(ສພຊ) ລະຫວ່າງວັນທີ 4-5 ກັນຍາ 2019, ທ່ານ ນາງ ສີໃສ ລືເດດມູນສອນ ຮອງປະທານສະພາແຫ່ງຊາດ (ສພຊ), ທັງເປັນສະມາຊິກສະພາແຫ່ງຊາດ (ສສຊ) ປະຈໍາເຂດເລືອກຕັ້ງທີ 11 ແຂວງບໍລິຄໍາໄຊ ພ້ອມດ້ວຍຄະນະສະມາຊິກສະພາປະຊາຊົນແຂວງ (ສສຂ) ປະຈຳເມືອງ ໄດ້ລົງເຄື່ອນໄຫວພົບປະຢ້ຽມຢາມ ແລະ ເຜີຍແຜ່ຜົນສຳເລັດກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດຊຸດທີ VIII ແລະ ຂອງສະພາປະຊາຊົນແຂວງ (ສພຂ) ຊຸດທີ I ຕໍ່ພະນັກງານ-ລັດຖະກອນ, ທະຫານ-ຕຳຫລວດ, ຕະຫລອດຮອດພໍ່ແມ່ປະຊາຊົນຜູ້ມີສິດເລືອກຕັ້ງ ຢູ່ເມືອງປາກຊັນ ລວມທັງໝົດ 4 ຈຸດ ມີຜູ້ເຂົ້າຮ່ວມຮັບຟັງທັງໝົດ 385 ຄົນ ຍິງ 159 ຄົນ.

ຈຸດປະສົງຂອງການລົງເຜີຍແຜ່ໃນຄັ້ງນີ້ ເພື່ອເຮັດໃຫ້ພະນັກງານ-ລັດຖະກອນ, ທະຫານ-ຕໍາຫລວດ, ອໍານາດການປົກຄອງບ້ານ ຕະຫລອດຮອດພໍ່ແມ່ປະຊາຊົນຢູ່ທ້ອງຖິ່ນ ແລະ ຮາກຖານ ໄດ້ມີຄວາມຮັບຮູ້ ແລະ ເຂົ້າໃຈຕໍ່ແນວທາງນະໂຍບາຍຂອງພັກເວົ້າລວມ, ເວົ້າສະເພາະກໍຄືວຽກງານຂອງ ສພຊ ແລະ ຂອງ ສພຂ (ສພຂ) ທັງເປັນການເກັບກຳສະພາບການ, ການປະກອບຄຳຄິດຄຳເຫັນ, ຄຳສະເໜີຕ່າງໆ ຂອງປະຊາຊົນໃນເຂດເລືອກຕັ້ງ ຕໍ່ກັບການປົກປັກຮັກສາ ແລະ ສ້າງສາພັດທະນາປະເທດຊາດ. ພ້ອມທັງຮັບຟັງການລາຍງານສະພາບການພັດທະນາເສດຖະກິດ-ສັງຄົມຂອງເມືອງ ແລະ ບ້ານ. ນອກນັ້ນ, ຄະນະ ສສຊ, ສສຂ ຍັງໄດ້ຍົກໃຫ້ເຫັນບາງມາດຕາຂອງກົດໝາຍ ທີ່ຕິດພັນກັບຊີວິດການເປັນຢູ່ຂອງປະຊາຊົນ, ວຽກງານບົດບາດຍິງ-ຊາຍ, ໄພຄຸກຄາມ ແລະ ຜົນຮ້າຍຂອງຢາເສບຕິດ. ພ້ອມທັງເປີດໂອກາດໃຫ້ພໍ່ແມ່ປະຊາຊົນໄດ້ປະກອບຄຳຄິດຄຳເຫັນ ແລະ ຄຳສະເໜີບາງບັນຫາທີ່ຂັດຂ້ອງໝອງໃຈຈຳນວນໜຶ່ງ ເປັນຕົ້ນແມ່ນບັນດາໂຄງການລົງທຶນຂອງລັດ ທີ່ສົ່ງຜົນກະທົບຕໍ່ຊີວິດການເປັນຢູ່ຂອງພໍ່ແມ່ປະຊາຊົນ ແລະ ສິ່ງແວດລ້ອມ​, ບັນຫາພື້ນຖານໂຄງລ່າງ, ເສັ້ນທາງ, ໄຟຟ້າ, ນ້ຳກິນ-ນ້ຳໃຊ້ ແລະ ບັນຫາອື່ນໆ.  ເພື່ອໃຫ້ຜູ້ແທນນໍາໄປພິຈາລະນາ ແລະ ສະເໜີຕໍ່ກອງປະຊຸມສະໄໝສາມັນເທື່ອທີ 8 ທີ່ຈະໄຂຂຶ້ນໃນຕໍ່ຫນ້າ. ບັນຫາທີ່ປະຊາຊົນສະເໜີມານັ້ນ ບາງບັນຫາ ທາງຄະນະ ສສຊ, ສສຂ ກໍໄດ້ຊີ້ແຈງ ແລະ ໃຫ້ຄວາມກະຈ່າງແຈ້ງ, ບາງບັນຫາຄະນະ ສສຊ, ສສຂ ແມ່ນຈະນຳເອົາໄປສະເໜີຢູ່ໃນກອງປະຊຸມ ສພຊ ແລະ ສພຂ ເພື່ອໃຫ້ພາກສ່ວນກ່ຽວຂ້ອງນຳໄປຄົ້ນຄວ້າພິຈາລະນາແກ້ໄຂໃນຕໍ່ໜ້າ. ພ້ອມນີ້;  ທ່ານຮອງປະທານສະພາແຫ່ງຊາດ ຍັງໄດ້ເນັ້ນ ແລະ ໃຫ້ທິດຊີ້ນຳໃຫ້ອຳນາດການປົກຄອງຂອງເມືອງ, ອຳນາດການປົກຄອງບ້ານ ຕະຫລອດຮອດພໍ່ແມ່ປະຊາຊົນ ຈົ່ງພ້ອມກັນຮັກສາໄດ້ເຖິງຄວາມສາມັກຄີ, ຮັກແພງເຊິ່ງກັນ ແລະ ກັນ, ຕ້ານປາກົດການຫຍໍ້ທໍ້ຕ່າງໆທີ່ຈະເກີດຂຶ້ນ, ເອົາໃຈໃສ່ສ້າງເສດຖະກິດໃນຄອບຄົວຂອງຕົນໃຫ້ມີຄວາມເຂັ້ມແຂງ ເພື່ອເຮັດໃຫ້ຊີວິດການເປັນຢູ່ໃຫ້ນັບມື້ດີຂຶ້ນເປັນກ້າວໆ.

(ບຸນນໍາ ແພງສີແກ້ວ)