ວັນທີ 23 ມັງກອນ 2024 ນີ້, ທ່ານ ຄອນປະພັນ ເລືອງສີຈັນທອງ ຄະນະປະຈຳພັກແຂວງ, ຮອງປະທານສະພາປະຊາຊົນ ແຂວງຫົວພັນ ໄດ້ເຂົ້າຮ່ວມງານໂຮມຊຸມນຸມຈັດຕັ້ງສະເຫຼີມສະຫຼອງ ວັນສ້າງຕັ້ງກອງທັບປະຊາຊົນລາວ ຄົບຮອບ 75 ປີ ທີ່ ໂຮງຮຽນການທະຫານທ້ອງຖິ່ນ ແຂວງຫົວພັນ; ມີບັນດາທ່ານການນຳຂອງແຂວງ,ການນຳເມືອງຊຳເໜືອ ຄະນະພັກ-ຄະນະບັນຊາ, ພະນັກງານນັກຮົບ ຕະຫລອດຮອດນັກຮຽນ ແລະ ຄະນະພັກອຳນາດການປົກຄອງບ້ານອອ້ມຂ້າງ ເຂົ້າຮ່ວມ.

            ໃນພິທີ ສະຫາຍ ພົນຈັດຕະວາ ຄຳເມືອງ ໂຄດວົງຄູນ ກຳມະການພັກແຂວງ ເລຂາຄະນະພັກ ຫົວໜ້າການທະຫານ ກອງບັນຊາການທະຫານ ແຂວງຫົວພັນ ໄດ້ຂຶ້ນຜ່ານ ບົດປາໄສ ສະເຫຼີມສະຫຼອງ ວັນສ້າງຕັ້ງ ກອງທັບປະຊາຊົນລາວ ຄົບຮອບ 75 ປີ ເຊິ່ງສະຫາຍໄດ້ຍົກໃຫ້ເຫັນໝາຍຄວາມສຳຄັນ ກອ່ນໜ້ານີ້ 75 ປີ ຄື: ວັນທີ 20 ມັງກອນ 1949 ໂດຍຕອບສະໜອງກັບຄວາມຕ້ອງການ ຂອງພາລະກິດ ຕໍ່ສູ້ກູ້ຊາດ ຢູ່ທີ່ໝັ້ນແຫ່ງໜຶ່ງ ຂອງຕາແສງລາວຮຸ່ງ ເມືອງຊຽງຄໍ້ ແຂວງຫົວພັນ ກອງລາດສະວົງ ໄດ້ຮັບການສ້າງຕັ້ງຂື້ນ ໂດຍແມ່ນ ປະທານໄກສອນ ພົມວິຫານ ຜູ້ນຳທີ່ເຄົາລົບຮັກ ເປັນຜູ້ນຳພາ ແລະ ບັນຊາໂດຍກົງ ນັ້ນເປັນວັນແຫ່ງການເຕົ້າໂຮມກໍາລັງປະກອບອາວຸດ ທີ່ໄດ້ຮັບການສ້າງຕັ້ງຂຶ້ນ ຢູ່ໃນບໍລິເວນຕ່າງໆ ທົ່ວປະເທດ ເຂົ້າເປັນກອງທັບລາວອິດສະຫຼະ ເປັນຂີດໝາຍອັນໃໝ່ ທີ່ຢັ້ງຢືນເຖິງການເຕີບໃຫຍ່ຂະຫຍາຍຕົວ ຂອງການປະຕິວັດ ຫຼັງລະບອບໃໝ່ ບັນດາກຳລັງປະກອບອາວຸດກໍ່ໄດ້ເອົາໃຈໃສ່ເສີມຂະຫຍາຍທາດແທ້ມູນເຊື້ອການປະຕິວັດ ຍາມໃດກໍ່ເຊີດຊູບົດບາດ ຂອງພັກ ມີສະຕິລະວັງຕົວກຽມພ້ອມສູ້ຮົບໃນທຸກກໍລະນີ ທີ່ເກີດຂື້ນ ເປັນກຳລັງຫຼັກແຫຼ່ງ ເປັນບ່ອນອີງທີ່ໄວ້ໃຈໄດ້ ໃນພາລະກິດປ້ອງກັນຊາດ-ປ້ອງກັນຄວາມສະຫງົບ ທົ່ວປວງຊົນຮອບດ້ານຂອງພັກ ປົກປັກຮັກສາເອກະລາດ ອະທິປະໄຕ ແລະ ຜືນແຜ່ນດິນອັນຄົບຖ້ວນ ຂອງປະເທດຊາດໄວ້ຢ່າງໝັ້ນຄົງ ສືບຕໍ່ເສີມຂະຫຍາຍທາດແທ້ມູນເຊື້ອການປະຕິວັດ, ມູນເຊື້ອພິລະອາດຫານຂອງຊາດ ຕໍ່ພາລະກິດປ່ຽນແປງໃໝ່ຂອງພັກ, ຜ່ານຜ່າຄວາມຫຍຸ້ງຍາກ ແລະ ອຸປະສັກຕ່າງໆ ກໍ່ສ້າງກຳລັງປະກອບອາວຸດ ໃຫ້ກາຍເປັນກອງທັບປະຕິວັດ ກອງທັບປະຊາຊົນ ທີ່ມີແບບແຜນເຂັ້ມແຂງ ແລະ ທັນສະໄໝ ເພື່ອປົກປັກຮັກສາຄວາມເປັນເອກະລາດ, ອຳນາດອະທິປະໄຕ ແລະ ຜືນແຜ່ນດິນອັນຄົບຖ້ວນ ຂອງຊາດ ກໍ່ຄື ທ້ອງຖິ່ນ ຂອງພວກເຮົາໄວ້ໃຫ້ໝັ້ນຄົງ;

         ພິທີດັ່ງກ່າວ ໄດ້ມີການມອບ-ຮັບ ກະຕ່າຂອງຂວັນ ຈາກພາກສ່ວນຕ່າງໆ ອວຍພອນ ໂຮງຮຽນການທະຫານທ້ອງຖິ່ນ ແຂວງຫົວພັນ ອີກດ້ວຍ.

ພາບ ແລະ ຂ່າວໂດຍ ນັກຂ່າວ ສພຂ.