(ສພຊ) – ເພື່ອຕິດຕາມກວດກາຄວາມຄືບໜ້າຂອງການຈັດຕັ້ງປະຕິບັດມະຕິກອງປະຊຸມສະໄໝສາມັນເທື່ອທີ 10 ຂອງສະພາແຫ່ງຊາດ (ສພຊ) ຊຸດທີ VII ວ່າດ້ວຍການຮັບຮອງເອົາບົດລາຍງານຂອງລັດຖະບານ ກ່ຽວກັບການຈັດຕັ້ງປະຕິບັດເຮັດທົດລອງວຽກງານສ້າງແຂວງເປັນຫົວໜ່ວຍຍຸດທະສາດ, ສ້າງເມືອງເປັນຫົວໜ່ວຍເຂັ້ມແຂງຮອບດ້ານ ແລະ ສ້າງບ້ານເປັນຫົວໜ່ວຍພັດທະນາ ສະບັບເລກທີ 02/ສພຊ, ລົງວັນທີ 28 ມັງກອນ 2016; ເພື່ອຊອກໃຫ້ເຫັນຜົນງານ, ຂໍ້ສະດວກ, ຂໍ້ຫຍຸ້ງຍາກ ແລະ ບົດຮຽນທີ່ຖອດຖອນໄດ້ຜ່ານການຈັດຕັ້ງປະຕິບັດຕົວຈິງຂອງສູນກາງ ແລະ ທ້ອງຖິ່ນ ໃນໄລຍະຜ່ານມາ ທັງເປັນການເກັບກຳຂໍ້ມູນການຈັດຕັ້ງປະຕິບັດການແບ່ງຂັ້ນຄຸ້ມຄອງລະຫວ່າງສູນກາງກັບແຂວງ, ແຂວງກັບເມືອງ ແລະ ເມືອງກັບບ້ານ ເພື່ອກຽມລາຍງານຕໍ່ກອງປະຊຸມຄະນະປະຈໍາສະພາແຫ່ງຊາດ ກ່ອນເປີດກອງປະຊຸມສະໄໝສາມັນເທື່ອທີ 8 ຂອງ ສພຊ ຊຸດທີ IX ເພື່ອພິຈາລະນາຮັບຮອງເອົາການສືບຕໍ່ການຈັດຕັ້ງປະຕິບັດວຽກງານ 3 ສ້າງໃນຕໍ່ໜ້າ.

ວັນທີ 30 ກັນຍາ – 4 ຕຸລາຜ່ານມາ, ທ່ານ ຄຳໃບ ດຳລັດ ກຳມະການສູນກາງພັກ, ຮອງປະທານສະພາແຫ່ງຊາດ ພ້ອມດ້ວຍຄະນະ ໄດ້ເຄື່ອນໄຫວຕິດຕາມກວດກາການຈັດຕັ້ງປະຕິບັດວຽກງານ 3 ສ້າງ ຢູ່ແຂວງອຸດົມໄຊ ແລະແຂວງຫຼວງພະບາງ ໃນນັ້ນ, ແຂວງອຸດົມໄຊ ເຄື່ອນໄຫວຢູ່ເມືອງໄຊ, ບ້ານຈຸດສຸມໜອງແມງດາ, ບ້ານຈຸດສຸມຫຼັກ 32; ແຂວງຫຼວງພະບາງ ເຄື່ອນໄຫວຢູ່ 4 ຈຸດຄື: ເມືອງນໍ້າບາກ, ບ້ານຈຸດສຸມນໍ້າຖ້ວມໃຕ້, ບ້ານຈຸດສຸມເມືອງຂາຍ ແລະ ນະຄອນຫຼວງພະບາງ  ໂດຍການຕ້ອນຮັບ ແລະ ຮ່ວມເຮັດວຽກກັບການນຳຂອງແຂວງ, ເມືອງ-ນະຄອນ ແລະ ບ້ານ ພ້ອມດ້ວຍພໍ່ແມ່ປະຊາຊົນ ເຂົ້າຮ່ວມ.

ທ່ານ ຄຳໃບ ດຳລັດ ໄດ້ມີຄຳເຫັນເນັ້ນໜັ້ກໃຫ້ຄະນະນຳຂອງແຂວງ, ເມືອງ-ນະຄອນ ສືບຕໍ່ກະກຽມກອງປະຊຸມໃຫຍ່ 3 ຂັ້ນ ໃນຂົງເຂດຄວາມຮັບຜິດຊອບຂອງຕົນ, ໃນນັ້ນ ສະເໜີໃຫ້ເອົາວຽກງານຂົງເຂດສຶກສາເຂົ້າຕື່ມ ເປັນຕົ້ນແມ່ນຊຸກຍູ້, ປຸກລະດົມການເຂົ້າຮຽນຂອງນັກຮຽນໃນທຸກຊັ້ນ-ທຸກສາຍໃຫ້ເພີ່ມຂຶ້ນ ແກ້ໄຂບັນຫາການປະລະການຮຽນ, ການຂາດແຄນຄູສອນ, ການສົ່ງເສີມການຮຽນໃນຊັ້ນສາມັນສຶກສາວິຊາຊີບ; ຈັດຕັ້ງປະຕິບັດວາລະແຫ່ງຊາດຮອດປີ 2025 ໃນຂົງເຂດຄວາມຮັບຜິດຊອບຂອງຕົນ ໂດຍສະເພາະບັນຫາຢາເສບຕິດ, ບັນຫາເສດຖະກິດ (ໄພເງິນເຟີ້-ຄ່າຄອງຊີບສູງ…); ຈັດຕັ້ງປະຕິບັດມະຕິຂອງກອງປະຊຸມໃຫຍ່ຄັ້ງທີ XI ຂອງພັກ, ມະຕິກອງປະຊຸມຂອງອົງຄະນະພັກແຂວງ ໂດຍສຸມໃສ່ແກ້ໄຂບັນຫາຄວາມຫຍຸ້ງຍາກທາງດ້ານເສດຖະກິດ-ການເງິນ, ຄຸ້ມຄອງດ້ານລາຍຮັບ-ລາຍຈ່າຍ, ຊຸກຍູ້ແກ້ໄຂຄວາມທຸກຍາກຂອງປະຊາຊົນບັນດາເຜົ່າ.

(ນາງ ກຸກກິກ ບຸດດາໄຊ)