ເພື່ອຕິດຕາມກວດກາການເຄົາລົບ ແລະ ປະຕິບັດລັດຖະທຳມະນູນ, ກົດໝາຍ, ມະຕິກອງປະຊຸມສະພາແຫ່ງຊາດກໍຄືການເຄື່ອນໄຫວວຽກງານ ແລະ ທິດທາງແຜນການເຄື່ອນໄຫວວຽກງານປະຈຳປີຂອງບັນດາອົງການໃນຂົງເຂດຍຸຕິທຳ ເພື່ອຊອກໃຫ້ເຫັນດ້ານດີ ທີ່ຄວນເສີມຂະຫຍາຍ, ດ້ານອ່ອນ, ຂໍ້ຄົງຄ້າງ ແລະ ຊຸກຍູ້ໃຫ້ມີການແກ້ໄຂຕົວຈິງ, ເພື່ອລົງເກັບກຳຂໍ້ມູນ, ຮັບຟັງຄຳຄິດເຫັນຂອງການນຳທ້ອງຖິ່ນ ແລະ ຄຳເຫັນຂອງປະຊາຊົນ ຕໍ່ບັນຫາທີ່ພົ້ນເດັ່ນໃນຂົງເຂດຍຸຕິທຳ ໂດຍສະເພາະ ການປະຕິບັດມາດຕະການສະກັດກັ້ນຂອງອົງການສືບສວນສອບສວນ, ການຈັດຕັ້ງປະຕິບັດຄຳຕັດສິນຂອງສານ ແລະ ການແກ້ໄຂບັນຫາຢາເສບຕິດ ແລະ ບາງບັນຫາທີ່ກ່ຽວຂ້ອງກັບຄຳຮ້ອງຂໍຄວາມເປັນທຳຂອງປະຊາຊົນ, ເພື່ອເປັນການຄົ້ນຄວ້າ, ສະໜອງຂໍ້ມູນໃຫ້ຄະນະປະຈຳສະພາແຫ່ງຊາດ ມີຄຳເຫັນໃນກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດ ຊຸດທີ IX ກ່ຽວກັບການເຄື່ອນໄຫວວຽກງານຂອງອົງການໄອຍະການປະຊາຊົນສູງສຸດ ແລະ ພາກສ່ວນອື່ນໃນຂົງເຂດຍຸຕິທຳ ເພື່ອໃຫ້ກອງປະຊຸມພິຈາລະນາ ແລະ ຮັບຮອງເອົາ.
ຕອນເຊົ້າຂອງວັນທີ 4 ຕຸລາ 2022 ນີ້ ທ່ານ ສີສູນທອນ ສ.ຜາບມີໄຊຍ໌ ຮອງປະທານກຳມາທິການຍຸຕິທຳ ສະພາແຫ່ງຊາດ ພ້ອມດ້ວຍຄະນະ ໄດ້ເຂົ້າພົບ ທ່ານ ຄຳໄຫລ ສີປະເສີດ ກຳມະການສູນກາງພັກ ເລຂາພັກແຂວງ ເຈົ້າແຂວງໆຫລວງນໍ້າທາ ເພື່ອແຈ້ງຈຸດປະສົງໃນການລົງເຄື່ອນໄຫວຕິດຕາມກວດກາການຈັດຕັ້ງປະຕິບັດກົດໝາຍ ແລະ ມະຕິກອງປະຊຸມສະພາແຫ່ງຊາດຢູ່ແຂວງຫລວງນໍ້າທາ ພ້ອມນັ້ນກໍໄດ້ຮັບຟັງການລາຍງານສະພາບລວມ, ສະພາບການຈັດຕັ້ງປະຕິບັດວຽກງານໃນໄລຍະຜ່ານມາຂອງແຂວງໂດຍຫຍໍ້ຈາກທ່ານເຈົ້າແຂວງ
ຫລັງຈາກນັ້ນ ໄດ້ເປີດກອງປະຊຸມການຈັດຕັ້ງປະຕິບັດກົດໝາຍ ແລະ ມະຕິກອງປະຊຸມສະພາແຫ່ງຊາດ ໃນຂົງເຂດວຽກງານຍຸຕິທຳ ທີ່ຫ້ອງະຊຸມຂອງສະພາປະຊາຊົນແຂວງ ໂດຍການເຂົ້າຮ່ວມຂອງ ທ່ານ ກົງເພັດ ແກ້ວບົວພາ ກຳມະການພັກແຂວງ ຮອງປະທານສະພາປະຊາຊົນແຂວງ, ເຂົ້າຮ່ວມມີຫົວໜ້າພະແນກຍຸຕິທຳ, ປະທານ, ຮອງປະທານ, ອົງການໄອຍະການປະຊາຊົນແຂວງ, ສານປະຊາຊົນ, ກອງບັນຊາການ ປກຊ- ປກສ, ອົງການກວດກາພັກ-ລັດແຂວງ, ສະຫະພັນນັກຮົບເກົ່າ, ຄະນະເລຂາທິການ, ຫົວໜ້າ, ຮອງຫົວໜ້າຂະແໜງ ພ້ອມດ້ວຍພະນັກງານວິຊາການທີ່ກ່ຽວຂ້ອງເຂົ້າຮ່ວມທັງໝົດ 29 ທ່ານ, ຍິງ 6 ທ່ານ.
ໃນກອງປະຊຸມ ທ່ານ ຈັນທະສຸລິນ ໝັ້ນປະດິດ ສະມາຊິກສະພາແຫ່ງຊາດປະຈຳເຂດເລືອກຕັ້ງ, ປະທານຄະນະກຳມະການຍຸຕິທຳ ແລະ ປກຊ-ປກສ ໄດ້ລາຍງານກ່ຽວກັບການຕິດຕາມກວດກາການຈັດຕັ້ງປະຕິບັດລັດຖະທຳມະນູນ, ກົດໝາຍ ແລະ ມະຕິກອງປະຊຸມສະພາແຫ່ງຊາດ ໃນຂົງເຂດຍຸຕິທຳ, ຮັບຟັງການລາຍງານຂອງອົງການໄອຍະການປະຊາຊົນແຂວງ ກ່ຽວກັບການຈັດຕັ້ງປະຕິບັດມະຕິກອງປະຊຸມສະພາແຫ່ງຊາດ; ຮັບຟັງການລາຍງານຂອງ ປກສ ແຂວງ ກ່ຽວກັບການຈັດຕັ້ງປະຕິບັດກົດໝາຍຂອງເຈົ້າໜ້າທີ່ຢູ່ຄ້າຍຄຸມຂັງ-ດັດສ້າງ, ຮັບຟັງການລາຍງານການຈັດຕັ້ງປະຕິບັດຄຳຕັດສິນຂອງສານໃນໄລຍະຜ່ານມາ.
ພ້ອມນັ້ນ ບັນດາທ່ານທີ່ເຂົ້າຮ່ວມກອງປະຊຸມໃນຄັ້ງນີ້ໄດ້ພ້ອມກັນປະກອບຄຳເຫັນຕໍ່ກັບບັນດາບົດລາຍງານຂອງແຕ່ລະພາກສ່ວນ ກໍຄືການຈັດຕັ້ງປະຕິບັດວຽກງານຕົວຈິງໃນໄລຍະຜ່ານມາ ເປັນຕົ້ນແມ່ນດ້ານດີ, ດ້ານອ່ອນ ແລະ ທິດທາງແກ້ໄຂ ເພື່ອເປັນເອກະພາບກັນໃນການຈັດຕັ້ງປະຕິບັດວຽກງານຕົວຈິງຂອງແຕ່ລະພາກສ່ວນໃນຂົງເຂດວຽກງານຍຸຕິທຳ ເພື່ອເຮັດໃຫ້ການຈັດຕັ້ງປະຕິບັດກົດໝາຍ ແລະ ມະຕິກອງປະຊຸມສະພາແຫ່ງຊາດ ໃນຂົງເຂດວຽກງານຍຸຕິທຳ ມີຄວາມຖືກຕ້ອງ, ສອດຄ່ອງ, ເປັນໄປຕາມຂະບວນຍຸຕິທຳ ແລະ ໄດ້ຮັບຜົນສຳເລັດຕາມລະດັບຄາດໝາຍ.
ໃນຕອນທ້າຍຂອງກອງປະຊຸມທ່ານ ສີສູນທອນ ສ.ຜາບມີໄຊຍ໌ ຮອງປະທານກໍາມາທິການຍຸຕິທຳ ສະພາແຫ່ງຊາດ ໄດ້ມີຄຳເຫັນໂອ້ລົມ ແລະ ເນັ້ນໜັກ ກ່ອນອື່ນໄດ້ສະແດງຄວາມຊົມເຊີຍຕໍ່ຜົນງານໃນໄລຍະຜ່ານມາຂອງແຕ່ລະພາກສ່ວນໃນຂົງເຂດຍຸຕິທຳ, ເຫັນວ່າແຕ່ລະພາກສ່ວນມີຄວາມຮັບຜິດຊອບສູງຕໍ່ການຈັດຕັ້ງປະຕິບັດໜ້າທີ່ວຽກງານຕາມທິດທາງແຜນການທີວາງໄວ້, ພ້ອມທັງໄດ້ສຸມໃສ່ປະຕິບັດໜ້າທີ່ວຽກງານຈົນມີຜົນສຳເລັດຫລາຍດ້ານ, ພ້ອມທັງເອົາໃຈໃສ່ຊີ້ນຳໆພາຕາມຄວາມຮັບຜິດຊອບຕາມສິດ ແລະ ຫນ້າທີຂອງຕົນ, ພ້ອມນັ້ນຍັງຮຽກຮ້ອງໃຫ້ສືບຕໍ່ສູ້ຊົນບາງຄາດຫມາຍເພື່ອໃຫ້ບັນລຸຕາມຄາດຫມາຍ ສືບຕໍ່ວຽກງານສືກສາອົບຮົມການເມືອງແນວຄິດໃຫ້ພະນັກງານມີແນວຄິດຫນັກແຫນ້ນ ສືບຕໍ່ປັບປຸງການຈັດຕັ້ງ ຍົກສູງຂີດຄວາມສາມາດ ໃນຖັນແຖວພະນັກງານຫລັກແຫລ່ງ, ສະມາຊິກພັກ, ສຸມໃສ່ແກ້ໄຂບັນຫາທີເປັນຂໍ້ຄົງຄ້າງ ທີ່ຍັງບໍທັນບັນລຸຕາມແຜນ ສືບຕໍ່ປະຕິບັດກົນໄກປະສານງານລະຫວ່າງກຳມະການຍຸຕິທຳ ປກຊ-ປກສ ສະພາປະຊາຊົນແຂວງກັບພາກສ່ວນທີກ່ຽວຂ້ອງໃຫ້ດີຂຶ້ນກວ່າເກົ່າ.
ແລະ ໃນຕອນບ່າຍຂອງວັນດຽວກັນນັ້ນ ທ່ານ ສີສູນທອນ ສ.ຜາບມີໄຊຍ໌ ຮອງປະທານກໍາມາທິການຍຸຕິທຳ ສະພາແຫ່ງຊາດ ພ້ອມດ້ວຍຄະນະ ໄດ້ລົງເຄື່ອນໄຫວຕິດຕາມກວດກາ ຢູ່ຄ້າຍຄຸມຂັງດັດສ້າງ ພ້ອມທັງຮັບຟັງການລາຍງານສະພາບລວມການຈັດຕັ້ງປະຕິບັດວຽກງານໃນໄລຍະຜ່ານມາຂອງຄ້າຍຄຸມຂັງດັດສ້າງແຂວງຫລວງນໍ້າທາ.
ພາບ ແລະ ຂ່າວ ໂດຍ ນາງ ອຳພອນ ສີປະເສີດ