງພົນທະຫານລາບທີ 5 ແລະ ມີແຜນເຄື່ອນໄຫວລົງພື້ນທີ່ຕົວຈິງຄ້າຍຄຸມຂັງ-ດັດສ້າງ ແຂວງຈໍາປາສັກ, ຄ້າຍຄຸມຂັງ-ດັດສ້າງ ພາກໃຕ້, ເຮັດວຽກຮ່ວມກັບກອງບັນຊາການທະຫານເມືອງໂພນທອງ, ແລະ ດ່ານສາກົນວັງເຕົ່າ ເຊິ່ງຄາດວ່າຈະເຄື່ອນໄຫວສໍາເລັດໃນທ້າຍອາທິດນີ້.