(ສປນວ) ໃນຕອນເຊົ້າຂອງວັນທີ 16 ພະຈິກ 2022, ທ່ານ ບຸນທາມ ພຸດທະວົງສາ ຮອງປະທານ ສະພາປະຊາຊົນ ນວ ໄດ້ເຂົ້າຮ່ວມເປັນປະທານ ເປີດພິທີມອບ-ຮັບ ນໍ້າບາດານ ທີ່ຄ້າຍນາຄັນທຸງ, ໂດຍການຕ້ອນຮັບຂອງ ທ່ານ ພັທ ທອງວັນ ປະເສີດສຸກ ຫົວໜ້າການເມືອງ ກອງບັນຊາການທະຫານ ເມືອງໄຊທານີ ພ້ອມດ້ວຍບັນດາທ່ານນາຍ ແລະ ພົນທະຫານ ຈຳນວນໜຶ່ງເຂົ້າຮ່ວມ.

ໃນພິທີດັ່ງກ່າວ, ໄດ້ຮັບຟັງການລາຍງານ ນໍ້າສ້າງບາດານດັ່ງກ່າວ ມູນຄ່າທັງໝົດ ຈຳນວນ 8.000.000 ກີບ, ອຸປະຖຳໂດຍ ທ່ານ ຈຸນລະຖັນ ຈັນສຸຍາ ເຈົ້າຂອງຕະຫຼາດ ບ້ານໄຜ່ລ້ອມ, ເມືອງໄຊທານີ ນວ. ນອກຈາກນັ້ນ, ສະມາຊິກສະພາປະຊາຊົນ ນວ ກໍໄດ້ປະກອບສ່ວນວັດຖຸປັດໄຈຈຳນວນໜຶ່ງ ລວມມູນຄ່າ 1.510.000 ກີບ.

ໃນຕອນທ້າຍຂອງພິທີດັ່ງກ່າວ, ທ່ານ ບຸນທາມ ພຸດທະວົງສາ, ຮອງປະທານ ສະພາປະຊາຊົນ ນວ ກໍໄດ້ມີຄຳເຫັນໂອ້ລົມຕໍ່ບັນດາທ່ານນາຍ ແລະ ພົນທະຫານ, ພ້ອມກັນນັ້ນ ກໍໄດ້ສະແດງຄວາມຍ້ອງຍໍຊົມເຊີຍໃນການເອົາໃຈໃສ່ປະຕິບັດໜ້າທີ່ວຽກງານ ດ້ວຍຄວາມຮັບຜິດຊອບສູງເຮັດໃຫ້ເຂດດັ່ງກ່າວມີຄວາມສະຫງົບ.