ໃນວັນທີ 12 ມິຖຸນາ 2023 ທີ່ສະພາປະຊາຊົນແຂວງຄໍາມ່ວນ ໄດ້ຈັດກອງປະຊຸມກ່ຽວກັບວຽກງານການຕິດຕາມກວດກາຂົງເຂດ ປກຊ-ປກສ ໂດຍການເປັນປະທານຂອງທ່ານ ພົ.ວ ປອ. ມາລາ ວິລະຈິດ ຮອງປະທານກຳມາທິການປ້ອງກັນຊາດ-ປ້ອງກັນຄວາມສະຫງົບ ສະພາແຫ່ງຊາດ ພ້ອມດ້ວຍຄະນະ ໂດຍການຕ້ອນຮັບ ແລະ ເຂົ້າຮ່ວມເຮັດວຽກຂອງ ທ່ານ ບຸນມີ ພິມມະສອນ ຮອງເລຂາພັກແຂວງ ປະທານສະພາປະຊາຊົນແຂວງຄໍາມ່ວນ ທັງເປັນສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 12 ທີ່ສັງກັດກໍາມາທິການ ປກຊ-ປກສ ສະພາແຫ່ງຊາດ, ເຂົ້າຮ່ວມມີ ຮອງປະທານສະພາປະຊາຊົນແຂວງ, ຄະນະປະຈໍາສະພາປະຊາຊົນແຂວງ, ກອງບັນຊາການທະຫານແຂວງ, ສະຫະພັນນັກຮົບເກົ່າແຂວງ, ຄະນະກຳມະການ, ຫົວໜ້າ-ຮອງຫົວໜ້າຂະແໜງ ແລະ ແຂກຖືກເຊີນເຂົ້າຮ່ວມ.

ຈຸດປະສົງຂອງການເຄື່ອນໄຫວຄັ້ງນີ້: ເພື່ອປຶກສາຫາລື, ຕິດຕາມກວດກາ ແລະ ຊຸກຍູ້ການປະຕິບັດລັດຖະທໍາມະນູນ, ກົດໝາຍ ແລະ ນິຕິກໍາໃຕ້ກົດໝາຍ ຂອງກໍາລັງປ້ອງກັນຊາດ-ປ້ອງກັນຄວາມສະຫງົບ ແລະ ສະຫະພັນນັກຮົບເກົ່າ, ໃນກອງປະຊຸມ ທ່ານ ບົວພັນ ແສງຈັນ  ຮອງປະທານສະພາປະຊາຊົນແຂວງຄໍາມ່ວນ ລາຍງານກ່ຽວກັບການຈັດຕັ້ງປະຕິບັດວຽກງານຕິດຕາມກວດກາການປະຕິບັດລັດຖະທຳມະນູນ, ກົດໝາຍ ແລະ ມະຕິກອງປະຊຸມສະພາແຫ່ງຊາດ, ສະພາປະຊາຊົນແຂວງ; ຮັບຟັງການລາຍງານຂອງກອງບັນຊາການທະຫານແຂວງ; ສະຫະພັນນັກຮົບເກົ່າແຂວງ, ເຊິ່ງໄດ້ຍົກໃຫ້ເຫັນດ້ານດີ, ດ້ານອ່ອນ, ຂໍ້ສະດວກ ແລະ ຂໍ້ຄົງຄ້າງໃນການຈັດຕັ້ງປະຕິບັດວຽກງານຜ່ານມາພ້ອມທັງແລກປ່ຽນຄໍາຄິດ-ຄໍາເຫັນ, ຄໍາສະເໝີບາງບັນຫາໃນຂອດການປະສານງານສະໜອງຂໍ້ມູນເຊິ່ງກັນ ແລະ ກັນໃນຕໍ່ໜ້າໃຫ້ມີປະສິດທິພາບຫຼາຍຂຶ້ນ; ພ້ອມນັ້ນ ຮອງປະທານກຳມາທິການໄດ້ໃຫ້ທິດຊີ້ນຳ ແລະ ມີຄໍາຖາມເຈາະຈີ້ມບາງບັນຫາຕໍ່ພາກສ່ວນທີ່ກ່ຽວຂ້ອງທີ່ເຂົ້າຮ່ວມກອງປະຊຸມເປັນຕົ້ນ: ວຽກງານການຈັດຕັ້ງປະຕິບັດ ວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ, ວຽກງານການແກ້ໄຂຄໍາຮ້ອງຂໍຄວາມເປັນທຳ, ສາຍດ່ວນຈາກສັງຄົມທີ່ພົວພັນເຖິງຂົງເຂດປ້ອງກັນຊາດ-ປ້ອງກັນຄວາມສະຫງົບ ແລະ ສະຫະພັນນັກຮົບເກົ່າ; ຈາກນັ້ນພາກສ່ວນທີ່ກ່ຽວຂ້ອງໄດ້ລາຍງານຊີ້ແຈງຕໍ່ບັນຫາທີ່ ທ່ານປະທານກອງປະຊຸມໃຫ້ຄວາມສົນໃຈ.

ໃນຕອນທ້າຍ ທ່ານ ພົ.ວ ປອ. ມາລາ ວິລະຈິດ ຮອງປະທານກຳມາທິການປ້ອງກັນຊາດ-ປ້ອງກັນຄວາມສະຫງົບ ສະພາແຫ່ງຊາດ ໄດ້ໂອ້ລົມ ແລະ ແລກປ່ຽນບົດຮຽນຕໍ່ກອງປະຊຸມ ເຊິ່ງທ່ານໄດ້ສະແດງຄວາມຊົມເຊີຍຕໍ່ຄະນະຜູ້ແທນຂັ້ນສູງຂອງແຂວງ ແລະ ພາກສ່ວນທີ່ກ່ຽວຂ້ອງ ທີ່ໄດ້ສະໝອງຂໍ້ມູນຮອບດ້ານໃຫ້ຄະນະທີມງານໃນຄັ້ງນີ້, ເຊິ່ງການລົງເລິກຕິດຕາມກວດກາ ການປະຕິບັດລັດຖະທໍາມະນູນ ແລະ ກົດໝາຍ ໃນຂົງເຂດປກຊ-ປກສ ແມ່ນເພື່ອສືບຕໍ່ປັບປຸງຄຸນນະພາບຂອງການນໍາໃຫ້ນັບມື້ນັບດີຂຶ້ນ, ເພື່ອເຮັດໃຫ້ແນວທາງປ້ອງກັນຊາດ-ປ້ອງກັນຄວາມສະຫງົບ ທົ່ວປວງຊົນຮອບດ້ານໃຫ້ໜັກແໜ້ນເຂັ້ມແຂງ ແລະ ໄດ້ຮັບການຈັດຕັ້ງປະຕິບັດຢ່າງເຂັ້ມງວດ.

ເຊິ່ງ, ຄະນະຈະໄດ້ (ສືບຕໍ່) ເຄື່ອນໄຫວຕິດຕາມກວດກາ, ຊຸກຍູ້ ແລະເຮັດວຽກຢູ່ກອງບັນຊາການ ປກສ ແຂວງ, ເມືອງຫີນບູນ ຄາດວ່າຈະສໍາເລັດໃນອາທິດນີ້.

ໂດຍ: ເອື້ອ ມະໂນສິງ