(ສພຊ) ວັນທີ 26 ເມສາ 2019 ທີ່ຫ້ອງວ່າການປົກຄອງ ແຂວງອຸດົມໄຊ ໄດ້ເປີດກອງປະຊຸມກ່ຽວກັບວຽກງານຕິດຕາມກວດກາ ໂດຍການເປັນປະທານຂອງທ່ານ ນາງ ສີໃສ ລືເດດມູນສອນ ກຳມະການສູນກາງພັກ, ຮອງປະທານສະພາແຫ່ງຊາດ (ສພຊ); ເຂົ້າຮ່ວມມີທ່ານ ບຸນລອດ ອ່ອນພະຈັນ ປະທານສະພາປະຊາຊົນແຂວງ (ສພຂ),ບັນດາທ່ານຄະນະປະຈຳພັກແຂວງ, ຄະນະປະຈຳສະພາປະຊາຊົນແຂວງ, ຫົວໜ້າ-ຮອງຫົວໜ້າພະແນກ, ອົງການທຽບເທົ່າພະແນກ, ສອງກອງບັນຊາການ ປກຊ-ປກສ, ສະມາຊິກສະພາປະຊາຊົນແຂວງ, ຄະນະເລຂາທິການ ສພຂ, ຄະນະຈາກສະພາແຫ່ງຊາດ,ພະນັກງານ-ວິຊາການພາຍໃນ ສພຂ ແລະ ແຂກເຊີນເຂົ້າຮ່ວມ.
ຈຸດປະສົງຂອງການເຄື່ອນໄຫວເຮັດວຽກໃນຄັ້ງນີ້ແມ່ນເພື່ອຕິດຕາມກວດກາການຈັດຕັ້ງປະຕິບັດກົດໝາຍຂອງອົງການປົກຄອງທ້ອງຖິ່ນຂັ້ນແຂວງໃນໄລຍະຜ່ານມາ ເຊິ່ງໄດ້ພົບປະ ແລະ ເຮັດວຽກຮ່ວມສພຂ; ພາຍຫລັງທີ່ບັນດາພະແນກການກ່ຽວຂ້ອງໄດ້ລາຍງານການເຄື່ອນໄຫວວຽກງານແລ້ວ ກໍໄດ້ຍົກເອົາບັນຫາຂໍ້ຄົງຂ້າງທີ່ຍັງປະຕິບັດບໍ່ໄດ້ ມາປຶກສາຫາລືກັນ ເພື່ອຊອກຫາວິທີທາງແກ້ໄຂແລະ ປັບປຸງການປະຕິບັດວຽກງານໃນຕໍ່ໜ້າໃຫ້ດີຂື້ນກວ່າເກົ່າແລະ ເພື່ອເປັນຂໍ້ມູນເບື້ອງຕົ້ນທີ່ຈະນຳເຂົ້າຜ່ານໃນກອງປະຊຸມສະໄໝສາມັນເທື່ອທີ່ 7 ຂອງສະພາແຫ່ງຊາດຊຸດທີ VIII.
ຕອນທ້າຍຂອງກອງປະຊຸມທ່ານ ນາງ ສີໃສ ລືເດດມູນສອນ ໄດ້ມີຄຳເຫັນໂອ້ລົມເຊິ່ງໄດ້ເນັ້ນໃຫ້ບັນດາອົງການປົກຄອງທ້ອງຖິ່ນທຸກຂັ້ນໃຫ້ເອົາໃຈໃສ່ໃນການຈັດຕັ້ງປະຕິບັດໜ້າທີ່ຂອງຕົນໃຫ້ຖືກຕ້ອງຕາມລັດຖະທຳມະນູນ ແລະ ກົດໝາຍ, ບັນຫາທີ່ສາມາດຈັດຕັ້ງປະຕິບັດໄດ້ໃຫ້ສືບຕໍ່ປົກປັກຮັກສາໝາກຜົນດັ່ງກ່າວ, ບາງບັນຫາທີ່ຍັງປະຕິບັດບໍ່ໄດ້ໃຫ້ແກ່ໄຂປັບປຸງໃຫ້ດີຂື້ນ ເພື່ອຕອບສະໜອງໃຫ້ແກ່ການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມ ໃຫ້ມີຄວາມສະຫງົບ, ຮຸ່ງເຮືອງສີວິໄລ ແລະ ປະຊາຊົນມີຢູ່ມີກິນ ແລະ ຫລຸດພົ້ນອອກຈາກຄວາມທຸກຍາກເທື່ອລະກ້າວ.
ໃນວັນດຽວກັນ, ຢູ່ທີ່ຫ້ອງປະຊຸມຊັ້ນ2 ຄະນະຈັດຕັ້ງແຂວງ ນຳໂດຍທ່ານ ນາງ ບົວຄຳ ທິບພະວົງ ປະທານກຳມາທິການຍຸຕິທຳສະພາແຫ່ງຊາດໄດ້ເຮັດວຽກຮ່ວມກັບອົງການໄອຍະການປະຊາຊົນແຂວງ, ອົງການກວດກາລັດຂັ້ນແຂວງ, ສານປະຊາຊົນແຂວງ, ພະແນກແຮງງານ ແລະ ສະຫວັດດີການສັງຄົມ, ປກສ ແຂວງ ແລະ ຫ້ອງການຈັດຕັ້ງປະຕິບັດຄຳຕັດສິນຂອງສານ ເຊິ່ງໄດ້ຮັບຟັງການລາຍງານຂອງແຕ່ລະພາກສ່ວນ ແລະ ໄດ້ມີການປຶກສາຫາລື ເພື່ອຊອກຫາວິທີທາງແກ້ໄຂ ແລະ ປັບປຸງວຽກງານດັ່ງກ່າວໃຫ້ດີຂຶ້ນ. ສ່ວນຢູ່ຫ້ອງປະຊຸມຊັ້ນ 3 ຫ້ອງວ່າການປົກຄອງແຂວງອຸດົມໄຊຍັງໄດ້ມີກອງປະຊຸມຮ່ວມກັບບັນດາພະແນກການອ້ອມຂ້າງແຂວງ ເຊິ່ງນຳໂດຍທ່ານ ອຳໄພ ຈິດມະນົນ ຮອງປະທານກຳມາທິການກົດໝາຍສະພາແຫ່ງຊາດ ເຊິ່ງໄດ້ຮັບຟັງການລາຍງານຂອງບັນດາພະແນກການຄື: ພະແນກພາຍໃນແຂວງ, ຈັດຕັ້ງແຂວງ, ພະແນກສຶກສາທິການ ແລະ ກິລາ, ພະແນກສາທາລະນະສຸກ ແລະ ພະແນກການເງິນ.
(ແສງພອນ ອິນນະລົງ)